တိုက်ရိုက်ထုတ်လွှင့်မှု, အာရှနွယ်ဖွား ၂ ဦးရဲ့ ပထမဆုံး ခါးပတ်လုပွဲဖြစ်လာမယ့် ဗန်နဲ့ တိုင်ရာတို့ပွဲ

တိုက်ရိုက် ထုတ်လွှင့်ချက်

1. လွန်ခဲ့သော ၂၇ မိနစ် ကဝေဖန်မှုမြင့်တက်နေတဲ့ အောင်ဇမ္ဗူဇာတ်ရဲ့ မသန်စွမ်းသူ ပုံစံတု သရုပ်ဖော် ပြက်လုံးကိစ္စ သဘင်အစည်းအရုံး ဆွေးနွေးမယ်

   မသန်စွမ်းသူတွေရဲ့ လှုပ်ရှားသွားလာပုံကို ပုံစံတူလုပ်ကာ သရုပ်ဖော်ပြက်လုံး လုပ်ခဲ့တာကြောင့် ဝေဖန်မှုမြင့်တက်နေတဲ့ အောင်ဇမ္ဗူဇာတ်အဖွဲ့နဲ့ ပတ်သက်ပြီး မြန်မာနိုင်ငံသဘင်အစည်းအရုံးကတာဝန်ရှိသူတွေ ဒီကနေ့ဖေဖော်ဝါရီ ၂၃ ရက်မှာ ဆွေးနွေးဖို့ရှိတယ်လို့ ကော်မတီဝင်တစ်ဦးထံက သိရှိရပါတယ်။

   အစည်းအဝေးက အောင်ဇမ္ဗူဇာတ်အဖွဲ့နဲ့ သဘင်အစည်းအရုံးတို့ နှစ်ဖက်ဆွေးနွေးတာမျိုးမဟုတ်ဘဲ သဘင်အစည်းအရုံးတစ်ဖွဲ့တည်းက တာဝန်ရှိသူတွေပဲ သီးခြား ဆွေးနွေးကြမှာဖြစ်ပါတယ်။

   “ဟိုးအရင်ကတည်းက ဘယ်လိုပဲလုပ်ခဲ့လုပ်ခဲ့ အခုကာလမှာတော့ ဒါမျိုးမလုပ်ဖို့ လိုပါတယ်။ ညနေ အစည်းအဝေးအပြီးမှာတော့ ဆုံးဖြတ်ချက်တစ်ခုထွက်လာမှာပါ” လို့ ကော်မတီဝင်က ဆိုပါတယ်။

   စင်မြင့်ထက်မှာ ဇာတ်အဖွဲ့ရဲ့ ခေါင်းဆောင်မင်းသားက သီချင်းသီဆိုဖျော်ဖြေနေချိန် လူရွှင်တော်အဖွဲ့တွေက ကိုယ်အင်္ဂါမသန်စွမ်းသူတွေ လမ်းလျှောက်တဲ့ ပုံစံမျိုး လျှောက်ပြခဲ့တဲ့အပေါ် ဝေဖန်မှုတွေမြင့်တက်နေကြတာပါ။

   ဒီရုပ်သံဖိုင်ကို မသန်စွမ်းသူတွေ၊ မသန်စွမ်းအဖွဲ့အစည်းတွေနဲ့ လူ့အခွင့်အ‌ရေးလှုပ်ရှားသူတွေက ရှုတ်ချခဲ့ကြတာပါ။ မသန်စွမ်း အရပ်ဘက်အဖွဲ့အစည်းတစ်ခုဖြစ်တဲ့ ရွှေမင်းသားဖောင်ဒေးရှင်းကလည်း ပြင်းထန်စွာရှုတ်ချကြောင်းစာထုတ်ပြန်ထားပြီး အရေးယူဆောင်ရွက်နိုင်ရေး ဆက်လုပ်သွားမယ်လို့ ပြောထားပါတယ်။

   အောင်ဇမ္ဗူဇာတ်ရဲ့ ခေါင်းဆောင်မင်းသားအောင်ဇမ္ဗူ ကတော့ ဒီတင်ဆက်မှုဟာ ပရိတ်သက်ကို ပျော်စေချင်လို့လုပ်ဆောင်တာဖြစ်ပြီး မသန်စွမ်းတွေကို ထိခိုက်စေလိုတာမရှိဘဲ တောင်းပန်ကြောင်း အနုပညာသတင်းမီဒီယာတွေကို မနေ့က ဖြေထားတာတွေ့ရပါတယ်။

