စပိန် အသက်အကြီးဆုံး အမျိုးသမီး ကိုရိုနာကနေ လွတ်မြောက်

စပိန်မှာ အသက်အကြီးဆုံးလို့ ယူဆရတဲ့ အသက် ၁၁၃ နှစ် အမျိုးသမီးကြီးဟာ ကိုရိုနာဗိုင်းရပ်စ် ကူးစက်ခံရမှုကနေ ပြန်လည် နေကောင်းသက်သာ လာတယ်လို့ တာဝန်ရှိသူတွေက ပြောပါတယ်။

ပြီးခဲ့တဲ့ မတ်လတုန်းက စပိန်မှာ လော့ခ်ဒေါင်းလုပ်ထားချိန်မှာ မာရီယာ ဘရာညာဟာ ကိုဗစ်-၁၉ ကူးစက်ခံထားရတာကို စစ်ဆေး တွေ့ရှိခဲ့ရတာပါ။

သူ့မှာ ကိုရိုနာဗိုင်းရပ်စ် လက္ခဏာ အနည်းငယ်ပဲပြခဲ့ပြီး တပတ်လောက် သီးခြားခွဲနေထိုင်ပြီးချိန်မှာတော့ ပြန်လည် သက်သာသွားပြီ ဖြစ်ပါတယ်။

သူ့ဟာ ၁၉၁၈ ခုနှစ်ကနေ ၁၉၁၉ ခုနှစ် အထိ ဖြစ်ပေါ်ခဲ့တဲ့ စပိန်တုပ်ကွေး၊ ပြီးတော့ ၁၉၃၆ ကနေ ၁၉၃၉ ခုနှစ် ဖြစ်ခဲ့တဲ့ ပြည်တွင်းစစ်နဲ့ အခုတစ်ခါ ဖြစ်ခဲ့တဲ့ ကိုရိုနာ ကမ္ဘာ့ ကပ်ရောဘေးကြီးတို့ကနေ လွတ်မြောက်ခဲ့တာ ဖြစ်ပါတယ်။

“မာရီယာဟာ အခုတော့ နေကောင်းကျန်းမာနေပါပြီ။ သူဟာ တကယ့်ကို အံ့မခန်းပါပဲ။ စကားပြောချင်နေတယ်။ သူသတိရတာတွေကို ပြန်ရှင်းပြချင်နေပြီး ဒါမှမာရီယာပါပဲလို့" သမီး ဖြစ်သူက တွစ်တာ လူမှုကွန်ရက်မှာ ရေးသားခဲ့ပါတယ်။

မရီယာကို ၁၉၀၇ ခုနှစ်က မက္ကစီကိုနိုင်ငံမှာ မွေးဖွားခဲ့ပါတယ်။ နောက်တော့ ဆန်ဖရန်စ္စကို ကိုပြောင်းရွှေ့နေထိုင်ခဲ့ပြီး နောက်၂နှစ် အကြာ ပထမကမ္ဘာစစ် ကာလအတွင်းမှာ တော့ စပိန်နိုင်ငံ ကတ်တလန်ပြည်နယ်က ဂျီရိုနာကို ဖခင်ဖြစ်သူ စပိန် သတင်းထောက်နဲ့ အတူရောက်ရှိခဲ့တာပါ။

မရီယာမှာ သားသမီး သုံးယောက်ရှိပြီး တစ်ယောက်က မကြာခင်ကမှ အသက် ၈၆ နှစ်ပြည့်ခဲ့ပါတယ်။ သူ့မှာ မြေး ၁၁ယောက် ရှိပြီး အသက်အကြီးဆုံးက အသက် ၆၀ ရှိပြီ ဖြစ်ပါတယ်။ မြစ် ၁၃ ယောက်လည်း ရှိပါတယ်။

စပိန်နိုင်ငံ အိုလော့မြို့က ဘိုးဘွားစောင့်ရှောက်ရေး ဂေဟာမှာ နှစ်၂၀ ကျော်နေထိုင်နေပါတယ်။

သူ့အနေနဲ့ အသက်ရှင်နေထိုင်ရုံကလွဲပြီး ကျန်တာဘာမှ မလုပ်ခဲ့ဘူးလို့လည်း သူက စပိန် သတင်းစာလာ ဗန်ဂါးဒီးယားကို ပြောဆိုခဲ့ပါသေးတယ်။