Bitari biherutse, umubyeyi yibarutse abana batanu muri Afurika y'epfo
Ahavuye isanamu, Getty Images
Afurika y'epfo iri mu byishimo by'ivuka ry'impinja eshanu mu bitaro biri hafi y'umujyi wa Johannesburg.
Urugaga rw'ibitaro rwa Clinix Health Group, ari narwo ny'ir'ibitaro bya Clinix Botshelong Empilweni Private Hospital bavukiyemo, rwatangaje ko aba bana babaye aba gatanu bavutse ari batanu muri iki gihugu guhera mu mwaka wa 1960.
Aba bana batanu - bitwa Siyanda, Sibahle, Simesihle, Silindile na Sindisiwe - bavukiye ibyumweru 30, ni ukuvuga ibyumweru 10 mbere y'igihe gisanzwe.
Ariko ibi bitaro bivuga ko ibyo bisanzwe iyo havutse abana barenze umwe icyarimwe.
Iyi nkuru irimwo ivyatanzwe na X. Dukeneye uruhusha rwawe imbere yuko bigushikira, kuko birashobora kuba bikoresha cookies hamwe n'ubundi buhinga. Wobanza ugasoma aha X amategeko agenga cookien'ayagenga ubuzima bwite imbere yuko wemera. Kugira ubibone hitamwo 'emera hanyuma ubandanye'.
Impera ya X ubutumwa
Ubuyobozi bw'ibi bitaro byavuze ko buri mwana yavutse apima ikilo kimwe kirenga kandi ubu bari guhumeka ku bwabo nta byuma bibibafashijemo ndetse ngo bari no kwiyongera ibiro.
Dogiteri Moeng Pitsoe, umuganga wari uyoboye itsinda ryabyaje uwo mubyeyi, yavuze ko hari icyizere ko aba bana bose bazakura.
Yagize ati:
"Gukora neza cyane ndetse n'uko aba bana bavutse bameze, biduha icyizere ko bazakura."
"Twizeye ko aba bana batanu bazaba aba mbere [muri Afurika y'epfo] bazashobora gukura bose kandi bakiteza imbere."
Byitezwe ko aba bana bazava muri ibi bitaro bamaze kuzuza ibiro bibiri umwe umwe.
Hagati aho, abantu batandukanye bakomeje kohereza ubutumwa bwo kwishimira ivuka ry'aba bana babunyujije ku rubuga nkoranyambaga rwa Twitter.
Hari n'umwe mu miryango ifasha watangije igikorwa cyo gukusanya inkunga yo kwita kuri abo bana.