   “ဒီလိုမသန်စွမ်းတွေလုပ်နေကျပုံစံဆိုတာမသိဘူးပေါ့လေ။ ဒီလိုဖြစ်လာတဲ့အပေါ်မှာ စိတ်မကောင်း ဖြစ်ရပါတယ်။ ကိုယ့်ကိုပြောလို့ ရှေ့ကိုပြောတာမဟုတ်ပေမဲ့ လူရွှင်တော်ကြီးတွေက အပျော်သဘောနဲ့ လုပ်ခဲ့ကြတာအများကြီးပဲ” လို့ အောင်ဇမ္ဗူက ထည့်ပြောထားပါတယ်။

   လူမှုကွန်ရက်မှာ ဝေဖန်ချက်တွေ မြင့်တက်လာအပြီး မြန်မာနိုင်ငံရုပ်ရှင်အစည်းအရုံးကတော့ ဆင်ဆာဥပဒေမှာ မသန်စွမ်းတွေကို လှောင်ပြောင်တာမလုပ်ဖို့ ထည့်သွင်းထားပြီးဖြစ်တယ်လို့ ထုတ်ပြန်ပါတယ်။

   “သဘင်အစည်းအရုံးမှာတော့ သရုပ်ပျက်ဖျော်ဖြေဝတ်စားမှုမလုပ်ဖို့တော့ စည်းကမ်းသတ်မှတ်ချက် ရှိတယ်ပေါ့လေ။ မသန်စွမ်းသူတွေအတွက်တော့ သီးခြားမရှိဘူးပေါ့” လို့ မြန်မာနိုင်ငံသဘင်အစည်းအရုံးကော်မတီဝင်က ပြောပါတယ်။

   မြန်မာမှာ မသန်စွမ်းမှုဆိုင်ရာ အသိပညာပေးမှုအားနည်းတာကြောင့် ခွဲခြားဆက်ဆံမှုတွေ ရှိခဲ့ပြီး မသန်စွမ်းသူတွေအနေနဲ့ လူ့ဂုဏ်သိက္ခာနဲ့အညီ နေထိုင်နိုင်ဖို့ အကာအကွယ်ပေးမှုအပိုင်းလည်း အားနည်းခဲ့တယ်လို့ မသန်းစွမ်းသူများအရေးလှုပ်ရှားကြတဲ့အဖွဲ့တွေက ထောက်ပြပါတယ်။

   ၂၀၁၅ ခုနှစ်၊ ဇွန်လ ၅ ရက်မှ မသန်စွမ်းသူများအခွင့်အရေးဥပဒေထုတ်ပြန်ခဲ့ပါတယ်။ ဒီဥပဒေရဲ့ ပုဒ်မ ၇၇ (ဂ)အရ မသန်စွမ်းသူတွေကို တလွဲအသုံးပြုပြီး ကိုယ်ကျိုးစီးပွားမရှာဖို့ တားမြစ်ထားတာဖြစ်ပါတယ်။

   အခုဖြစ်စဥ်ဟာ မသန်စွမ်းသူကိုယ်တိုင်ကို အသုံးချတာမဟုတ်ပေမဲ့ မသန်စွမ်းသူအဖြစ်သရုပ်ဆောင်ကာ စီးပွားရှာတာဖြစ်တယ်လို့ မြန်မာနိုင်ငံမသန်စွမ်းသူများအသင်းချုပ်က ဖေဖော်ဝါရီ ၂၀ ရက်မှာ ထုတ်ပြန်ပါတယ်။

   မသန်စွမ်းအခွင့်အရေးဥပဒေရဲ့ ပုဒ်မ ၇၇ ပါတားမြစ်ချက်တွေကို ဖောက်ဖျက်ရင် ၆ လထက်မပိုတဲ့ ထောင်ဒဏ်ဖြစ်စေ၊ အနည်းဆုံးကျပ် ၃ သိန်းကနေ အများဆုံး၁၀သိန်းထက်မပိုတဲ့ ငွေဒဏ်ဖြစ်စေ၊ ဒဏ်နှစ်ရပ်လုံးဖြစ်စေချမှတ်နိုင်တယ်လို့ ပြဋ္ဌာန်းထားပါတယ်။

2. လွန်ခဲ့သော တစ်နာရီ ကပဋိပက္ခအတွင်း လိင်အကြမ်းဖက်မှုနဲ့ပတ်သက်တဲ့ကုလပြောဆိုချက်ကို စစ်ကော်မရှင် ကန့်ကွက်

   မြန်မာမှာ စစ်အာဏာသိမ်း ၅ နှစ်အတွင်း ပဋိပက္ခအခြေပြု လိင်အကြမ်းဖက်မှုတွေတိုး လာတယ်ဆိုတဲ့ ကုလသမဂ္ဂ အထူးကိုယ်စားလှယ်ရဲ့ထုတ်ပြန်ချက်ကို ကန့်ကွက်တယ်လို့ ဖေဖော်ဝါရီ ၂၂ ရက်မှာ စစ်ကော်မရှင်က ထုတ်ပြန်ပါတယ်။

