Félix Tshisekedi: Ibyapa bimunenga byashyizwe i Jerusalem aho yari mu ruzinduko
Ahavuye isanamu, Presidence DR Congo
Ibyapa binini byanditse mu Cyongereza n'Igifaransa byabonetse ku mihanda minini i Yerusalemu byamagana Perezida Félix Tshisekedi wari uriyo mu ruzinduko, bimushinja "ivangura ririmo kwanga Abayahudi", nk'uko bivugwa n'ikinyamakuru Jewish Telegraphic Agency (JTA).
Tshisekedi yasuye Israel muri iki cyumweru, aba perezida wa mbere wa Congo ubikoze kuva mu 1985. Kuwa kane yakiriwe na minisitiri w'intebe Naftali Bennett baganira ku bufatanye bw'ibihugu bakuriye.
Ibiro bya perezida wa RD Congo bivuga ko aba bategetsi baganiriye ku bufatanye bw'ibihugu byombi muri dipolomasi, umutekano, ubuhinzi, ibikorwa remezo n'ibindi…
Gusa muri uru ruzinduko rwe rw'iminsi itatu yashoje kuwa kane, imodoka zimutwaye zishobora kuba zaraciye munsi y'ibyapa bimwamagana. Bwana Tshisekedi ntacyo ibyo arabivugaho.
Iyi nkuru irimwo ivyatanzwe na X. Dukeneye uruhusha rwawe imbere yuko bigushikira, kuko birashobora kuba bikoresha cookies hamwe n'ubundi buhinga. Wobanza ugasoma aha X amategeko agenga cookien'ayagenga ubuzima bwite imbere yuko wemera. Kugira ubibone hitamwo 'emera hanyuma ubandanye'.
Impera ya X ubutumwa
Ntabwo hazwi neza neza icyo ibyo byapa byashakaga gusobanura, ariko JTA ivuga ko byaba bifitanye isano na Moïse Katumbi uri imbere mu batavuga rumwe na Perezida Tshisekedi.
Katumbi, ufite se w'Umuyahudi wavukiye mu Bugereki, yaba afite imigambi yo kwiyamamariza kuyobora RD Congo mu matora ya 2023, ariko umushinga mushya w'itegeko uri kwigwaho ushobora kumubuza, nk'uko JTA ibivuga.
Uyu mushinga w'itegeko uvuga ko umuntu wifuza kuba Perezida wa RD Congo ababyeyi be bombi bagomba kuba baravukiye muri icyo gihugu.
JTA ivuga ko yegereye abamanitse ibyo byapa ariko ntibifuze kugira icyo babivugaho, gusa bavuga ko Israel iri gukora ikosa mu kubana na Tshisekedi.
Ishyaka Union pour la Démocratie et le Progrès Social; UDPS rya Perezida Tshisekedi rishyigikiye uyu mushinga w'itegeko, rivuga ko ugamije "kurengera ubusugire bw'igihugu no kwirinda kwivanga kw'amahanga".
Ariko abanenga ishyaka riri ku butegetsi bavuga ko uyu ari umushinga ugamije kubangamira imigambi ya Moïse Katumbi.
