Uganda – Rwanda: Gen Muhoozi Kainerugaba yagarutse i Kigali

Lt Gen Muhoozi Kainerugaba umuhungu wa Perezida Yoweri Museveni wa Uganda, yagarutse i Kigali "mu ruzinduko bwite", nk'uko bivugwa na ambasade ya Uganda i Kigali.

Muhoozi, usanzwe ari umugaba w'ingabo zirwanira ku butaka, yaherukaga i Kigali mu mpera z'ukwezi kwa mbere aho yabonanye na Perezida Paul Kagame bakaganira ku mubano w'ibihugu byombi.

Kuva mu 2017 ubutegetsi bwa Uganda n'u Rwanda byagiranye amakimbirane yateye ingaruka zitandukanye ku baturage b'ibihugu byombi, zirimo no gufunga imipaka.

Uganda yashinje u Rwanda kwivanga mu butegetsi n'ubutasi butemewe naho u Rwanda rushinja Uganda gukorana n'abashaka guhungabanya umutekano w'u Rwanda.

Gen Kainerugaba, ukunze kwita Perezida Kagame 'data wacu', yagiye atangaza kuri Twitter ko bombi bari kugira uruhare mu kongera kubanisha neza ibi bihugu.

Imipaka y'ibihugu byombi yongeye gufungurwa ku bagenzi basanzwe kuwa mbere w'icyumweru gishize.

Ambasade ya Uganda yatangaje kuri Twitter ko ku kibuga cy'indege mpuzamahanga cya Kigali, Gen Muhoozi yakiriwe na Brig. Gen. Willy Rwagasana ukuriye abarinda umukuru w'u Rwanda hamwe n'umuvugizi w'ingabo Col. Ronald Rwivanga, aba ni nabo bamwakiriye ubwo ahaheruka.