   ကုလသမဂ္ဂအထူး ကိုယ်စားလှယ်ရုံးက မြန်မာနိုင်ငံဆိုင်ရာ လွတ်လပ်သော စုံစမ်းစစ်ဆေးရေးယန္တရား(IIMM)ရဲ့ အချက်အလက်တွေအပေါ် အခြေခံပြီး ဖေဖော်ဝါရီ ၂ ရက်မှာ မြန်မာက လိင်အကြမ်းဖက်မှုတွေကို တာဝန်ခံမှုရှိစေရေးခေါင်းစဥ်အတွက် သတင်းထုတ်ပြန်ခဲ့တာဖြစ်ပါတယ်။

   မြန်မာပြည်သူတွေကို အပြစ်ပေးဖို့၊ ခြိမ်းခြောက်ဖို့နဲ့ နိုင်ငံရေးအရ ဖိနှိပ်ဖို့ စစ်ဆင်ရေး နည်းဗျူဟာနဲ့ မဟာဗျူဟာတစ်ရပ်အဖြစ် မုဒိမ်းကျင့်တာ၊ အစုလိုက်အပြုံလိုက် မုဒိမ်းကျင့်တာနဲ့ အခြားသော လိင်ပိုင်းဆိုင်ရာ အကြမ်းဖက်မှု ပုံစံမျိုးစုံကို ဆက်လက် အသုံးပြုနေတဲ့အပေါ် ပြင်းထန်စွာ ရှုတ်ချတယ်လို့ ကုလအထူးကိုယ်စားလှယ်က ပြောပါတယ်။

   ကုလသမဂ္ဂ အထွေထွေအတွင်းရေးမှူးချုပ်ရဲ့အထူးကိုယ်စားလှယ် မစ္စ ပရာမီလာ ပတ်တင်ရဲ့ ထုတ်ပြန်ချက်ဟာ တစ်ဖက်သတ် စွပ်စွဲချက်တွေလို့ဆိုပြီး နိုင်ငံဂုဏ်သိက္ခာနဲ့ ပုံရိပ်ထိခိုက်စေဖို့ ရည်ရွယ်တဲ့ နိုင်ငံရေး ဖိအားပေးမှု သက်သက်သာဖြစ်တယ်လို့လည်း ဆိုပါတယ်။

   လိင်ပိုင်းဆိုင်ရာအကြမ်းဖက်မှုအပါအဝင် ဘယ်ပြစ်မှုမဆို လုံးဝခွင့်မလွှတ်ဘဲ အရေးယူ အပြစ်တင်တဲ့ မူဝါဒချမှတ်ထားပြီး ကျူးလွန်ရင် အရေးယူမယ်လို့ ပြဋ္ဌာန်းထားတယ်လို့ စစ်ကော်မရှင်က တုံ့ပြန်ပါတယ်။

   အမျိုးသမီးအဖွဲ့တွေအပါအဝင် လူ့အခွင့်အရေးအဖွဲ့တွေကတော့ အာဏာသိမ်းကာလနောက်ပိုင်း ပဋိပက္ခအခြေပြုအကြမ်းဖက်မှုတွေမှာ တရားမျှတမှုရရှိဖို့ ခက်ခဲတယ်လို့ ဆိုထားတာပါ။

   စစ်တပ်အာဏာသိမ်းပြီးနောက်ပိုင်း နိုင်ငံတွင်းဖြစ်ပေါ်လာခဲ့တဲ့ပဋိပက္ခတွေအတွင်း စစ်တပ်နဲ့ တော်လှန်ရေးလက်နက်ကိုင်တို့ နှစ်ဖက် ကျူးလွန်တဲ့ လိင်ပိုင်းဆိုင်ရာအကြမ်းဖက်မှု အနည်းဆုံး ၉၀၀ ရှိတယ်လို့ ဒီအခြေအနေကို စောင့်ကြည့်တဲ့ မြန်မာနိုင်ငံ အမျိုးသမီးများအဖွဲ့ချုပ် WLB)က ပြောပါတယ်။

   စစ်ကော်မရှင်ကတော့ လိင်ပိုင်းဆိုင်ရာအကြမ်းဖက်မှုတွေအတွက် ၂၄ နာရီ အရေးပေါ်ဖုန်းလိုင်းကို ၂၀၂၂ ခုနှစ်ကတည်းက ထားရှိထားသလို တိုင်ကြားမှု‌ပေါင်း ၂၃၀၀ ကျော်ကို လက်ခံစစ်ဆေးနေတယ်လို့ဆိုပြီး ကုလထုတ်ပြန်ချက်ကို ကန့်ကွက်တဲ့သတင်းမှာ ထည့်ပြောပါတယ်။

