| Ar ôl trechu Casnewydd o 1-0 ddydd Sul, mae'r Dreigiau yn bedwerydd yn Uwchgyngynghrair Blue Square Bet ac yn gobeithio am le yn y gemau ail-gyfle. "Ni allem arwyddo chwaraewyr nes ein bod wedi talu rhai biliau, felly mae fy nwylo wedi eu clymu ar y foment," meddai Saunders. "Mae pawb arall lan tua'r brig yn cryfhau, ond ni fyddwn yn gwneud ac mae hynny yn creu dipyn o broblem i mi." Mae Ymddiriedolaeth Cefnogwyr Wrecsam eisiau prynu'r clwb ac wedi ymuno gyda'r wraig fusnes lleol Stephanie Booth i wneud cais. Mae'r cyfarwyddwyr presennol wedi gwadu honiadau gan Mrs Booth bod y clwb ar fin mynd i ddwylo'r gweinyddwyr. Ac o ganlyniad mae'r clwb wedi dod a thrafodaethau gyda Mrs Booth ynglyn a phrynu'r clwb i ben am y tro. Ychwanegodd Saunders nad oedd y "syrcas" yn ymwneud a pherchnogaeth y clwb yn ei effeithio ond bod y cyfyngiadau trosglwyddo yn ergyd. "Mae'n broblem," meddai Saunders. "'Dwi'n meddwl y dylen ni fod yn cryfhau'r tîm oherwydd ein bod mewn safle. "Dyma'r amser y gallen wario ychydig o bres oherwydd os gwnawn ni sicrhau lle yn y gemau ail-gyfle yna bydd hynny'n denu torfeydd mawr ac yn talu cyflogau'r chwaraewyr."
 | 
