တိုက်ရိုက်ထုတ်လွှင့်မှု, ကိုးကန့်ဒေသက မြီအိမ်မိသားစုဝင်တွေအပါအဝင် ၁၁ ဦးကို တရုတ် သေဒဏ်ပေး

တိုက်ရိုက် ထုတ်လွှင့်ချက်

1. လွန်ခဲ့သော ၁၁ မိနစ် ကကမ္ဘာ့ရွှေစျေး တဟုန်ထိုးတက်လို့ မြန်မာ့ရွှေစျေး တစ်ကျပ်သား သိန်း ၁၂၀ နားကပ်လာ

   ကမ္ဘာ့ရွှေဈေးတစ်အောင်စကို အမေရိကန်ဒေါ်လာ ၅,၅၀၀ ကျော်နဲ့ အမြင့်ဆုံးကို စျေးရောက်လာချိန်မှာ မြန်မာရွှေဈေးက ဇန်နဝါရီ ၂၉ ရက်မှာ ညနေပိုင်း စျေးကွက်ပိတ်စျေးက ပြင်ပ‌ပေါက်စျေး ၁၆ ပဲရည် တစ်ကျပ်သားကို ၁၁၈ သိန်း ကျပ်နဲ့‌ စျေးပိတ်သွားတယ်လို့ ရွှေစျေးကွက်အသိုင်းအဝိုင်းဆီက သိရှိရပါတယ်။

   မနေ့က အပိတ်စျေးက ၁၆ ပဲရည် တစ်ကျပ်သားကို ၁၀,၈၅၀,၀၀၀ သိန်း(တစ်ရာ့ရှစ်သိန်းငါးသောင်း)ကျပ်ဖြစ်လို့ တစ်ရက်အတွင်း ကျပ် ၁၀ သိန်းစျေးခုန်တက်သွားတာဖြစ်ပြီး တစ်ပတ်အတွင်းမှာ ကျပ်သိန်း ၁၂၀ နားကပ်စျေးရောက်လာတာဖြစ်ပါတယ်။

   ထိုင်းရွှေဈေးလည်းတက်နေပြီး လက်ရှိဒေသတွင်း ရွှေဈေးဟာ ကမ္ဘာ့ရွှေဈေးနဲ့ဆက်စပ်ပြီး မြန်မာရော ထိုင်းမှာပါ စံချိန်တင်မြင့်တက်လာတာ ဖြစ်ပါတယ်။

   ဒီကနေ့ညနေပိုင်းကမ္ဘာ့ရွှေစျေးကတော့ တစ်အောင်စကို အမေရိကန်ဒေါ်လာ ၅,၅၀၀ ကျော်အထိ စျေးပေါက်ပြီး စံချိန်တင်အမြင့်ဆုံးဖြစ်လာနေတာပါ။

   ရန်ကုန်တိုင်းဒေသကြီးရွှေလုပ်ငန်းရှင်အသင်းကတော့ ဒီကနေ့ ဇန်နဝါရီ ၂၉ ရက်မှာ ၁၆ ပဲရည်တစ်ကျပ်သားကို တရားဝင်စျေး ၆၁ သိန်းနဲ့ စျေးဖွင့်ထားပါတယ်။

2. လွန်ခဲ့သော ၅၁ မိနစ် ကသတင်းထူး, အာဆီယံတစ်ဖွဲ့လုံးအနေနဲ့ မြန်မာရွေးကောက်ပွဲကို အသိအမှတ်မပြုသေးဘူးလို့ဆို

   အာဆီယံအဖွဲ့ကြီးတစ်ဖွဲ့လုံးအနေနဲ့ မြန်မာ့ရွေးကောက်ပွဲကို လောလောဆယ်အထိ အသိအမှတ်မပြုသေးဘူးလို့ အာဆီယံအလှည့်ကျဥက္ကဋ္ဌ ဖိလစ်ပိုင်နိုင်ငံခြားရေးဝန်ကြီး ထရီဇာ လာဇရိုက ပြောလာပါတယ်။

   ဖိလစ်ပိုင်နိုင်ငံ၊ စီဘူးမြို့မှာ ပြုလုပ်ခဲ့တဲ့ အာဆီယံ နိုင်ငံခြားရေးဝန်ကြီးတွေ အစည်းအဝေးပွဲပြီး သတင်းစာရှင်းလင်းပွဲမှာ သတင်းထောက်တွေရဲ့ မေးခွန်းကို ပြန်လည်ဖြေကြားချိန် သူက အခုလို ပြောလိုက်တာဖြစ်ပါတယ်။

   ''လောလောဆယ်အထိတော့ အာဆီယံအဖွဲ့ကြီး တစ်ဖွဲ့လုံးအနေနဲ့ မြန်မာ့ရွေးကောက်ပွဲကို ထောက်ခံကြောင်း သဘောတူညီချက် မရရှိသေးပါဘူး။ ဒီအကြောင်းဆွေးနွေးခဲ့တာရှိပေမဲ့ ဘုံသဘောတူညီချက် တစ်ရပ်ရပ် ထုတ်နိုင်လောက်တဲ့အထိ မဖြစ်နိုင်ခဲ့ဘူး'' လို့ သူက ပြောပါတယ်။

   မြန်မာမှာ ပြီးခဲ့တဲ့သီတင်းပတ်တွေအတွင်းလုပ်ခဲ့တဲ့ ရွေးကောက်ပွဲကို အသိအမှတ်ပြုလိုတဲ့ အာဆီယံအဖွဲ့ဝင်နိုင်ငံအချို့ရှိနေတယ်လို့ သူက ပြောသွားခဲ့ပေမဲ့ ဘယ်နိုင်ငံရယ်လို့ တိတိကျကျ မပြောသွားပါဘူး။

   နောက်ပြီး နေပြည်တော်က မြန်မာစစ်ခေါင်းဆောင်တွေကို အသိအမှတ်မပြုတဲ့ အာဆီယံရဲ့ ရပ်တည်ချက်ကို အာဆီယံအဖွဲ့ကြီးအတွင်းမှာ ဆက်ရှိနေဆဲလို့လည်း သူက ထပ်လောင်းပြောသွားပါတယ်။

   ဖိလစ်ပိုင်နိုင်ငံခြားရေးဝန်ကြီးက အခုလဆန်းပိုင်းအတွင်း နေပြည်တော်ကို သွားခဲ့တဲ့ သူ့ခရီးစဉ်ဟာ အာဆီယံ အလှည့်ကျ ဖိလစ်ပိုင်နိုင်ငံရဲ့ မြန်မာနိုင်ငံဆိုင်ရာအထူးသံတမန်ရာထူးအနေနဲ့ သွားခဲ့တာဖြစ်ပြီး ဒါဟာ နေပြည်တော်ရဲ့အသံကို နားဖို့နဲ့ သက်ဆိုင်ရာ တွေသင့်တွေ့ထိုက်သူ ပြောသင့်ပြောထိုက်သူတွေနဲ့ တွေ့ဆုံ ပြောဆိုဖို့ ကြိုးပမ်းတာလို့လည်း ပြောထားပါတယ်။

