Perezida Trump ashinja Ubushinwa kubangamira Amerika na Koreya ya ruguru

Perezida Donald Trump wa Leta Zunze Ubumwe z'Amerika yamaganye Ubushinwa avuga ko bubangamira akazi k'Amerika na Koreya ya ruguru, mu gihe Bwana Trump akomeje kunengwa ku kugenda biguru ntege kwa Koreya ya ruguru mu kureka gahunda yayo y'ibitwaro kirimbuzi bwa nikleyeri.

Mu ruhererekane rw'ubutumwa bwo ku rubuga nkoranyambaga rwa Twitter, Bwana Trump yanavuze ko nta mpamvu abona yatuma Amerika yongera kwitabira imikino yo kwitoza intambara ikorana na Koreya y'epfo - imikino yarakaje Koreya ya ruguru.

Mu minsi ishize, umujyanama we mu bya gisirikare yavuze ko iyi myitozo ya gisirikare ishobora gukomeza.

Bwana Trump yagize ati:

"[Koreya ya ruguru] iri ku gitutu cyinshi cy'Ubushinwa kubera amakimbirane ashingiye ku bucuruzi dufitanye na leta y'Ubushinwa."

Ubushinwa bwashinje Bwana Trump "guhindura uwo yegekaho ibirikuba" ku ngingo ijyanye na Koreya ya ruguru.

Mu nama yabaye mu kwezi kwa gatandatu yahuje Bwana Trump na Kim Jong-un, umutegetsi wa Koreya ya ruguru, yarangiye Bwana Jong-un asezeranyije "kureka burundu gahunda y'ibitwaro kirimbuzi bya nikleyeri."

Nyuma yaho gato, Bwana Trump yavuze ko "nta byago bikiriho bitewe n'ibitwaro kirimbuzi bya nikleyeri bya Koreya ya ruguru."

Ariko guhera icyo gihe, ababikurikiranira hafi benshi bavuga ko Koreya ya ruguru itarikwihuta bihagije mu gusenya ahakorerwa ibitwaro kirimbuzi bya nikleyeri n'ibisasu bya roketi.

Ubutumwa bwa Bwana Trump yanyujije ku rubuga nkoranyambaga rwa Twitter busa nkaho bwegeka izi ngorane zose ku Bushinwa, ariko yanakomeje ashimagiza umubano afitanye ku giti cye n'abategetsi bombi b'Ubushinwa na Koreya ya ruguru.

Iyi mvange iteye urujijo yo kunenga, gushimagiza no gushyiraho igikangisho, ije ikurikira igitutu Amerika ikomeje kotswa ngo igaragaze ibyavuye muri biriya biganiro by'amateka byabaye mu kwezi kwa gatandu byahuje Bwana Trump na Bwana Jong-un bikabera mu gihugu cya Singapuru.