Llwyddodd y tîm o Wrecsam i gadw'r gêm yn ddi-sgôr am yr 20 munud cyntaf, ond gwobrwywyd pwysau Huddersfield o'r diwedd wrth i Shaun Lunt sgorio cais cyntaf y gêm. Ond tarodd yr ymwelwyr yn ôl bron yn syth wrth i Jarred Sammut groesi wedi camgymeriad Luke Robinson. Ond gwnaeth Robinson yn iawn am hynny wrth greu cais i Stephen Notch ac yna un i Jermaine McGillvary. Roedd y fuddugoliaeth yn ddiogel yn fuan yn yr ail hanner pan groesodd Michael Lawrence am bedwerydd cais Huddersfield. Sgoriodd Weller Hauraki gais gysur i'r Crusaders, ond manteisiodd y tîm cartref ar ddau gamgymeriad arall i sgorio dau gais hwyr.
 | 