3. လွန်ခဲ့သော တစ်နာရီ ကတရုတ်က ဗြိတိန်ကို ရက် ၃၀ ဗီဇာကင်းလွတ်ခွင့်ပြု

   တရုတ်က ဗြိတိန်နိုင်ငံသားတွေကို ရက်ပေါင်း ၃၀ ကြာ ပြည်ဝင်ခွင့် အခမဲ့ပေးလိုက်ပြီလို့ ဗြိတိန်ဝန်ကြီးချုပ် ကီယာ စတားမာက ကြေညာပါတယ်။

   တရုတ်နိုင်ငံ၊ ဘေကျင်းမြို့ကို ရောက်နေချိန်မှာ အခုသဘောတူညီချက်သတင်းကို ထုတ်ပြန်တာဖြစ်ပါတယ်။

   ဗြိတိန်ဝန်ကြီးချုပ်ဟာ ၃ ရက်ကြာ ခရီးစဉ်အဖြစ် ဘေကျင်းမြို့ကို မနေ့ကတည်းက ရောက်နေတာဖြစ်ပါတယ်။

   ဒီနေ့မှာတော့ သူနဲ့ တရုတ်သမ္မတတို့ တွေ့ဆုံခဲ့ကြပြီး သဘောတူညီချက်တွေကို လက်မှတ်ရေးထိုးထားပါတယ်။

   ဒီအတောအတွင်းမှာပဲ ဗြိတိန် အခြေစိုက်ဆေးဝါးထုတ်လုပ်ငန်းကြီး အက်စထရာ ဇနီကာက တရုတ်မှာ ဒေါ်လာ သန်းပေါင်း တစ်သောင်းခွဲအထိ ရင်းနှီးမြှုပ်နှံမယ်လို့ ကြေညာလာပါတယ်။

   ဗြိတိန်ဝန်ကြီးချုပ်တော့ ဗြိတိန်နဲ့ တရုတ်ကြားက ဆက်ဆံရေးဟာ ခိုင်မာ အားကောင်းတဲ့အဆင့်မှာရှိနေတယ်လို့ဆိုပြီး တရုတ်သမ္မတရှီကျင့်ဖျင်နဲ့တွေ့ဆုံအပြီးမှာ ပြောထားပါတယ်။

   သမ္မတ ရှီကျင့်ပင်ကတော့ ဗြိတိန်နဲ့ဆက်ဆံရေးဟာ အချိုးအကွေ့တွေ ရှိခဲ့ပေမဲ့ သံခင်းတမန်ခင်း ထိတွေ့ဆက်ဆံပြောဆိုရေးဟာ ရှောင်လွဲလို့မရတဲ့အရာလို့ မှတ်ချက်ပေးပါတယ်။

4. လွန်ခဲ့သော ၂ နာရီ ကနိုင်ငံရေး၊ စစ်ရေးကြောင့် မင်္ဂလာပွဲမလုပ်ဖြစ်သူတွေကို KIO/KIA က စုပေါင်းမင်္ဂလာပွဲလုပ်ပေး

   KIA ထိန်းချုပ်နယ်မြေထဲရောက်ရှိနေပြီး နိုင်ငံရေး၊ စစ်ရေးအခြေအနေတွေကြောင့် ထိမ်းမြားမင်္ဂလာပွဲ မလုပ်ဖြစ်တဲ့ ဝန်ထမ်း စုံတွဲ ၁၆ တွဲကို ကချင်လွတ်လပ်ရေးအဖွဲ့ / ကချင်လွတ်လပ်ရေးတပ်မတော် (KIO/KIA) က စုပေါင်း လက်ထပ်မင်္ဂလာပွဲ ပြုလုပ်ပေးခဲ့ကြောင်း KIO/KIA သတင်းပြန်ကြားရေးဌာနက ထုတ်ပြန်ပါတယ်။

   အခမ်းအနားကို ဇန်နဝါရီ ၂၇ ရက်က KIO/KIA ရဲ့ အုပ်ချုပ်ရေးနယ်မြေ ၃ ခုထဲက တစ်ခုဖြစ်တဲ့ မြောက်ပိုင်းတိုင်းအုပ်ချုပ်ရေးနယ်မြေမှာ ကျင်းပခဲ့တာလို့ ဆိုပါတယ်။

   စုပေါင်း လက်ထပ်မင်္ဂလာပွဲကို KIO/KIA မြောက်ပိုင်းတိုင်းအုပ်ချုပ်ရေးအဖွဲ့ဝင်တွေ၊ တာဝန်ရှိသူတွေ၊ ရပ်မိရပ်ဖတွေ တက်ရောက်ခဲ့ကြပါတယ်။

   KIO/KIA က အရင်ကလည်း နိုင်ငံရေး၊ စစ်ရေးကြောင့် မင်္ဂလာ လက်ထပ်ပွဲ မလုပ်နိုင်တဲ့ တပ်ဖွဲ့ဝင်တွေ၊ ဝန်ထမ်းတွေကို အခုလိုမျိုး လက်ထပ်ပေးတဲ့ပွဲတွေ ပြုလုပ်ခဲ့ဖူးပါတယ်။

5. လွန်ခဲ့သော ၂ နာရီ ကမယ်စဲ့ထောင်က ထွက်ပြေးစစ်သုံ့ပန်းတွေ အချိန်သုံးလကြိုတင်ပြင်ဆင်ခဲ့- IEC

   ကရင်နီ (ကယား)က ကရင်နီတော်လှန်ရေးအင်အားစုတွေထိန်းချုပ်တဲ့ မယ်စဲ့အကျဉ်းထောင်က ထောင်ဖောက်ပြေးတဲ့ စစ်သုံ့ပန်းတ္ပေဟာ အချိန် သုံးလခန့် ယူပြီးကြိုတင်ပြင်ဆင်ခဲ့ကြတယ်လို့ ကရင်နီကြားကာလအုပ်ချုပ်ရေးကောင်စီ (IEC) တရားရေးဌာနက ဇန်နဝါရီ ၂၉ ရက်မှာ ထုတ်ပြန်ပါတယ်။

