Glaw
Dal llid, a dal i stido, - bwrw sen,
Bwrw swyn hen wylo.
Gwragedd syn a'u ffyn, ar ffo,
Am wyllt daith yn melltithio.

TELYNEG
Arthur Evans, Chwilog

Ton
Fuost ti ar fin y morglawdd
 drycinog fôr a'i hwrdd?
Hithau'r don yn torri'n ewyn
Lle doi môr a thir i gwrdd.

Dos i'r morglawdd pan fo'n dawel,
Odid yno clywi'n glir
Don ar draeth a'i llepian llawen
Lle bu gynt yn chwipio'r tir.

CAN RYDD
T. Graham Williams, Cwm Tawe
Rhodd (er cof am Heddwyn Williams)
Cliciwch yma i lawrlwytho'r gerdd mewn dogfen Word

LLINELL GOLL
Pan fydd dail y coed yn dihoeni
Bydd ysgol Brynaerau eleni
Mor iach ag erioed
A hithau'n gant oed
. . . . . . .

Ai gwir y caiff neges gan Lisi?
Mae'n siampl i'r oes sydd ohoni.
A'r addysg yn gyfoes o'i mewn hi.
Rhag ei chau, ymgyrchwn o ddifri.
J. Lewis Jones, Yr Wyddgrug

Boed i bawb yn y fro ei chefnogi.
Dewch draw yn ddioed,- mae 'na barti.
"Penblwydd hapus" medd plant a rhieni.
Valmai Williams, Aberdesach.

Llongyfarchion twymgalon sydd iddi.
Cant arall, gobeithio, o'i blaen hi.
Cymraeg iach, llond ceg, glywir ynddi.
Ein cyfoeth adleisia'n y meini.
Ann Wyn Owen, Rhoscolyn

Yr enillydd:

Crud addysg fy mhlant a'm rhieni.
Ann Wyn Owen, Rhoscolyn