Ya nyoni idasanzwe yageze muri Kenya ivuye muri Finland yapfuye

Inyoni yo mu bwoko bwa 'Osprey' yarokorewe muri Kenya ivuye muri Finland nyuma yo kuguruka igakora urugendo rungana na kilometero 6,948, yapfuye izize kunanirwa gukora kw'ingingo gutewe no gusonza bikabije, nkuko bivugwa n'ikigo cyita ku nyamaswa cyo muri Kenya (KWS).

Cyongeyeho ko cyateganyaga kurekura iyo nyoni ihiga yo mu bwoko bugenda bwimuka, yari ifite imyaka ine y'amavuko, ngo isubire mu gasozi nyuma yo kuyifasha kondoka.

Ariko yapfuye ku cyumweru hashize iminsi imaze kurokorwa, ubwo yarimo yitabwaho.

Iyo nyoni yari yagurutse iva muri Finlande aho yari yashyiriweho ikimenyetso cy'icyuma mu mwaka wa 2017 ndetse iza kurokorwa ikuwe mu mutego wo gutega amafi mu burengerazuba bwa Kenya.

Mu cyumweru gishize, icyo kigo gishinzwe inyamaswa muri Kenya cyatangaje ko iyo nyoni yo mu bwoko bw'izitwa 'Osprey' yafashwe mu rushundura rw'abarobyi mu burengerazuba bwa Kenya.

Basanze ifite ibikomere bito ku kaguru ariko biboneka ko nta kibazo gikomeye ifite uretse kuba yarananutse no kubura amazi mu mubiri.

Itangazo ryasohowe n'iki kigo cyo muri Kenya rivuga ko "amakuru y'iyi nyoni bayavanye ku kiyiranga yambikiwe muri Finland kiriho amakuru kuri yo".

Iyi nyoni yari isanzwe itungwa no kuroba amafi, yabonetse ku wa mbere w'icyumweru gishize maze ku wa kane ishyikirizwa ikigo gishinzwe inyamaswa cya Kenya ishami ryo kuvura inyamaswa.

Yari iri kwitabwaho, ihabwa ifunguro rikwiye banakurikirana ubuzima bwayo, mbere yo kuyirekura igakomeza ubwisanzure bwayo igana aho ishaka.