Perezida Paul Kagame w'u Rwanda yahinduye leta, asimbuza Jenerali James Kabarebe
Ahavuye isanamu, Getty Images
Perezida Paul Kagame w'u Rwanda ku wa kane yahinduye bamwe mu bagize guverinoma.
Dr Richard Sezibera wahoze ari umunyamabanga mukuru w'umuryango w'ibihugu by'Afurika y'iburasirazuba ni we yagizwe minisitiri w'ububanyi n'amahanga mushya.
Asimbuye Louise Mushikiwabo uherutse gutorerwa kuyobora umuryango w'ibihugu bivuga ururimi rw'Igifaransa.
Mu zindi mpinduka zikomeye, uwari minisitiri w'ingabo Jenerali James Kabarebe yasimbujwe kuri uwo mwanya, hashyirwaho Jenerali Majoro Murasira Albert.
Muri izo mpinduka kandi, umubare wa minisiteri wagabanyijwe ziva kuri 31 zishyirwa kuri minisiteri 26.
Muri iryo hindura rya bamwe mu bagize guverinoma, minisiteri yatunguranye cyane ni iy'ingabo yari iyobowe na Jenerali James Kabarebe wasimbujwe Jenerali Majoro Murasira Albert.
Jenerali Kabarebe yagizwe umujyanama mukuru wa Perezida Kagame mu by'umutekano n'igisirikare.
Ahavuye isanamu, Getty Images
Uyu Jenerali Kabarebe ufatwa nk'inkoramutima ya Perezida Kagame, yari amaze imyaka 8 kuri uyu mwanya.
Yabaye hafi ya Perezida Kagame kuva mu gihe cy'urugamba rwa FPR mu mwaka wa 1990. Nyuma y'urugamba yagiye ashingwa imirimo ikomeye mu gisirikare.
Azwiho kuba yarayoboye igisirikare cy'ibihugu bibiri bitandukanye, u Rwanda na Repubulika ya Demokarasi ya Kongo, mu gihe cy'ubutegetsi bwa Laurent-Désiré Kabila.
Uwamusimbuye Jenerali Majoro Albert Murasira yahoze mu ngabo z'uwari Perezida w'u Rwanda, Juvénal Habyarimana, mbere yuko bamwe mubo bari kumwe muri izo ngabo bahuzwa n'abo mu ngabo za RPF hagakorwa igisirikare kimwe cya RDF mu mwaka wa 1994.
Izi mpinduka zibaye nyuma yuko Louise Mushikiwabo wari minisitiri w'ububanyi n'amahanga, atorerwa kuyobora umuryango w'ibihugu bivuga ururimi rw'Igifaransa.
Ahavuye isanamu, Getty Images
Umwanya we wahawe Dr Richard Sezibera wahoze ayobora umuryango w'ibihugu by'Afurika y'iburasirazuba.
Muri iyi leta nshya kandi, uwari minisitiri w'ubutegetsi bw'igihugu Francis Kaboneka yakuwe kuri uwo mwanya, asimbuzwa Profeseri Shyaka Anastase wayobora ikigo cy'igihugu cy'imiyoborere.
Bishoboka ko iyegura rya hato na hato ry'abayobozi b'uturere n'ab'inzego zibanze bamwe bashinjwa imiyoborere mibi rifite uruhare muri izi mpinduka.
Muri rusange muri iyi guverinoma nshya, hagaragayemo abaminisitiri 6 bashya ndetse na minisiteri ishinzwe ibiza n'impunzi ihindurirwa izina yitwa ishinzwe ibikorwa by'ubutabazi, inahabwa umuminisitiri mushya.
Impinduka kandi zanageze muri zimwe mu nzego zikomeye za leta zirimo iz'umutekano w'igihugu.
Uwari umuyobozi mukuru wa polisi y'u Rwanda, IGP Emmanuel Gasana, yasimbujwe uwari umwungirije Dan Munyuza. Gasana yagizwe umuyobozi w'intara y'amajyepfo.
Urwego rushinzwe iperereza ryo hanze narwo rwahawe umuyobozi mushya ariwe Koloneli wacyuye igihe, Anaclet Kalibata, wari usanzwe akuriye urwego rw'abinjira n'abasohoka mu gihugu.
