အောက်တိုဘာ ၄ ရက် သတင်းများအနှစ်ချုပ် - ရခိုင်၊ကျောက်ဖြူတဝိုက်ကို စစ်တပ်ကလေကြောင်းတိုက်ခိုက်နေ

ရခိုင်ပြည်နယ်၊ ကျောက်ဖြူမြို့နယ်ထဲက စနဲဒေသတဝိုက်ကို မနေ့ညသန်းခေါင်ချိန်ကစလို့ ဒီနေ့ မနက်အစောပိုင်းအထိ မြန်မာစစ်တပ်က လေကြောင်းနဲ့ဆက်တိုက်ဗုံးကြဲတိုက်ခိုက်နေတယ်လို့ အာရက္ခတပ်တော် (အေအေ) ရဲ့ စစ်ရေးရင်းမြစ်ဆီက သိရပါတယ်။

တံတားဦးလေတပ်ကတက်လာတဲ့ ဂျက်ဖိုက်တာ ၃ စီး၊ နေပြည်တော်လေတပ်က တက်လာတဲ့ ဂျက်ဖိုက်တာ ၃ စီး၊ မကွေးလေတပ်က တက်လာတဲ့ ဂျက်ဖိုက်တာ ၂ စီးတို့ကိုသုံးပြီး ည ၁၁ နာရီခွဲ အချိန်မှာရော ဒီနေ့ မနက် ၆ နာရီဝန်းကျင်မှာပါ လေကြောင်းတိုက်ခိုက်မှုတွေလုပ်ခဲ့တာလို့ စစ်ရေးရင်းမြစ်ကတဆင့် သိရပါတယ်။

"ကျောက်ဖြူမှာတိုက်ပွဲပြန်ပြင်းထန်နေတယ်။ လေကြောင်းကလည်းပြင်းပြင်းထန်ထန်တိုက်ခိုက် နေတာ ၃ ရက်လောက်ရှိပြီ" လို့ အေအေစစ်ရေးရင်းမြစ်က ပြောပါတယ်။

အဝတောင်စခန်း၊ တောင်မော်ဦး(ကြီး) ကာကင်းစခန်း နေရာသုံးခုထက်မနည်းပတ်ဝန်းကျင်မှာ အေအေနဲ့ စစ်တပ်ကြား မနေ့ကစလို့ တိုက်ပွဲပြန်ပြင်းထန်နေတာလို့ ဒေသအခြေစိုက် သတင်းဌာနတွေမှာလည်း ဖော်ပြပါတယ်။

စက်တင်ဘာ ၂၈ ရက်က ကျောက်တော်မြို့အိန္ဒိယဈေးနဲ့ ကစ္ဆပနဒီတံတားအနီးကို လေကြောင်းဗုံးကြဲလို့ လူ ၅၀ အစုလိုက်အပြုံလိုက်သေဆုံးပြီးနောက် တစ်နေ့ကို ၂ မြို့နယ်ထက် မနည်း စစ်တပ်ကလေကြောင်းဗုံးကြဲနေကြောင်း အေအေရဲ့ ထုတ်ပြန်ချက်အရ သိရပါတယ်။

စက်တင်ဘာ ၃၀ ရက်မှာ ပုဏ္ဏားကျွန်းနဲ့ ပေါက်တော၊ အောက်တိုဘာ ၁ ရက်မှာ ကျောက်တော်နဲ့ သံတွဲ၊ အောက်တိုဘာ ၂ ရက်မှာ ပုဏ္ဏားကျွန်းနဲ့ ရသေ့တောင်တို့ကို ဗုံးကြဲတိုက်ခိုက်ခဲ့လို့ အရပ်သား ထိခိုက်သေဆုံးမှုတွေရှိကြောင်း အေအေကထုတ်ပြန်ထားပါတယ်။

ရခိုင်ပြည်နယ်ထဲက လေကြောင်းတိုက်ခိုက်မှုတွေလုပ်လို့ ထိခိုက်သေဆုံးမှုတွေကို စိုးရိမ်ပူပန်ကြောင်းနဲ့ မြန်မာကိုအကောင်းဆုံးကူညီပေးနိုင်ဖို့အတွက် ဒေသတွင်း အဖွဲ့ဝင်နိုင်ငံတွေကြား ဆွေးနွေးနိုင်အောင်ဆောင်ရွက်ပေးဖို့ အဆင်သင့်ရှိကြောင်း အာဆီယံ အလှည့်ကျဥက္ကဋ္ဌ ဖိလစ်ပိုင်နိုင်ငံက ပြောလာပါတယ်။

မြန်မာကဖြစ်စဉ်တွေကို အနီးကပ်စောင့်ကြည့်နေကြောင်း ဖိလစ်ပိုင်နိုင်ငံခြားရေးဝန်ကြီးဌာနက မနေ့ အောက်တိုဘာ ၃ ရက်မှာ ထုတ်ပြောခဲ့တာပါ။

မြန်မာစစ်တပ်ရဲ့ ကျောက်တော်က အစုလိုက်အပြုံလိုက်လေကြောင်းတိုက်ခိုက်မှုဖြစ်စဉ်နဲ့ ပတ်သက်လို့ ကုလသမဂ္ဂရော နိုင်ငံတကာနဲ့ ပြည်တွင်းလူ့အခွင့်အရေးစောင့်ကြည့်ရေးအဖွဲ့တွေပါ ရှုတ်ချကြောင်းထုတ်ပြန်ထားပါတယ်။