   ထောင်ဖောက်ပြေးခဲ့တဲ့ အကျဉ်းသားတွေထဲက တချို့က အဲဒီလို ထွက်ဆိုခဲ့တာလို့ IEC တရားရေးဌာနက ပြောပါတယ်။ ဇန်နဝါရီ ၁၈ ရက်က ကရင်နီနဲ့ ထိုင်းနယ်စပ်က ကရင်နီကြားကာလအုပ်ချုပ်ရေးကောင်စီ (IEC) အုပ်ချုပ်တဲ့ မယ်စဲ့အကျဉ်းထောင်ကနေ စစ်သုံ့ပန်း ၈၀ ဦး အပါ ၈၃ ဦးက လက်နက်ငယ် ၉ လက် နဲ့ ထွက်ပြေးလွတ်မြောက်သွားတယ်လို့ IEC က ထုတ်ပြန်ခဲ့တာပါ။

   အဲဒီထဲမှာ စစ်သုံ့ပန်း ၇၆ ဦး၊ ထောင်ဝန်ထမ်း ၂ ဦး၊ မူးယစ်ဆေးအမှုနဲ့ထောင်ကျနေသူ ၅ ဦးပါဝင်တယ်လို့ ထုတ်ပြန်ချက်မှာဖော်ပြပါတယ်။ထောင်ဖောက်ပြေးပြီးတဲ့အခါ ၈ ယောက်ကနေ ၁၀ ဦးတစ်အုပ်စီ အုပ်စုဖွဲ့လှုပ်ရှားဖို့ စီစဉ်ခဲ့ပြီး ထိုင်းနိုင်ငံကို ‌ရောက်တဲ့အခါ စုရပ်နေရာသတ်မှတ်ထားပြီး အချင်းချင်းဆက်သွယ်ဖို့ ဖုန်းဆင်းကတ်တွေလည်း ကြိုတင်စီစဉ်ခဲ့တယ်လို့ ဆိုပါတယ်။

   လက်နက်တွေပါသွားတဲ့ အတွက် ထွက်ပြေးတဲ့လမ်းတလျှောက်မှာလည်း ပြန်ခုခံဖို့ အစီအမံတွေ ချမှတ်ခဲ့တယ်လို့ IEC တရားရေးက ထုတ်ပြန်ပါတယ်။ဇန်နဝါရီ ၁၈ ရက် မနက်ပိုင်းမှာတော့ နယ်မြေရှာဖွေရှင်းလင်းရေးလုပ်နေတဲ့ နယ်မြေခံတော်လှန်ရေးတပ်ဖွဲ့တွေနဲ့ လွတ်မြောက်သွားတဲ့ အကျဉ်းသားတွေအကြား နှစ်ဖက်အပြန်အလှန်ပစ်ခတ်မှုတွေဖြစ်ပြီး ၈ ဦး အသေဖမ်းမိခဲ့ပြီး ၂ ဦးကို အရှင်ဖမ်းမိခဲ့တယ်လို့ ဆိုပါတယ်။

   ထောင်ဖောက်ပြေးတဲ့အချိန်ပါသွားတဲ့ လက်နက်ငယ် ၅ လက် နဲ့ ကျည်တချို့ကိုလည်း ပြန်ပြီးသိမ်းဆည်းရမိခဲ့တယ်လို့ ဖော်ပြပါတယ်။ အကျဉ်းသားတွေ လွတ်မြောက်ဖို့ ပူးပေါင်းပါဝင်ခဲ့တဲ့ ထောင်ဝန်ထမ်း ၂ ဦးကို ပြစ်မှုဆိုင်ရာ တရားစွဲ အမှုဖွင့်ထားတယ်လို့ IEC တရားရေးဌာနက ပြောပါတယ်။

   စစ်သုံ့ပန်းတွေဟာ မိုးဗြဲ၊ ဖယ်ခုံကစလို့ ဖားဆောင်းတိုက်ပွဲတွေ အတွင်း ဖမ်းဆီး ရမိထားတဲ့ မြန်မာစစ်ကော်မရှင်တပ်ဖွဲ့တွေ ဖြစ်တယ်လို့ IEC ရဲ့ တွဲဖက်အတွင်းရေးမှူး- ၂ ကိုဗညားက ပြောပါတယ်။

   ထိုင်းနိုင်ငံဘက်ကို ထွက်ပြေးလွတ်မြောက်သွားတဲ့ စစ်သုံ့ပန်းတွေကိုတော့ ထိုင်းအာဏာပိုင်တွေက ဇန်နဝါရီ ၂၇ က မြန်မာစစ်ကော်မရှင်ဘက်ကို ပြန်လည်လွှဲပြောင်း ပေးခဲ့ပါတယ်။

6. လွန်ခဲ့သော ၃ နာရီ ကစစ်ခေါင်းဆောင်ခေါင်းခဲရတဲ့ ပြည်ထဲရေး

   အစိုးရသစ်ဖွဲ့ဖို့ လပိုင်းအလိုမှာပဲ အရေးကြီးရာထူးတစ်ခုဖြစ်တဲ့ ပြည်ထဲရေးဝန်ကြီးနေရာကို ရုတ်တရက်ပြောင်းလိုက်ကြောင်း စစ်ကော်မရှင်က ကြေညာခဲ့ပါတယ်။

   မြန်မာစစ်တပ်ရဲ့ ထုံးစံအတိုင်း တပ်တွင်းကိစ္စတွေကို လူသိရှင်ကြားသတင်းမထုတ်ပြန်ဘဲ ဝန်ကြီးအပြောင်းအလဲဖြစ်တာကိုပဲ အသိပေးတဲ့အတွက် ပြည်ထဲရေးဝန်ကြီးနေရာက နေ ဒုတိယဗိုလ်ချုပ်ကြီးထွန်းထွန်းနောင် ဖယ်ရှားခံရတာက ပဟေဠိတစ်ခုလိုဖြစ်နေပါတယ်။

   "ဗိုလ်ချုပ်မှူးကြီးလည်း မမျှော်လင့်ထားဘူး။ ပြဿနာတွေဆိုတာကလည်း မမျှော်လင့်တဲ့ဆီကပဲ လာတာများတယ်" လို့ စစ်ရုံးနဲ့နီးစပ်တဲ့ ဘီဘီစီသတင်းအရင်းအမြစ်က ပြောပါတယ်။

   ဒုတိယဗိုလ်ချုပ်ကြီးထွန်းထွန်းနောင်နေရာကို ဒုတိယဗိုလ်ချုပ်ကြီး ဖုန်းမြတ်ရောက်လာပြီး အာဏာသိမ်းထားတဲ့ ငါးနှစ်အတွင်းမှာ ပြည်ထဲရေးဝန်ကြီးလေးယောက်အထိ အပြောင်းအလဲ ဖြစ်ခဲ့တာ ဖြစ်ပါတယ်။

