Cais CPD Caernarfon i ddyblu nifer y seddi yn yr Oval

Eisteddle presennol yn safle CPD Caernarfon gyda stad dai yn y cefndir. Yn y blaen mae rhan o gae'r Oval sydd yng nghanol cael ei lefelu fel rhan o gynllun uwchraddio ac mae tomen o bridd yng nghornel chwith gwaelod y llun.

Mae'n fwriad i ddyblu nifer y seddi ym maes yr Oval yng Nghaernarfon

Gareth Wyn Williams
Newyddion BBC Cymru

Fe all un o brif feysydd pêl-droed y gogledd weld gwaith uwchraddio pellach dros y misoedd i ddod.

Yn un o'r pedwar maes a fydd yn cynnal pencampwriaeth dan-19 UEFA yr haf hwn, mae gwaith eisoes yn mynd rhagddo i lefelu'r maes a chodi ystafelloedd newid newydd ar yr Oval yng Nghaernarfon.

Ond mae cais cynllunio o'r newydd wedi ei gyflwyno gan y clwb i godi eisteddle newydd.

O ganlyniad byddai nifer y seddi yn y stadiwm yn dyblu o'r 600 presennol i 1,200.

Tractor ar gae'r Oval o flaen y teras ble mae'n fwriad i godi eisteddle newydd

Tractor ar gae'r Oval o flaen y teras ble mae'n fwriad i godi eisteddle newydd

Byddai'r eisteddle, medd y clwb, yn cael ei godi i'r gogledd o'r maes chwarae, ar lecyn sydd ar hyn o bryd yn deras agored.

Dywed y clwb y byddai'r seddi ychwanegol yn eu helpu i gyrraedd gofynion UEFA er mwyn chwarae gemau Cyngres Europa ar yr Oval.

Ddwy flynedd yn ôl bu'n rhaid i'r Cofis chwarae gemau yn erbyn timau Crusaders a Legia Warsaw yn Stadiwm Dinas Bangor gan nad oedd yr Oval yn cyrraedd safonau UEFA.

Mae disgwyl i adran gynllunio Cyngor Gwynedd ystyried y cais yn ystod y misoedd nesaf.

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i [email protected] neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.

Pynciau cysylltiedig