   ကုလကိုယ်စားလှယ်ကတော့ စစ်ခေါင်းဆောင်အပါအဝင် မြန်မာစစ်တပ် အဖွဲ့ဝင်တွေနဲ့ ဆက်စပ်အဖွဲ့အစည်းတွေ၊ တိုင်းရင်းသား လက်နက်ကိုင် အဖွဲ့အစည်းတွေနဲ့ ပြည်သူ့ကာကွယ်ရေးတပ်ဖွဲ့ အားလုံးအနေနဲ့ လိင်ပိုင်းဆိုင်ရာ အကြမ်းဖက်မှုပုံစံ အားလုံးကို ချက်ချင်း ရပ်တန့်ဖို့၊ ကာကွယ်တားဆီးဖို့ တိုက်တွန်းထားပါတယ်။

3. လွန်ခဲ့သော ၂ နာရီ ကအာရှနွယ်ဖွား ၂ ဦးရဲ့ ပထမဆုံး ခါးပတ်လုပွဲဖြစ်လာမယ့် ဗန်နဲ့ တိုင်ရာတို့ပွဲ

   မြန်မာနွယ်ဖွား flyweight ချန်ပီယံ ဂျော့ရှုဝါ ဗန်ဟာ သူ့ရဲ့ချန်ပီယံခါးပတ်ကို ကာကွယ်ရမယ့်ပွဲကို လာမယ့် ဧပြီလမှာ ဂျပန်နွယ်ဖွား ဖိုက်တာ တာဆုရို တိုင်ရာနဲ့ ယှဥ်ပြိုင်ထိုးသတ်ဖို့ ရှိနေပါတယ်။

   ဒါကြောင့် ဒီပွဲဟာ UFC သမိုင်းမှာ အာရှနွယ်ဖွား ဖိုက်တာ ၂ ဦးရဲ့ ပထမဆုံး ခါးပတ်လုပွဲ ဖြစ်လာမှာဖြစ်ပါတယ်။

   ဒီပွဲကို အမေရိကန်ပြည်ထောင်စု၊ ဖလော်ရီဒါပြည်နယ်၊ မိုင်ယာမီမြို့မှာ ဧပြီလ ၁၂ ရက်မှာ ကျင်းပမယ်လို့ UFC က တရားဝင်ကြေညာထားပါတယ်။

   ဂျော့ရှုဝါ ဗန်က UFC flyweight တန်းမှာ ပထမဆုံးအကြိမ် ချန်ပီယံခါးပတ်စိန်ခေါ်ခွင့်ရခဲ့တဲ့ မြန်မာကိုယ်စားပြု ချင်းဖိုက်တာ ဖြစ်ခဲ့ပြီး ချန်ပီယံ ပန်တိုဂျာကို ၂၀၂၅ ဒီဇင်ဘာမှာ အနိုင်ရရှိလို့ ချန်ပီယံ ခါးပတ်ဆုရထားသူဖြစ်ပါတယ်။

   တဖက်မှာလည်း ဗန်နဲ့ ယှဥ်ပြိုင်ထိုးသတ်ဖို့ရှိတဲ့ တာဆုရို တိုင်ရာဟာ ၂၀၂၅ ခုနှစ်အတွင်း ထိုးသတ်ပွဲအတော်များများမှာ ဆက်တိုက်ရှုံးပွဲ မရှိသူလို့ နာမည်ရထားသူဖြစ်ပါတယ်။

   ကြိုးဝိုင်းထဲ ဖိအားများတဲ့အခြေအနေတွေအောက်မှာ ပြိုင်ဖက်ကို အလဲထိုးဖို့ တည်တည်ငြိမ်ငြိမ်နဲ့ ထိုးသတ်နိုင်စွမ်းရှိတဲ့သူလို့ တာဆုရို တိုင်ရာကို အမှတ်ပေးကြတာတွေလည်း ရှိနေပါတယ်။

4. လွန်ခဲ့သော ၃ နာရီ ကဒေါ်လာ ၁၅ သန်းဆုကြေးထုတ်ခံရတဲ့မက္ကဆီကို မူးယစ်ရာဇာကို စစ်တပ် အသေဖမ်းဆီး

   မက္ကဆီကိုနိုင်ငံမှာ အလိုအရှိဆုံး မူးယစ်ရာဇာကို အသေဖမ်းမိပြီလို့ မက္ကဆီကို ကာကွယ်ရေးဝန်ကြီးဌာနက ပြောပါတယ်။