   အပြည့်အစုံကို ဒီလင့်ခ် မှာ ဝင်ဖတ်နိုင်ပါတယ်။

7. လွန်ခဲ့သော ၄ နာရီ ကချင်းမိုင်မှာ ထိုင်းစစ်တပ် သင်မောင်း လေယာဉ်ပျက်ကျလို့ လေယာဉ်မှူး ၂ ဦးသေဆုံး

   ထိုင်းနိင်ငံမြောက်ပိုင်း ချင်းမိုင်ခရိုင်ထဲမှာ ဒီနေ့ မနက်ပိုင်းတုန်းက ဖြစ်ခဲ့တဲ့ သင်မောင်းလေယာဉ် ပျက်ကျမှုမှာ လေတပ် လေယာဉ်မှူး ၂ ဦးသေဆုံးတယ်လို့ ထိုင်းတော်ဝင်လေတပ်က သတင်းထုတ်ပါတယ်။

   လေယာဉ်ဟာ ရှာဖွေကယ်ဆယ်ရေးလေ့ကျင့်နေတုန်း ချင်းမိုင်လေဆိပ်ရဲ့ အနောက်တောင်ပိုင်း ကီလိုမီတာ ၆၀ ခန့်မှာ ဒီနေ့ မနက် ထိုင်းစံတော်ချိန် ၁၀ နာရီ မိနစ် ၂၀ ခန့်မှာ ပျက်ကျခဲ့တာလို့ ဆိုပါတယ်။

   လေယာဉ်ပျက်ကျမှုမှာ လူနေအရပ်၊ အိမ်နဲ့ အရပ်သားတွေကို ထိခိုက်မှု မရှိခဲ့ပေမဲ့ လေယာဉ်ပေါ်မှာ လိုက်ပါသွားတဲ့ သင်တန်းမှူး လေတပ်အရာရှိ လေယာဉ်မှူးနဲ့ သင်တန်းသားလေယာဉ်မှူးတို့ နှစ်ဦးစလုံး သေဆုံးတယ်လို့ ထိုင်းလေတပ်က ထုတ်ပြန်ပါတယ်။

   ပျက်ကျခဲ့တဲ့လေယာဉ်အမျိုးအစားဟာ AT-6 လေယာဥ်ဖြစ်ပြီး အခုဖြစ်ရပ်ကို ထိုင်းလေတပ်က စုံစမ်းစစ်ဆေးမှုစတင်နေပြီလို့ ထိုင်းအစိုးရပိုင်သတင်းဌာနတွေက သတင်းဖော်ပြပါတယ်။

8. လွန်ခဲ့သော ၄ နာရီ ကICJ ဒုတိယအကြိမ်ကြားနာမှုမှာ မြန်မာဘက်က နှုတ်နဲ့ နောက်ဆုံးအကြိမ်လျှောက်ထားမယ်

   အပြည်ပြည်ဆိုင်ရာတရားရုံး (ICJ) မှာ ဂမ်ဘီယာက မြန်မာကို စွပ်စွဲထားတဲ့ ရိုဟင်ဂျာတွေအပေါ် လူမျိုးတုံး သတ်ဖြတ်မှု အမှုရဲ့ နောက်ဆုံးနေ့ ကြားနာပွဲကို နယ်သာလန်နိုင်ငံ၊ သယ်ဟိတ်မြို့မှာ ဒီကနေ့မှာ ပြုလုပ်သွားဖို့ ရှိနေပါတယ်။

   ဂမ်ဘီယာက ဒုတိယအကြိမ်ကြားနာမှုရဲ့ နှုတ်နဲ့ နောက်ဆုံးလျှောက်လဲချက်တွေကို ဇန်နဝါရီ ၂၆ ရက် နဲ့ ၂၇ ရက်မှာ ပြုလုပ်ခဲ့ပါတယ်။

   ဇန်နဝါရီ ၂၇ ရက်မှာတော့ ဂမ်ဘီယာရှေ့နေဘက်က မြန်မာနိုင်ငံက ရိုဟင်ဂျာတွေ အပေါ် လူမျိုးသုဉ်းစေလိုတဲ့ရည်ရွယ်ချက်ရှိကြောင်းနဲ့ မျက်မြင်သက်သေတွေရဲ့ထွက်ဆိုချက်တွေကို ICJ တရားသူကြီးတွေရှေ့ တင်ပြခဲ့ပါတယ်။

   မြန်မာဘက်ကတော့ ဇန်နဝါရီ ၂၈ ရက်မှာ ဂမ်ဘီယာဘက်က စွပ်စွဲထားတဲ့ ရိုဟင်ဂျာတွေအပေါ် လူမျိုးသုဉ်းစေလိုတဲ့ ရည်ရွယ်ချက်မရှိကြောင်း နဲ့ သက်သေထွက်ဆိုချက်တွေကို တရားသူကြီးရှေ့မှောက်တင်ပြခဲ့ပါတယ်။

   ဇန်နဝါရီ ၂၉ ရက်မှာတော့ မြန်မာဘက်က နောက်ဆုံးနှုတ်နဲ့ လျှောက်လဲချက် ပေးရတော့မှာဖြစ်ပါတယ်။

   နောက်ဆုံးကြားနာမှုအပြီး တရားရုံးက အမိန့်ချနိုင်သလို နောက်ထပ် လတွေ၊ နှစ်တွေနဲ့ချီအကြာမှာလည်း အမိန့်ချနိုင်တယ်လို့ နိုင်ငံတကာဥပဒေပညာရှင်တွေက ပြောပါတယ်။

   “ဒါကနောက်ဆုံးအဆင့်ဖြစ်နိုင်သလို နောက်ဆက်တွဲအဆင့်တွေလည်း ရှိလာနိုင်တယ်” လို့ ဂမ်ဘီယာရှေ့နေအဖွဲ့ဦးဆောင်သူ အာဆလန် ဆူလေမန်က အစောပိုင်းမှာ ပြောပါတယ်။

   ICJ အမိန့်တစ်ရပ်မှာ စွပ်စွဲခံရတဲ့ နိုင်ငံဘက်က ရှုံးရင် အစိုးရတာဝန်ရှိသူတွေကို ဖမ်းဆီးထောင်ချလို့ မရပေမယ့် ကုလသမဂ္ဂလုံခြုံရေးကောင်စီကို လွှဲပြောင်းပေးအပ်ပြီး အရေးယူပိတ်ဆို့မှုတွေ လုပ်လာနိုင်တယ်လို့ ပညာရှင်တွေက သုံးသပ်ကြပါတယ်။

9. လွန်ခဲ့သော ၆ နာရီ ကအာဆီယံနိုင်ငံခြားဝန်ကြီးတွေ မြန်မာ့ပြဿနာကို ဖိလစ်ပိုင်မှာ ဆွေးနွေး

