Coronavirus: Imikino imwe mu Rwanda ishobora kuba nta bafana
Ahavuye isanamu, Getty Images
Mu rwego rwo kwirinda ikwirakwira rya coronavirus, minisiteri y'imikino mu Rwanda yatanze inama ko amakipe y'u Rwanda n'abakinnyi b'Abanyarwanda bahagarika imikino yose mpuzamahanga bari kwitabira.
Itangazo ryasohowe n'iyi minisiteri rivuga ko "amarushanwa abera imbere mu gihugu azakomeza nk'uko ateganyijwe...ariko imwe mu mikino basanze ari ngombwa yakinwa imiryango ikinze".
Mu Rwanda coronavirus ntabwo irahagera ariko ubu imaze kuvugwa mu gihugu gituranyi cya Congo Kinshasa aho ejo ku wa kabiri habonetse umuntu umwe wanduye iyi ndwara.
Bigaragara henshi muri Kigali ko hafashwe ingamba zikomeye mu kwirinda ikwirakwira rya coronavirus mu gihe yaba igeze mu Rwanda, cyane cyane abantu batozwa gukaraba intoki kenshi.
Minisiteri y'imikino mu Rwanda mu itangazo ryayo yamenyesheje amashyirahamwe y'imikino ko hazagenzurwa amarushanwa mpuzamahanga yari kubera mu Rwanda byaba ngombwa amwe agahagarikwa cyangwa akimurirwa ikindi gihe.
Ikipe y'u Rwanda y'umupira w'amaguru tariki ya 23/03 ifite umukino na Cape Verde (Cap-Vert) muri icyo gihugu ndetse n'uwo kwishyura mu Rwanda tariki 31/03 mu gushaka tike ya CAN 2021.
Mu Rwanda kandi kuva tariki 25 y'uku kwezi ku Gisenyi hateganyijwe imikino mpuzamahanga ya Beach Volley mu bagore yo gushaka ticket y'imikino Olempike ya Tokyo.
Muri Beach Volley ikipe y'u Rwanda y'abagabo yo yari kwitabira imikino nk'iyi kuva tariki 23 muri Sierra Leone.
Ikipe y'u Rwanda y'umupira w'amaguru y'abakina imbere mu gihugu nayo biteganyijwe ko ijya mu mikino ya CHAN muri Cameroun kuva tariki 04 y'ukwezi gutaha kwa kane.
Minisiteri y'imikino mu Rwanda yategetse ko ahantu hose habera imikino, ku muryango, mu rwambariro rw'abakinnyi n'aho barira hashyirwa uburyo bw'isuku.
Ahantu henshi hahurira abantu, cyane cyane mu mujyi wa Kigali, hagaragara uburyo bwo gukaraba intoki mu kwirinda ikwirakwira ry'iyi ndwara igihe yahagera.
Leta y'u Rwanda yasabye abaturage kugabanya umuco wo kuramukanya bahana ibiganza kuko biri mu bishobora gukwirakwiza iyi ndwara.
Iyi virus yandurira mu matembabuzi y'uyirwaye mu gihe akorora yegereye cyane abandi, no mu gihe yikora mu maso agakora no ku bandi.