   အယ်လ် မန်ချိုလို့ သိကြတဲ့ အသက် ၅၉ နှစ်အရွယ် မူယစ်ရာဇာဟာ Jalisco New Generation (CJNG) လို့သိကြတဲ့ မူးယစ်ဂိုဏ်း ခေါင်းဆောင်ဖြစ်ပါတယ်။

   သူ့ကို ထောက်ခံသူတွေနဲ့ စစ်တပ်တို့ဖြစ်တဲ့အပြန်အလှန်ပစ်ခတ်မှုမှာ အဲဒီအမျိုးသား ဒဏ်ရာအပြင်းအထန်ရရှိခဲ့ပြီးတဲ့နောက် သေဆုံးခဲ့တာလို့လည်း မက္ကဆီကို ကာကွယ်ရေးဝန်ကြီးဌာနက ပြောပါတယ်။

   ဒဏ်ရာရရှိထားတဲ့ သူ့ကို မက္ကဆီကို စီးတီး မြို့ကို ပြန်ခေါ်လာချိန်မှာ သေဆုံးခဲ့တာဖြစ်ပါတယ်။

   နိုင်ငံအလယ်ပိုင်းက တာပယ်လာမြို့မှာဖြစ်တဲ့အဲဒီပစ်ခတ်မှုအတွင်း မူးယစ်ဂိုဏ်းအဖွဲ့ ဝင် ၄ ဦးလည်း သေဆုံးပါတယ်။

   ဒီစစ်ဆင်ရေးလုပ်ဖို့ အမေရိကန်ဘက်က မက္ကဆီကိုထံ သတင်းအချက်အလက် မျှဝေခဲ့တာလို့ သိရပါတယ်။

   အခုဖြစ်ရပ်ကို တုံ့ပြန်တဲ့အနေနဲ့ CJNG အဖွဲ့ဟာ မက္ကဆီကိုနိုင်ငံထဲက ပြည်နယ် ၈ ခုမှာ လုံခြုံရေးတပ်ဖွဲ့ဝင်တွေကို တိုက်ခိုက်တာ၊ လမ်းတွေကို ပိတ်ဆို့တာနဲ့ ကားတွေကို မီးရှို့တာတွေ ပြုလုပ်နေပါတယ်။

   ဒီအခြေအနေတွေရှိနေပေမဲ့ မက္ကဆီကိုသမ္မတကတော့ လူထုအနေနဲ့ တည်တည်ငြိမ်ငြိမ်ရှိကြဖို့ တိုက်တွန်းသလို နိုင်ငံနေရာအတော်များများမှာလည်း အခြေအနေပုံမှန်အတိုင်းပဲလို့ ပြောပါတယ်။​

   အယ်လ် မန်ချိုဟာ ရဲအရာရှိဟောင်းဖြစ်ပြီး အမေရိကန်ပြည်ထောင်စုထဲကို ကိုကင်းနဲ့ မက်သ် အပါအဝင် မူးယစ်ဆေးတွေကို တင်သွင်းနေတဲ့ ရာဇဝတ်ဂိုဏ်းအဖွဲ့ကို စီမံနေသူဖြစ်ပါတယ်။

   အမေရိကန်နိုင်ငံခြားရေးဝန်ကြီးဌာနက သူ့ကို ဖမ်းမိရေး သတင်းပေးနိုင်သူကို ဒေါ်လာ ၁၅ သန်းအထိ ဆုငွေချီးမြှင့်မယ်လို့ ထုတ်ပြန်ထားတာဖြစ်ပါတယ်။​

   မက္ကဆီကို ကာကွယ်ရေးဝန်ကြီးဌာနကတော့ ဒီစစ်ဆင်ရေးကို အထူးတပ်ဖွဲ့တွေက စီစဥ်ထားတဲ့အတိုင်း ဖော်ဆောင်လုပ်ကိုင်ခဲ့တာလို့ ပြောပါတယ်။

   လေတပ်နဲ့ ပြည်ထောင်စုအဆင့်အစောင့်တပ်တွေကိုလည်း စစ်ဆင်ရေးမှာ ဖြန့်ကြက် အသုံးပြုခဲ့တယ်လို့ဆိုပါတယ်။

   အဲဒီ စစ်ဆင်ရေးအတွင်း ပခုံးထမ်းလောင်ချာတွေအပါအဝင် လက်နက်ခဲယမ်းနဲ့ ယာဥ်တွေကိုလည်း သိမ်းဆည်းမိခဲ့တယ်လို့ မက္ကဆီကို ကာကွယ်ရေးဝန်ကြီးဌာနက ပြောပါတယ်။​

5. လွန်ခဲ့သော ၃ နာရီ ကတော်လှန်ရေးထိန်းချုပ် တကောင်းမြို့အနီးက ရွှေကျွန်းပင်ရွာကို စစ်တပ်ပြန်သိမ်း