   အရှေ့တောင်အာရှနိုင်ငံများအသင်း(အာဆီယံ) နိုင်ငံတွေက နိုင်ငံခြားရေးဝန်ကြီးတွေဟာ အခုနှစ်အတွက် အာဆီယံအလှည့်ကျဥက္ကဋ္ဌ ဖိလစ်ပိုင်နိုင်ငံမှာ တွေ့ဆုံနေကြပြီး မြန်မာ့အရေးကိုလည်း တွေ့ဆုံဆွေးနွေးနေကြပါတယ်။

   စီဘူးမြို့မှာပြုလုပ်တဲ့ အခုဆွေးနွေးပွဲမတိုင်ခင် အာဆီယံနိုင်ငံခြားရေးဝန်ကြီးလည်းဖြစ် အလှည့်ကျ မြန်မာ့အရေးအထူးသံတမန်လည်းဖြစ်တဲ့ ထရီဆာ လာဇရိုဟာ နိုင်ငံခြားရေး ဝန်ကြီးတွေနဲ့ မနေ့က သီးခြားတွေ့ဆုံပြီး မြန်မာ့အရေး တိုင်ပင်ကြတဲ့ အစည်းအဝေး တစ်ရပ်ကို ပြုလုပ်ခဲ့ပါတယ်။

   အဲဒီအစည်းအဝေးမှာ အထူးသံဟာ မြန်မာ့အရေး ဘုံသဘာတူညီချက် ၅ ရပ် အထမြောက်အောင်ဆောင်ရွက်နိုင်ဖို့ အာဆီယံနိုင်ငံခြားရေးဝန်ကြီးတွေနဲ့ အလွတ်သဘော တိုင်ပင်ဆွေးနွေးခဲ့တယ်လို့ ဖိလစ်ပိုင်ဘက်က သတင်းထုတ်ပါတယ်။

   နိုင်ငံခြားရေးဝန်ကြီးတွေရဲ့ အခုတစ်ခေါက်ဆွေးနွေးပွဲကို မြန်မာစစ်ကော်မရှင်က နိုင်ငံခြားရေးဝန်ကြီးဌာန အမြဲတမ်းအတွင်းဝန်လည်း တက်ရောက်နေပါတယ်။

   ဒါဟာ အာဆီယံအလှည့်ကျဥက္ကဋ္ဌ ဖိလစ်ပိုင်နိုင်ငံမှာ အဖွဲ့ဝင်နိုင်ငံတွေက နိုင်ငံခြားရေးဝန်ကြီးတွေ အခုနှစ်အတွက် ပထမဆုံးတွေ့ဆုံကြတာဖြစ်ပါတယ်။

   လက်ရှိ အာဆီယံအလှည့်ကျ ဖိလစ်ပိုင်နိုင်ငံဟာ လုံခြုံရေးကဏ္ဍ၊ ဒေသတွင်းကြွယ်ဝရေးနဲ့ ဒေသတွင်း လူ့စွမ်းအားမြှင့်တင်ရေးကို အဓိကထားအာရုံစိုက်နေတယ်လို့ ဒီအခြေအနေသိတဲ့ သံတမန် သတင်းရင်းမြစ်က ပြောပါတယ်။

   မနေ့က တွေ့ဆုံကြတုန်းကတော့ နိုင်ငံခြားရေးဝန်ကြီးတွေဟာ မြန်မာ့အရေးအပါအဝင် ဒေသတွင်း အရေးတွေကို အချိန်ကြာကြာ ဆွေးနွေးခဲ့ကြတယ်လို့လည်း သူက ပြောပါတယ်။

   သီတင်းတစ်ပတ်တုန်းကတော့ မြန်မာနိုင်ငံဆိုင်ရာ အထူးသံတမန်ဖြစ်တဲ့ ဖိလစ်ပိုင်နိုင်ငံရဲ့ နိုင်ငံခြားရေးဝန်ကြီဟာ မြန်မာ့တော်လှန်ရေးအင်အားစုတွေနဲ့တွေ့ဆုံ ဆွေးနွေးထားပါတယ်။

   အဲဒီမတိုင်ခင်တုန်းကတော့ သူဟာ အထူးကိုယ်စားလှယ်ခေါင်းစဉ်အောက်ကနေ နေပြည်တော်ကို သွားရောက်ခဲ့ပြီး စစ်ခေါင်းဆောင် ဗိုလ်ချုပ်မှူးကြီးမင်းအောင်လှိုင်နဲ့ တွေ့ဆုံခဲ့ပါတယ်။

10. လွန်ခဲ့သော ၇ နာရီ ကမြဝတီမြို့မှာ စစ်ကော်မရှင်တပ်က နေရာအများစုမှာ တပ်အင်အားတိုးဖြန့်

    ကရင်နယ်ခြားစောင့်တပ် BGF ကနေ ဘတ်တံဆိပ်ပြောင်းတဲ့ ကရင်အမျိုးသားတပ်မတော် (KNA) ကို မြဝတီမြို့ ကနေဆုတ်ခွာဖို့ စစ်ကော်မရှင်က ညွှန်ကြားတယ်ဆိုတဲ့ စာ ပျံ့နှံ့ခဲ့ပြီးတဲ့နောက် မြဝတီမြို့ပေါ်ကို မြန်မာစစ်တပ်ရဲ့ တပ်ဖွဲ့ဝင်တွေ အင်အားတိုးချ၊ တပ်ဖြန့်ထားတယ်လို့ မြေပြင်စစ်ရေးသတင်းအရင်းအမြစ်က ပြောပါတယ်။

    “လောလောဆယ်တော့ တပ်က မြို့ပေါ်နေရာ အတော်များများမှာ တပ်တွေ လိုက်ဖြန့်ထားတာတော့ရှိတယ်” လို့ ကရင်သတင်းအရင်းအမြစ်က ဇန်နဝါရီ ၂၉ ရက် က ပြောပါတယ်။

    အခုလို မြဝတီမှာ စစ်တပ်က အင်အားတိုးချဲ့ထားတာကို နောက်ထပ် ကရင်စစ်ရေးသတင်းအရင်းအမြစ်တစ်ဦးကလည်း အတည်ပြုပါတယ်။

    “တိုက်ပွဲကြောင့် လည်း ဖြစ်နိုင်သလို၊ KNA ကို ဖိအားပေးဖို့လည်း ဖြစ်နိုင်တယ်။ စောင့်တော့ ကြည့်ရမယ်” လို့ သူက ပြောပါတယ်။

