| Cwpan Davis yw'r brif gystadleuaeth timau i ddynion gyda 137 o wledydd - gan gynnwys Prydain - yn cymryd rhan. Ac mae Tennis Cymru yn awyddus i lwyfannu un o gemau Prydain am y tro cyntaf yma yng Nghymru. "Fe fyddem yn defnyddio hyn er mwyn ennyn diddordeb mewn tennis," medd y prif weithredwr Tennis Cymru Peter Drew. Ychwanegodd Drew bod trafodaethau anffurfiol eisoes wedi eu cynnal gyda Llywodraeth y Cynulliad a'r LTA ynglŷn â denu Cwpan Davis i Gymru. Mae Birmingham, Lerpwl, Eastbourne, Glasgow a Llundain wedi cynnal gemau yng Nghwpan Davis yn ystod y blynyddoedd diwethaf. Mae Stadiwm y Mileniwm yng Nghaerdydd a'r Celtic Manor yng Nghasnewydd wedi eu crybwyll fel dau leoliad posib ar gyfer y Cwpan Davis yng Nghymru.
 | 