   မန္တလေးတိုင်း၊ သပိတ်ကျင်းမြို့နယ်ထဲက တော်လှန်ရေးထိန်းချုပ်နယ်မြေဖြစ်တဲ့ ရွှေကျွန်းပင်ရွာကို စစ်တပ်က ပြန်လည်သိမ်းသွားတယ်လို့ ဘီဘီစီရဲ့စစ်ရေးအရင်းအမြစ်က ပြောပါတယ်။

   စစ်တပ်ထောက်ခံသူတွေရဲ့ တယ်လီဂရမ်ချန်နယ်မှာလည်း စစ်တပ်က ဒီရွာကို ဖေဖော်ဝါရီ ၂၁ ရက်မှာ ပြန်သိမ်းနိုင်ပြီလို့ ဓာတ်ပုံတွေနဲ့အတူ ဖြန့်ဝေ ပြောဆိုနေကြပါတယ်။

   စစ်တပ်ပြန်သိမ်းလိုက်တဲ့ ရွှေကျွန်းပင်ရွာဟာ တကောင်းမြို့နဲ့ မိုင် ၂၀ ကျော်ဝန်းကျင်မှာ ရှိတာဖြစ်ပါတယ်။

   တကောင်းမြို့ဟာ မန္တလေးတိုင်းရဲ့ ဧရာဝတီမြစ်အရှေ့ခြမ်းမှာ တော်လှန်ရေးအင်အားစုတွေ ထိန်းချုပ်ထားတဲ့ နောက်ဆုံးလက်ကျန်မြို့လည်း ဖြစ်ပါတယ်။

   တော်လှန်ရေးတပ်တွေက တကောင်းကဆုတ်ရင် စစ်ကိုင်းတိုင်းရဲ့ ကချင်ပြည်နယ် ဝင်ပေါက်ဖြစ်တဲ့ ထီးချိုင့်နဲ့ အင်းတော်ဘက် ရွှေ့နိုင်ခြေရှိတယ်လို့ CDM ဗိုလ်ကြီးဇင်ယော်က သုံးသပ်ပါတယ်။​

   စစ်တပ်ဘက်က တုံ့ပြန်လာနိုင်တဲ့အခြေအနေကိုလည်း သူက အခုလို မှတ်ချက်ပေးပါတယ်။

   “စစ်တပ်က စဥ့်ကူးကနေ ဝက်လက်ဘက်ကို လိုက်ပြီး ရှင်းသလိုပဲ တကောင်းရရင် ထီးချိုင့်နဲ့ အင်းတော်ဘက်ကို တန်ပြန်တိုက်စစ်ဆင်လာမယ့်သ‌ဘောတွေ့ရတယ်” လို့ သူကပြောပါတယ်။

   ဖေဖော်ဝါရီ ၆ ရက်ကစပြီး စစ်တပ်စစ်ကြောင်းဟာ သပိတ်ကျင်းမြို့နယ်ထဲက တွင်းငယ်ရွာနားကနေ တကောင်းမြို့ဘက်ကို ဦးတည်လာကာ ဒီလမ်းတကြောက ရွာတွေမှာ တိုက်ပွဲပြင်းထန်နေတာ ဖြစ်ပါတယ်။

   အဲဒီစစ်ကြောင်းက ဖေဖော်ဝါရီ ၁၄ ရက်မှာတော့ ရှားတောရွာကို သိမ်းခဲ့ပါတယ်။

   ရွှေကျွန်းပင်ရွာကို စစ်တပ်ပြန်သိမ်းတာနဲ့ပတ်သက်လို့ ဘီဘီစီက MDY PDF ပြောရေးဆိုခွင့်ရှိသူ ကိုအော်စမွန်ကို မေးမြန်းထားပေမဲ့ ပြန်လည်ဖြေဆိုတာ ရှိသေးပါဘူး။

6. လွန်ခဲ့သော ၄ နာရီ ကတရုတ်ကသေဒဏ်ပေးခဲ့တာ မြန်မာတွေလား၊တရုတ်တွေလား

   ကိုးကန့်ရဲ့ထင်ရှားတဲ့ မိသားစုကြီး လေးစုထဲက မြီမိသားစုနဲ့ ပယ်မိသားစုဝင် ၁၆ ဦးကို တရုတ်နှစ်သစ်ကူးမတိုင်ခင် တရုတ်မှာ သေဒဏ်ပေးလိုက်ပါတယ်။

   ဒါက မြန်မာနိုင်ငံမှာအခြေစိုက်နေထိုင်သူတွေကို တရုတ်တရားစီရင်ရေးအောက်မှာ အရေအတွက်အများဆုံး သေဒဏ်ပေးမှုဖြစ်ပါတယ်။