    မြဝတီမြို့လုံခြုံ‌ရေးကို ပုံမှန်အားဖြင့် ကရင်နယ်ခြားစောင့်တပ် - BGF နဲ့ စစ်တပ်က အဓိကတာဝန်ယူလေ့ရှိပါတယ်။ အခုတော့ မြို့လုံခြုံရေးကို စစ်တပ် နဲ့ ဒီမိုကရေစီအကျိုးပြုကရင်တပ်မတော်(DKBA) နဲ့ KNU/KNLA (PC) အဖွဲ့တွေက တာဝန်ယူရမယ်လို့ စစ်တပ်က အမိန့်ထုတ်ထားတဲ့အကြောင်း DKBA သတင်းအရင်းအမြစ်က ပြောပါတယ်။

    အွန်လိုင်းပေါ်မှာ ပျံ့နှံ့နေတဲ့ စစ်တပ်ရဲ့ ညွှန်ကြားစာအရ BGF ကနေ ဘတ်တံဆိပ်ပြောင်းပြီး KNA ဖွဲ့စည်းမှုကို စစ်ကော်မရှင်က တရားဝင်ခွင့်ပြုထားတာ မရှိဘူးလို့ ပြောထားတာတွေ့ရပါတယ်။

    ဒါ့ကြောင့် မြဝတီမြို့ပေါ် က BGF တပ်တွေ နေရာယူခဲ့တဲ့ နေရာတွေမှာ စစ်တပ်ရဲ့ တပ်ဖွဲ့ဝင်တွေ ဝင်ရောက်နေရာယူလာတယ်လို့ နားလည်ရပါတယ်။

    လက်ရှိ မြဝတီမြို့ပေါ်မှာ ဗိုလ်မုတ်သုန် ဦးဆောင်တဲ့ BGF တပ်နယ် ၄ တပ်ဖွဲ့က ရှိနေပါတယ်။

    မြဝတီမြို့ပေါ်မှာ KNA တပ်တွေ ရဲ့ အခြေအနေ တွေ သိရဖို့ KNA ပြောခွင့်ရသူ ဒုဗိုလ်မှူးကြီး နိုင်မောင်ဇော်ကို ဘီဘီစီ က မေးမြန်းထားပေမယ့် တုံ့ပြန်မှုမရှိသေးပါဘူး။

11. လွန်ခဲ့သော ၈ နာရီ ကကိုးကန့်သူဌေး''မြီ'' မိသားစုဝင် ၂ ဦး အပါအဝင် ၁၁ ဦးကို တရုတ် သေဒဏ်ပေး

    ရှမ်းမြောက်၊ ကိုးကန့်ဒေသရဲ့ အချမ်းသာဆုံးမိသားစုလေးခုထဲက မြီ မိသားစုဝင် ၂ ဦး အပါအဝင် လူပေါင်း ၁၁ ဦးကို သေဒဏ်ပေးလိုက်ပြီလို့ တရုတ်ပြည်သူ့လုံခြုံရေး ဝန်ကြီးဌာနက ဒီနေ့ မနက်ပိုင်းမှာပဲ သတင်းထုတ်ပြန်လာပါတယ်။

    ကွယ်လွန်သူ ကိုးကန့်သူဌေးကြီး မြီရှောက်ချန်းရဲ့သား မြီကော်ဖျင်နဲ့ မြေးဖြစ်သူ မြီကြိမ်းကြိမ်း အပါအဝင် လူ ၁၁ ဦးကို တရုတ်တရားရုံးတစ်ရုံးက ‌ပြီးခဲ့တဲ့နှစ် စက်တင်ဘာလကတည်းက သေဒဏ်အမိန့်ချမှတ်ထားတာဖြစ်ပါတယ်။

    ကိုးကန့် မြီမိသားစုက မြီကော်ဖျင်နဲ့ မြီကြိမ်းကြိမ်းအပါအဝင် ၁၁ ဦးကို သေဒဏ်ပေးလိုက်ပြီလို့ဆိုပေမဲ့ ဘယ်နေ့က သေဒဏ်ပေးလိုက်တယ်ဆိုတာတော့ တိတိကျကျ သတင်းမထုတ်ပါဘူး။ ဒါပေမဲ့ သေဒဏ်ပေးတာ မတိုင်ခင်တုန်းကတော့ မိသားစုကို ဧည့်သည်တွေ့ခွင့်ပြုခဲ့တယ်လို့ ထုတ်ပြန်ချက်ကဆိုပါတယ်။

    တရုတ်ပြည်သူ့လုံခြုံရေးဝန်ကြီးဌာနကတော့ ဒီလူ ၁၁ ဦးဟာ ဂျဲကျန့်ပြည်နယ်၊ ဝမ်ဂျိုပြည်သူ့တရားရုံးကနေသေဒဏ်ပေးထားတဲ့အမိန့်ကြောင့် အခုလို ပြစ်ဒဏ်ချမှတ်ခံရတာလို့ ဆိုပါတယ်။

    မြီကော်ဖျင်ရော၊ မြီကြိမ်းကြိမ်းပါ သူတို့အပေါ် ချမှတ်ထားတဲ့ပြစ်ဒဏ်အတွက် အယူခံဝင်ခဲ့ပေမဲ့ တရားရုံးက ပယ်ချခဲ့တယ်လို့လည်း ထုတ်ပြန်ချက်က ဆိုပါတယ်။

    တရုတ်နိုင်ငံရဲ့ ပြည်သူတွေအပေါ် အွန်လိုင်းငွေလိမ်လည်မှု(ကျားဖြန့်)နဲ့ တခြားရာဇဝတ်မှုတွေကို ကျူးလွန်ခဲ့တာကြောင့် ဆိုတဲ့ စွပ်စွဲချက်နဲ့ မြီရှောက်ချန်းရဲ့ သား၊ သမီးနဲ့ မြေးတို့အပါအဝင် လူ ၄၀ နီးပါးကို တရုတ်ဘက်က ၂၀၂၄ နှစ်ကုန်ပိုင်းမှာ ဖမ်းဆီးပြီး စွဲချက်တင်ခဲ့ပါတယ်။

    မြီမိသားစုကို လိမ်လည်မှု၊ နိုင်ငံတကာအဆင့်လူသတ်မှု၊ ရည်ရွယ်ချက်ရှိရှိလူထိခိုက်စေမှု၊ လူတွေကိုတရားမဝင်ဖမ်းချုပ်မှု၊ လောင်းကစားဝိုင်းထောင်မှု၊ မူးယစ်မှောင်ခိုကူးမှုတွေနဲ့ တရားစွဲဆိုပြီးတဲ့နောက် ၂ နှစ်နီးပါးကျော်အကြာမှာ အခုလို သေဒဏ်ပေးလိုက်တာဖြစ်ပါတယ်။

    ကိုးကန့်ဒေသရဲ့ အချမ်းသာဆုံးမိသားစု လေးခုထဲက မြီ မိသားစုဝင်တွေဖြစ်တဲ့ မြီရှောက်ချန်းရဲ့သား မြီကော်ဖျင်၊ သမီးဖြစ်သူ မြီကျူးလန့်နဲ့ မြေးဖြစ်သူ မြီကြိမ်းကြိမ်းတို့ကို တရုတ်က ပြီးခဲ့တဲ့နှစ် နိုဝင်ဘာလမှာ ဖမ်းဝရမ်းထုတ်ခဲ့ပါတယ်။

