 Galw am deithio gwyrdd i'r Urdd
 Galw am i Eisteddfodwyr ddefnyddio trafnidiaeth gyhoeddus yng Nghaerdydd rhag tagu'r brifddinas â cheir
Galwodd trefnwyr Eisteddfod yr Urdd yng Nghaerdydd ar Eisteddfodwyr i ddefnyddio trafnidiaeth gyhoeddus yn hytrach na'u ceir er mwyn osgoi problemau traffig dros yr Wyl.
Meddai Huw Llywelyn Davies, Cadeirydd y Pwyllgor Gwaith:
"Mae yna dagfeydd yn y Brifddinas ar y gore y dyddie yma, felly y neges yw rhoi digon o amser i gyrraedd, neu os gellir teithio ar fws neu drên yn hytrach nag mewn ceir, yna gorau oll i bawb!"
Ond ar ôl cyrraedd addawodd y bydd gwledd heb ei hail yn disgwyl y tyrfaoedd.
"Bydd yr holl atyniadau arferol o ran y cystadlu, yr arddangosfeydd a'r gwahanol weithgareddau yno," meddai - a gwedd newydd i brif seremonïau pwysig y prynhawniau.
Oherwydd lleoliad y maes yng nghanol y ddinas ni fydd meysydd parcio pwrpasol.
Cyngor yr Urdd
Mae'r Urdd a Chyngor Caerdydd yn rhybuddio eisteddfotwyr i gychwyn yn ddigon buan er mwyn bod yn siwr o le parcio yn y ddinas.
"Mae nifer o feysydd parcio o fewn tafliad carreg i faes yr Eisteddfod gyda digon o lefydd parcio am brisiau rhesymol.
"Bydd mannau parcio yng Ngerddi Sophia, Rhodfar Gogledd, Mews y Castell, y Ganolfan Ddinesig ac ym meysydd parcio NCP yn Stryd y Brodyr Llwyd, Westgate, a Dumfries, gyda'r rhan fwyaf o'r rhain yn cynnig parcio am ddim ar y dydd Llun a'r dydd Mawrth, gwyliau'r banc," meddai llefarydd.
Y cyngor i bobl o gyffiniau Caerdydd a'r Fro yw defnyddio bysus a threnau er mwyn cyrraedd prif fynedfa'r maes ar Rodfar Gogledd.
Bydd mannau priodol ar gael i barcio beics hefyd wrth brif fynedfa'r Eisteddfod.
Ar gyfer rhai sy'n mynychu rhagbrofion bydd meysydd parcio arbennig ar gael yn Stadiwm Athletau Leckwith gyda gwasanaeth bysiau wennol i Ysgol Fitzalan a maes yr Eisteddfod.
Hefyd, bydd y gwasanaeth ar gael i gystadleuwyr a chefnogwyr yn aros yn y ddinas, i'w cludo o Rodfa Brenin Edward VII i Ysgol Fitzalan ac yn ôl i faes yr Eisteddfod.
Bydd y gwasanaeth bysiau wennol yn rhedeg rhwng 7.00 y bore a 7.00 yr hwyr bob dydd.
Bydd safle parcio i fws preifat pob ysgol sy'n teithio i'r rhagbrofion. Yn dilyn y rhagbrawf anogir pob ysgol i deithio i faes yr Eisteddfod ar eu bws eu hunain yn hytrach na defnyddior bws wennol.
Bydd safle parcio ar gael ar eu cyfer yn Rhodfa Brenin Edward VII a bydd modd i fysiau tripiau preifat barcio yma hefyd.
|