   သေဒဏ်စီရင်ခံရသူတွေထဲမှာ မြန်မာ-တရုတ် နှစ်နိုင်ငံလုံးရဲ့ နိုင်ငံသားကတ်ကိုင်ဆောင်ထားသူတွေပါဝင်ပြီး နိုင်ငံသားနှစ်ခုခံယူမှုက မြန်မာနိုင်ငံသားဥပဒေအရ တရားမဝင်ပါဘူး။

   ဒါအပြင် မိသားစုလေးစုရဲ့ အကြီးအကဲတချို့ဟာ မြန်မာရဲ့ ဒေသအုပ်ချုပ်ရေးအာဏာပိုင်နဲ့ ဥပဒေပြုအမတ်တွေဖြစ်ခဲ့ဖူးတဲ့အတွက် သေဒဏ်စီရင်မှုအပေါ် မေးခွန်းတွေရှိလာခဲ့ပြီး ပြောစရာလည်းဖြစ်သွားပါတယ်။

   အပြည့်အစုံကို ဒီလင့်ခ် ကို နှိပ်ပြီး ဆက်လက်ဖတ်ရှုနိုင်ပါတယ်။

7. လွန်ခဲ့သော ၄ နာရီ ကMNA လေယာဥ် ဒရုန်းနဲ့တိုက်ခိုက်ခံရမှု - လိုင်ဇာအထိ လေကြောင်းခြိမ်းခြောက်မှုရောက်

   မြန်မာအမျိုးသားလေကြောင်းလိုင်း(MNA) လေယာဥ်တစ်စင်းဟာ ခရီးသည်တွေ တင်ဆောင်ပြီး မြစ်ကြီးနားလေဆိပ်ကနေ ထွက်ခွာခါနီး FPV အသေခံဒရုန်းတွေနဲ့ တိုက်ခိုက်ခံရတယ်လို့ စစ်ကော်မရှင်က ဖေဖော်ဝါရီ ၂၀ ရက်မှာ ထုတ်ပြန်ပါတယ်။

   ဒီတိုက်ခိုက်မှုကို ကချင်လွတ်လပ်ရေးတပ်မတော် (ကေအိုင်အေ)နဲ့ ပြည်သူ့ကာကွယ်ရေးတပ်(PDF)က ပူးပေါင်း ပြုလုပ်ခဲ့တာလို့ စစ်တပ်က စွပ်စွဲပေမဲ့ ကေအိုင်အေဘက်က ဒါကို ငြင်းပါတယ်။

   အရပ်ဘက်လေကြောင်းလိုင်း ရည်ရွယ်ချက်ရှိရှိ တိုက်ခိုက်ခံရတာလို့ပြောပြီး ထိရောက်ပြင်းထန်တဲ့တုံ့ပြန်မှု လုပ်သွားမယ်လို့ စစ်ကော်မရှင်က သတင်းထုတ်ပါတယ်။

   ဒရုန်းတိုက်ခိုက်မှုဖြစ်တဲ့ ဖေဖော်ဝါရီ ၂၀ ရက် ညကနေ စပြီး စစ်တပ်က လက်နက်ကြီးနဲ့ လေကြောင်း ပစ်ခတ်မှုတွေ စလုပ်ခဲ့ပြီး ကေအိုင်အေ ဌာနချုပ်ရှိရာ တရုတ်- မြန်မာနယ်စပ်က လိုင်ဇာမြို့ ကောင်းကင်အထိ တိုက်လေယာဥ်ပျံသန်းတာတွေ လုပ်ခဲ့ပါတယ်။​

   ကေအိုင်အေဘက်ကတော့ ဒါဟာ စစ်တပ်ရဲ့လေကြောင်းခြိမ်းခြောက်မှုလို့ နားလည်ထားပါတယ်။​

   အပြည့်အစုံကို ဒီလင့်ခ် ကိုနှိပ်ပြီး ဆက်လက်ဖတ်ရှုနိုင်ပါတယ်။

8. လွန်ခဲ့သော ၅ နာရီ ကကချင်က မြို့နယ် ၃ ခု လေကြောင်းဗုံးကြဲခံရ လူသေဆုံးမှုရှိ

   ကချင်ပြည်နယ်ထဲက မိုးမောက်၊ မိုးညှင်းနဲ့ ဝိုင်း‌မော်မြို့နယ်တွေကို စစ်တပ်က မနေ့ကညပိုင်းနဲ့ ဒီနေ့ မနက်ပိုင်းတွေမှာ လေကြောင်းဗုံးကြဲတိုက်ခိုက်မှုတွေလုပ်ခဲ့တယ်လို့ ဒေသခံအချို့ဆီက သိရှိရပါတယ်။