    အဲဒီနောက် ကိုးကန့်ဒေသမှာ မြန်မာစစ်တပ်နဲ့ တရုတ်ရဲတပ်ဖွဲ့က ပူးပေါင်းပြုလုပ်တဲ့စီးနင်းမှုတွေအတွင်း သူတို့ကို ၂၀၂၃ ၊ နိုဝင်ဘာ ၁၆ ရက် မနက်ပိုင်းမှာဖမ်းမိခဲ့ပြီး အဲဒီနေ့ နေ့လယ်ပိုင်းမှာပဲ သူတို့ကို မြန်မာစစ်တပ်က တရုတ်နိုင်ငံဘက်ခြမ်းကို နယ်စပ်က ရန်လုံကျိုင်းဂိတ်ကနေ လွှဲခဲ့ပါတယ်။

12. လွန်ခဲ့သော ၈ နာရီ ကလွှတ်တော်ကိုယ်စားလှယ်တွေရဲ့ တည်းခို၊ စားသောက်စရိတ်တွေ တိုးမြှင့်ပြဋ္ဌာန်း

    လွှတ်တော် သုံးရပ်ကိုယ်စားလှယ်တွေ၊ ကိုယ်ပိုင်အုပ်ချုပ်ခွင့်ရတိုင်း (သို့မဟုတ်) ကိုယ်ပိုင်အုပ်ချုပ်ခွင့်ရဒေသ ဦးစီးအဖွဲ့ဝင်တွေ တာဝန်အရ ခရီးသွားလာတဲ့အခါ သတ်မှတ်ထားတဲ့ တည်းခိုနေထိုင်စရိတ်၊ အခြားအသုံးစရိတ်တွေကို တိုးမြှင့်လိုက်တယ်လို့ စစ်ကော်မရှင်က ကြေညာပါတယ်။

    ပြည်သူ့လွှတ်တော်၊ အမျိုးသားလွှတ်တော်၊ တိုင်းဒေသကြီး သို့မဟုတ် ပြည်နယ်လွှတ်တော်ကိုယ်စားလှယ်များ နှင့် ကိုယ်ပိုင်အုပ်ချုပ်ခွင့်ရတိုင်း သို့မဟုတ် ကိုယ်ပိုင်အုပ်ချုပ်ခွင့်ရဒေသဦးစီးအဖွဲ့ များ ၏ ချီးမြှင့်ငွေ နှင့် စရိတ်များဆိုင်ရာဥပဒေ ကို ဒုတိယအကြိမ် ပြင်ဆင်တဲ့လိုက်တာပါ။

    လွှတ်တော်ကိုယ်စားလှယ်တွေ၊ ဦးစီးအဖွဲ့ဝင်တွေ တာဝန်အရ ခရီးသွားတဲ့အခါ နိုင်ငံတော်က အခမဲ့တည်းခိုနေထိုင်ဖို့ မစီစဉ်ပေးနိုင်ရင် ဥပဒေပုဒ်မ ၆ မှာ ပြဋ္ဌာန်းထားတဲ့ တည်းခိုနေထိုင်စရိတ် ကျပ် ၅,၀၀၀ ကို ကျပ် ၈,၀၀၀ တိုးမြှင့်လိုက်ပြီး အခြားအသုံးစရိတ် ကျပ် ၅,၀၀၀ ကို ကျပ် ၇,၀၀၀ ဆိုပြီး ပြင်ဆင်သတ်မှတ်လိုက်ပါတယ်။

    ဥပဒေပုဒ်မ ၈ မှာပါတဲ့ စားသောက်စရိတ် ကျပ် ၁၀,၀၀၀ ကိုလည်း ကျပ် ၂၀,၀၀၀ ဆိုပြီး ပြင်ဆင်သတ်မှတ်လိုက်ပါတယ်။

    စစ်ကော်မရှင် က ရွေးကောက်ပွဲတတိယအပိုင်းကို ဇန်နဝါရီ ၂၅ ရက်မှာ ကျင်းပပြီးစီးခဲ့ပြီး လာမယ့် မတ်လမှာတော့ လွှတ်တော်စခေါ်မယ်လို့ က ကြေညာထားပါတယ်။

    စစ်တပ်က ဒီဇင်ဘာ ၂၈ ရက် က စတင်တဲ့ ရွေးကောက်ပွဲကို ပြည်သူ့လွှတ်တော်မဲဆန္ဒနယ် ၂၆၃ နယ်၊ အမျိုးသားလွှတ်တော် FPTP မဲဆန္ဒနယ် ၇၃ နယ်၊ PR မဲဆန္ဒနယ် ၂၆ နယ်၊ တိုင်းဒေသကြီး (သို့မဟုတ်) ပြည်နယ်လွှတ်တော် FPTP မဲဆန္ဒနယ် ၂၅၅ နယ်၊ PR မဲဆန္ဒနယ် ၄၂ နယ်၊ တိုင်းဒေသကြီး (သို့မဟုတ်) ပြည်နယ်လွှတ်တော် တိုင်းရင်းသား လူမျိုးမဲဆန္ဒနယ် ၂၉ နယ် နဲ့ ကျင်းပခဲ့တယ်။

    ဒီ လွှတ်တော်သုံးရပ် မဲဆန္ဒနယ်တွေ က အနိုင်ရတဲ့ လွှတ်တော်ကိုယ်စားလှယ်တွေ က တိုးမြှင့်လိုက်တဲ့ ခံစားခွင့်တွေ ရရှိမှာဖြစ်တယ်လို့ နားလည်ရပါတယ်။

13. လွန်ခဲ့သော ၈ နာရီ ကကမ္ဘာ့ရွှေစျေး ဒေါ်လာ ၅,၂၀၀ ကျော်၊ မြန်မာ့ရွှေစျေး သိန်း ၁၁၀ နီးပါးကပ်လာ

    ကမ္ဘာ့ရွှေစျေး တစ်အောင်စဟာ အခုဆို ပထမဆုံးအချိန်အနေနဲ့ အမေရိကန်ဒေါ်လာ ၅၂၀၀ အထက်ကို ရောက်လာပါတယ်။ တဖက်မှာလည်း ဒါဟာ ၂၀၂၅ ခုနှစ်မှာ ၆၀ ရာခိုင်နှုန်းအထိ ထိုးတက်ခဲ့တဲ့ရွှေစျေးရဲ့ နောက်တစ်ဆင့် စျေးတစ်ဆစ်ချိုး ဖြစ်လာပါတယ်။

