Abacyekwaho kurogera mu Bwongereza uwahoze ari intasi y'Uburusiya bavuze ko bari "ba mukerarugendo"

Aba bagabo babiri batangajwe nk'abacyekwaho kurogera mu Bwongereza uwahoze ari maneko w'Uburusiya bavuze ko bari bibereye mu bukerarugendo mu Bwongereza.

Aba bagabo, batangajwe ko bitwa Alexander Petrov na Ruslan Boshirov, babwiye televiziyo mpuzamahanga ya leta y'Uburisiya ya Russia Today (RT) ko bari bari gusura umujyi wa Salisbury, ariko ko bahise basubira mu murwa mukuru w'Ubwongereza wa London mu isaha imwe.

Bashinjwa n'Ubwongereza kuba baragerageje kwica Sergei Skripal wahoze ari maneko w'Uburusiya n'umukobwa we Yulia mu kwezi kwa gatatu bakoresheje uburozi bwa Novichok bwo ku rwego rwa gisirikare.

Ubwongereza bwatangaje ko ari abakozi b'urwego rw'ubutasi bwa gisirikare rw'Uburusiya.

Babwiye televiziyo RT bati:

"Twari ba mukerarugendo gusa i Salisbury."

"Umujyi wari wuzuyemo urubura. Twari dutose, dutega gariyamoshi yari bugufi cyane nuko dusubira" i London.

Bongeyeho bati:

"Wenda twaba twaregereye inzu ya Skripal, ariko ntabwo tuzi aho iherereye."

Bahakanye ko ari abakozi b'urwego rw'ubutasi bwa gisirikare rw'Uburusiya, bavuga ko ahubwo bakora mu igororangingo.

Ni iki gikurikiyeho?

Ubwongereza bwamaze kuburira aba bagabo bombi - byibazwa ko bari mu kigero cy'imyaka nka 40 y'amavuko - bo bazatabwa muri yombi bakaburanishwa nibaramuka basohotse mu Burusiya.

Uburusiya busanzwe budatanga abaturage babwo bacyekwaho ibyaha baba bashakishwa mu bindi bihugu.

Ariko ibihugu by'Uburayi byamaze gushyikirizwa impapuro z'Ubwongereza zo kubata muri yombi baramutse bavuye mu Burusiya.