   မိုးမောက်၊ မိုးညှင်းကို မနေ့ ဖေဖော်ဝါရီ ၂၂ ရက် ညပိုင်း ၁၁ နာရီဝန်းကျင်အချိန်တွေမှာ လေကြောင်းတိုက်ခိုက်ခဲ့တယ်လို့ လေကြောင်းသတိပေးချက်ထုတ်ပြန်တဲ့စာမျက်နှာတွေနဲ့ ဒေသခံတချို့ကဆိုပါတယ်။

   ဝိုင်း‌မော်မြို့နယ်ကိုတော့ ဒီမနက်အစောပိုင်းမှာ လေကြောင်းဗုံးကြဲတယ်လို့သိရှိရပါတယ်။

   တံတားဦးလေတပ်က တက်လာတဲ့ ဂျက်ဖိုက်တာက ည ၁၁ နာရီခွဲဝန်းကျင်မှာ မိုးမောက်မြို့နယ်၊ ဘွမ်ကထောင်ရွာကို ဗုံးကြဲတာကြောင့် လူနေအိမ်ပေါ်တဲ့တဲ့ကျခဲ့တယ်လို့ မြေပြင်အခြေအနေသိရှိသူက ဘီဘီစီကိုပြောပါတယ်။

   “ဘွမ်ကထောင်ရွာကိုတစ်လုံးချတာ အရပ်သားအိမ်တည့်တည့်ကျပြီး တစ်ယောက်သေတယ်” လို့ ပြောပါတယ်။

   မိုးမောက်ကိုမကြဲခင် မိုးညှင်းမြို့နယ်ထဲကို လေကြောင်းဗုံးတစ်ကြိမ်ကြဲခဲ့ပြီး လူထိခိုက်သေဆုံးရှိမရှိ မသိရသေးပါဘူး။

   ဝိုင်းမော်မြို့နယ်ထဲမှာတော့ လေကြောင်းဗုံး ၄ ကြိမ်ကြဲတယ်လို့ ဝေဟင်လေကြောင်းသတိပေးချန်နယ်က ထုတ်ပြန်ထားပါတယ်။

   “ညတုန်းက လေယာဥ်တွေတောက်လျှောက်တက်တယ်။ ဒီမနက်တော့ ငြိမ်နေတယ်” လို့ မြေပြင်အခြေအနေသိရှိသူကဆိုပါတယ်။

   မြစ်ကြီးနားလေဆိပ်မှာ ဖေဖော်ဝါရီ ၂၀ ရက်က MNA လေယာဥ် ဒရုန်းနဲ့ တိုက်ခံရအပြီး စစ်တပ်က ကချင်လွတ်လပ်ရေးတပ် - KIA နဲ့ PDF ပူးပေါင်းအဖွဲ့တွေကို စွပ်စွဲပြီးနောက် ကချင်ပြည်နယ်ထဲ လေကြောင်းဖိအားပေးတိုက်ခိုက်လာတာလို့ ဒေသခံတွေက ယူဆနေကြပါတယ်။

   ဖေ‌ဖော်ဝါရီ ၂၀ ရက်ညကနေ ဒီနေ့မနက်အထိ လေကြောင်းတိုက်ခိုက်မှု အကြိမ် ၂၀ နီးပါး လုပ်ဆောင်ခဲ့တယ်လို့ ဝေဟင်လေကြောင်းသတိပေးချန်နယ်တွေရဲ့ စာရင်းတွေကဖော်ပြပါတယ်။

   ဒါ့အပြင် KIA ဌာနချုပ်ရှိရာ လိုင်ဇာမြို့ပေါ်ကိုလည်း တိုက်လေယာဥ်တွေ ဖြတ်ပျံနေတယ်လို့ ဆိုပါတယ်။

   မြစ်ကြီးနားလေဆိပ်တိုက်ခိုက်ခံရမှုနဲ့ ပတ်သက်လို့ စစ်တပ်ရဲ့ စွပ်စွဲချက်ကိုတော့ KIA ဘက်က ငြင်းဆိုထားပါတယ်။

9. လွန်ခဲ့သော ၅ နာရီ က

   မင်္ဂလာပါ။ ဖေဖော်ဝါရီ ၂၃ ရက် ဘီဘီစီသတင်းများ တိုက်ရိုက်တင်ဆက်မှု စတင်ပြီဖြစ်ပါတယ်။ နိုင်ငံတဝန်းနောက်ဆုံးရ သတင်းများကို တိုက်ရိုက်ထုတ်လွှင့်ချက်မှာ အချိန်နဲ့ တပြေးညီ ဖတ်ရှုနိုင်ပါတယ်။