Arbenigwyr yn rhybuddio am ddyfodol ansicr i Goeden Unig Llyn Padarn

Mae'r Goeden Unig wrth Lyn Padarn yn Eryri yn dirnod adnabyddus yng ngogledd Cymru, ond gallai ei hoes ddod i ben yn fuan, yn ôl arbenigwyr.

Mae'r goeden fedwen, a gafodd ei phlannu tua 2010, wedi dod yn gyrchfan boblogaidd i ffotograffwyr ac mae i'w gweld yn gyson ar y cyfryngau cymdeithasol.

Dywedodd Cyngor Gwynedd fod diffyg maetholion yn y pridd a'r ffaith bod y goeden weithiau'n cael ei boddi gan y llyn yn golygu y gallai farw o fewn tua degawd.

Gan fod lleoliad y goeden yn Safle o Ddiddordeb Gwyddonol Arbennig, dolen allanol, nid oes modd ymyrryd i'w diogelu na'i chynnal.

Mae miloedd o gerddwyr a ffotograffwyr yn ymweld â'r safle bob blwyddyn, ac mae sawl tudalen ar gyfryngau cymdeithasol wedi'u neilltuo iddi, gan gynnwys un sydd â 3,500 o aelodau ar Facebook, dolen allanol.

Dywedodd Marc Lock o Fangor fod y Goeden Unig yn le arbennig iawn iddo ef a'i deulu.

"Mae'n lle perffaith i ni eistedd, myfyrio a mwynhau'r golygfeydd godidog.

"Ry' ni'n aml yn mynd i badlfyrddio yno yn ystod misoedd yr haf."

Dywedodd fod yr ardal wedi dod yn noddfa iddo ar ôl i'w wraig brynu camera iddo un Nadolig - mae'n dychwelyd yno'n rheolaidd drwy gydol y tymhorau.

"Dyma'r lle rwy'n mynd pryd bynnag y bydd gen i amser rhydd â fy nghamera wrth law.

"Alla i ddim dychmygu beth fyddwn i'n ei wneud pe bai unrhyw beth trychinebus yn digwydd i'r goeden", ychwanegodd.

Dywedodd Cyngor Gwynedd fod y goeden wedi bod ar y safle ers o leiaf 2010.

Oherwydd prinder maetholion yn y pridd, mae gan goed bedw yn ardal Y Glyn, lle mae'r Goeden Unig yn sefyll, oes gymharol fyr yno, gan fyw fel arfer am tua 30 mlynedd.

Oherwydd erydiad, mae'r goeden weithiau'n cael ei boddi'n rhannol gan y llyn, sy'n cyfrannu at ei hapêl weledol ond hefyd yn lleihau ei hoes ymhellach, yn ôl Cyngor Gwynedd.

Dywedodd y cyngor nad oes unrhyw ymyrraeth weithredol gan wardeiniaid i'w hamddiffyn, a gan fod y goeden ar Safle o Ddiddordeb Gwyddonol Arbennig, nid yw gwaith i atal erydiad pellach yn bosib.

"Rydym yn annog ymwelwyr â'r Glyn i edmygu'r goeden o bell, ac yn gobeithio y bydd y goeden fach wydn hon yma i'w mwynhau am flynyddoedd i ddod."