Y Cymro Andy Bracek, cyn-flaenwr St Helens a Warrington, yw'r diweddaraf i ymuno gyda'r clwb o Wrecsam ar gytundeb 18 mis. Diwrnod yng nghynt, arwyddodd Jordan Tansey gytundeb cyffelyb. Cafodd y cefnwr ei ddiswyddo gan Hull ar drothwy'r tymor yma ar ôl torri rheolau disgyblaeth y clwb am y trydydd tro mewn 12 mis. Mae Bracek wedi bod yn chwarae i Barrow yn y Bencampwriaeth yn ddiweddar, ond does dim disgwyl iddo fod yn holliach i wisgo crys y Crusaders am ddau fis oherwydd anaf i'w ben-glin. "Mae Andy yn ychwanegiad gwych i ni," dywedodd hyfforddwr y Crusaders Iestyn Harris. "'Dw i wedi gweithio gyda fo yng ngharfan Cymru ac mae o'n chwaraewr cryf sy'n gallu cael gwared â'r bêl yn y dacl. "'Da ni'n brin o chwaraewr ail-reng ar hyn o bryd felly mi fydd Andy yn ychwanegu maint a phŵer i'r pac." Mae'r Crusaders ar waelod y Super League ar hyn o bryd ar ôl colli pum gêm yn olynol yn dilyn y fuddugoliaeth agoriadol.
 | 