    ကမ္ဘာ့ရွှေဈေးနဲ့အတူ စျေးနှုန်းတက်လေ့ရှိတဲ့ မြန်မာ့ရွှေစျေးဟာ အခုဆိုရင် အခေါက်ရွှေ တစ်ကျပ်သားကို သိန်း ၁၁၀ နီးပါးအထိ ရောက်လာပါတယ်။

    ကမ္ဘာ့ရွှေစျေး ဒေါ်လာ ၅,၀၀၀ ရောက်ချိန်မှာ မြန်မာ့ရွှေ သိန်း ၁၀၀ အထိ ထိုးတက်သွားခဲ့တာဖြစ်ပါတယ်။

    ဇန်နဝါရီ ၂၈ ရက်၊ မနက်ပိုင်းမှာ ပြင်ပ‌ပေါက်စျေး ၁၆ ပဲရည် တစ်ကျပ်သားကို ၁၀,၈၅၀,၀၀၀ သိန်း(တစ်ရာ့ရှစ်သိန်းငါးသောင်း) ကျပ် စျေးဖွင့်ထားတယ်လို့ ရွှေစျေးကွက်အသိုင်းအဝိုင်းဆီက သိရှိရပါတယ်။

    ဒါက တစ်ပတ်အတွင်းမှာ ကျပ်သိန်း ၁၁၀ ဝန်းကျင်အထိ စျေးပေါက်လာတာဖြစ်ပါတယ်။

    ဒါဟာဘာ့ကြောင့်ပါလဲ။

    ဆောင်းပါးအပြည့်အစုံကို ဒီလင့်ခ် မှာ ဖတ်ရှုနိုင်ပါတယ်။

14. ၂၉ ဇန်နဝါရီ ၂၀၂၆နေပြည်တော် - တောင်တွင်းကြီးလမ်းပိုင်းမှာ ဇော်လေးနိုင် ဇာတ်အဖွဲ့ ယာဉ်တိမ်းမှောက်မှု ၇ ဦးသေဆုံး

    မကွေးတိုင်းဒေသကြီး၊ တောင်တွင်းကြီးမြို့နယ် ကနေ တပ်ကုန်းမြို့မှာ ဖျော်ဖြေရေးလုပ်မယ့် “ဇော်လေးနိုင် ဇာတ်သဘင်အဖွဲ့” ဟာ တောင်ညိုလမ်းပိုင်း အရောက်မှာ ဇာတ်ကားမှောက်လို့ သဘင်အဖွဲ့ဝင် ၇ ဦး သေဆုံးခဲ့တယ်လို့ ကူညီကယ်ဆယ်ရေးလုပ်နေတဲ့ အဖွဲ့က ဘီဘီစီကို အတည်ပြုပါတယ်။

    မနေ့ ညနေ ၆ နာရီကျော်လောက်မှာ ဇာတ်သဘင်အဖွဲ့စီးလာတဲ့ ကားဟာ နေပြည်တော်- တောင်တွင်းကြီးလမ်း၊ ဂွေးချိုကျေးရွာ အရောက်မှာ အရှိန်လွန်ပြီး ချောက်ထဲကို ပြုတ်ကျခဲ့တာလို့ မွန်မြတ်သူလူမှုကူညီရေးအဖွဲ့ က ပြောပါတယ်။

    “အလောင်းတွေက ကျွန်တော်တို့ရောက်မှ ဖော်တာ။ ကျွန်တော်တို့က ဆွဲထုတ်တဲ့အဖွဲ့ဆိုတော့ လောလောဆယ် ရုပ်အလောင်း ၇ လောင်း တွေ့ထားတယ်။ ၁ ယောက်တော့ ပိတ်မိနေဆဲဖြစ်တယ်” လို့ မွန်မြတ်သူလူမှုကူညီရေးအဖွဲ့ ရဲ့ တာဝန်ရှိသူက ပြောပါတယ်။

    ခန့်မှန်းခြေ ၂၂ ပေ အရွယ်အစားရှိတဲ့ ကုန်တင်ကားပေါ်မှာ ဇာတ်သဘင်အဖွဲ့ဝင် ၂၅ ဦလောက်ပါလာနိုင်တယ်လို့ သူက သုံးသပ်ပါတယ်။ ဇာတ်သဘင်အဖွဲ့စီးလာတဲ့ အဲဒီကားကို လက်ရှိမှာချောက်ထဲကနေ အပေါ်ကို ကရိန်းနဲ့ ဆွဲတင်နေတယ်လို့ သိရပါတယ်။

    ဇာတ်သဘင်အဖွဲ့သားတွေ ရဲ့ ပါလာတဲ့ပစ္စည်းကိုလည်း ဖြစ်စဉ်ဖြစ်ပွားတဲ့ အနီးအနားက ဆိုင်တွေမှာ ပေးထားခဲ့ရတယ်လို့ ဒေသခံတစ်ဦးက ပြောပါတယ်။

    “ဖုန်းတွေ၊ ပိုက်ဆံအိတ်တွေ ညီမလေးတို့ သိမ်းထားပေးတယ်။ လာကယ်တဲ့ စစ်သားအဖွဲ့က ဖုန်းနဲ့ပိုက်ဆံအိတ်တွေ သူတို့ဆွဲထုတ်တဲ့သူတွေဆီက ပါလာလို့ သိမ်းထားပေးပါဆိုလို့ သိမ်းထားပေးတာ။ ကားမှောက်တဲ့ နေရာနဲ့ ညီမတို့ ဆိုင်က သိပ်မဝေးဘူး” လို့ ဂွေးချိုကျေးရွာ ဒေသခံတစ်ဦးက ပြောပါတယ်။

    ထိခိုက်ဒဏ်ရာရတဲ့သူတွေကို တော့ နေပြည်တော် ကုတင် ၁၀၀၀ ဆေးရုံကို ပို့ထားတယ်လို့ သိရပြီး ထိခိုက်ဒဏ်ရာသူတွေ များပြားနိုင်ကြောင်း မြန်မာနိုင်ငံသဘင်အစည်းအရုံးက ထုတ်ပြန်ထားပါတယ်။

15. ၂၉ ဇန်နဝါရီ ၂၀၂၆

    မင်္ဂလာပါ။ ဇန်နဝါရီ ၂၉ ရက် ဘီဘီစီသတင်းများ တိုက်ရိုက်တင်ဆက်မှု စတင်ပြီဖြစ်ပါတယ်။ နိုင်ငံတဝန်းနောက်ဆုံးရ သတင်းများကို တိုက်ရိုက်ထုတ်လွှင့်ချက်မှာ အချိန်နဲ့ တပြေးညီ ဖတ်ရှုနိုင်ပါတယ်။