 Comisiynydd Ewrop yn plesio'r Urdd
 Ddiwrnodau cyn i Gomisiynydd Addysg a Diwylliant Ewrop gyrraedd Maes yr Eisteddfod yr oedd yr Urdd yn rhoi'r pwys mwyaf ar ei hymweliad a'r Wyl.
Hyd yn hyn dyma yn sicr yr ymweliad pwysicaf â'r Wyl ac yr oedd y Comisiynydd, Viviane Reding, hyd yn oed cyn rhoi ei throed ar Coopers Field wedi bod yn dweud y pethau 'iawn' am yr Urdd yn disgrifio'r mudiad fel un "vibrant" a chyffrous.
O arwyddocad pellach ydoedd ei diddordeb mewn ieithoedd bychain a'i gwerthfawrogiad o'u pwysigrwydd.
Y mae hi ar hyn o bryd yng nghanol ffrae Ewropeaidd ynglyn â'r hawl i wario ar yr ieithoedd hyn ac er iddi neilltuo £640,000 ar gyfer eleni all hi ddim cael ei dwylo ar yr arian oherwydd gwrthwynebiad Ffrainc a Groeg.
Ond osgodd son am y pethau hyn ar Faes yr Urdd dim ond ail-gadarnhau ei chefnogaeth gyffredinol i ieithoedd bychain er ei bod hi yn bersonol yn ymwrthod a defnyddio geiriau fel mawr a bach wrth son am ieithoedd.
Ond mi ddywedodd, "Yr iaith bwysicaf yw'r famiaith - i mi, dyma'r iaith bwysicaf yn y byd," meddai.
Y mae hi ei hun yn siarad Lwcswmbergeg a siaredir gan ddim ond 250,000 o bobl.
Wedi cyrraedd maes yr Eisteddfod parhaodd ei chanmoliaeth o'r mudiad gan ddweud mai'r hyn a'i gwefreiddiai hi oedd y ffordd y mae'r Cymry yn gwarchod eu gwreiddiau.
Ac wrth ffarwelio â hi diau fod yr Urdd yn edrych ymlaen at ei gweld gyda'r £640,000 yna yn ei dwylo - ac yn pledu'r Mudiad gyda rhywfaint ohono!
|
