 Radio Cymru yn achub drama rhag y llwch
 Mae Radio Cymru wedi achub drama oedd wedi ei thynghedu i hel llwch ar silff. Mae'r orsaf radio hefyd yn cynnig sbardun ychwanegol i ymgeiswyr cystadleuaeth medal ddrama yr Urdd yn 2003.
Wrth roi'r fedal i Lowri Huws ddydd Mercher cwynodd un o'r beirniaid, Jeremy Turner, nad yw dramâu rhagorol fel un Lowri yn y gystadleuaeth eleni yn cael eu llwyfannu.
A dywedodd Lowri ei hun nad oedd yn obeithiol gweld ei drama fuddugol yn cael ei llwyfannu gan ychwanegu fod pob drama yn anghyflawn heb berfformiad.
Y diwrnod wedi'r gystadleuaeth, fodd bynnag, cynigiodd BBC Radio Cymru nid yn unig ddarlledu cynhyrchiad radio o ddrama Lowri ond hefyd y ddwy arall a ddaeth i frig y gystadleuaeth.
Meddai Aled Glynne Davies, Golygydd Radio Cymru:
"Rydyn yn awyddus i gydweithio â dramodwyr ifanc y tair drama orau yn y gystadleuaeth eleni er mwyn creu addasiadau radio o'r dramâu hynny.
"Ac er mwyn dangos ein cefnogaeth i'r gystadleuaeth rydym yn awyddus i greu fersiynau radio o'r tair drama orau yn yr Urdd y flwyddyn nesaf hefyd.
"Rwyn gobeithio y bydd hyn nid yn unig yn rhoi hwb i'r gystadleuaeth ond hefyd yn creu raglenni a fydd yn plesio llawer iawn o wrandawyr Radio Cymru."
Disgrifiodd Menna Richards, Rheolwr BBC Cymru, hyn fel arwydd pellach o'r bartneriaeth rhwng BBC Cymru a'r Urdd yn mynd o nerth o nerth.
"Rydym yn falch iawn o roi llwyfan i ddoniau disglair yr Urdd," meddai.
Croesawyd cyhoeddiad y BBC gan yr Urdd. "Rydyn yn hynod o falch fod Radio Cymru wedi gwneud y cyhoeddiad yma heddiw," meddai Sian Eirian, Cyfarwyddwr Eisteddfod a Chelfyddydau'r Urdd.
"Rydyn ni yn ddiolchgar am y cydweithrediad arbennig rydyn ni yn ei dderbyn ddeuddeng mis y flwyddyn gan Radio Cymru. Rydyn ni wedi gallu cydweithio hefyd i sicrhau llwyfan deinamig llawn bwrlwm ar gyfer y cystadlaethau roc."
|
