Enillydd cystadleuaeth y delyneg ar y testun 'Cyffwrdd' oedd J. Lewis Jones, Yr Wyddgrug. Gwyneth Owen, Pwllheli enillodd yr englyn ar y testun 'Troi' a Menna Medi, y Groeslon ddaeth i'r brig ar y gân rydd ar y testun Ffordd.

Gallwch weld holl ganlyniadau 2007 drwy lawrlwytho dogfen Word yma.

Cefndir
Eisteddfod i bobl ifanc oedd yr eisteddfod yma i ddechrau. Cynhaliwyd y gyntaf ar nos Wener, 14 Mai 1971, yn y neuadd bentref. Mrs Doris Lloyd Roberts a Mrs Magi Baum oedd yr ysgrifenyddion, ac mae Mrs Baum yn dal i fod yn gysylltiedig â'r eisteddfod heddiw gan mae hi yw'r cadeirydd. Hefyd mae Mrs Roberts a'i theulu yn rhoi cwpan i enillydd y gystadleuaeth canu emyn i rai dros 55 oed er cof am ei rhieni ym mhob eisteddfod.

Ychydig flynyddoedd yn ddiweddarach, gan ei bod mor boblogaidd, fe ddaeth i gael ei chynnal ar y nos Iau hefyd, gyda'r cystadlu yn mynd ymlaen tan oriau mân y bore. Yn yr wythdegau yr oedd yr eisteddfod ar nos Wener a nos Sadwrn ac yn y nawdegau symudodd i brynhawn a nos Sadwrn. Mae'r eisteddfod rŵan yn cael ei chynnal ar ail Sadwrn mis Mai.

Yr arweinyddion am flynyddoedd oedd Mr William Pritchard, Caernarfon a Mr Hywel Parry, y Groeslon, ac wedyn daeth Mr Richard Parri Huws, Llwyndyrus a Mr Ifan Jones Davies, Llanllyfni. Y cyfeilyddion oedd Mrs Sioned Webb, Rhiwlas a Mrs Annette Bryn Parri, Deiniolen ac am y pymtheg mlynedd diwethaf, Mr Alan Roberts, Morfa Bychan.

Bu Bryn Terfel, John Eifion a Cefin Roberts yn cystadlu yn yr eisteddfod yn eu tro.