Arwyddion ffyrdd i stadia pel-droed

Faint ohonoch chi sy’n cymryd sylw manwl ar ffurf a siâp arwyddion ffyrdd?

Na , nid gofyn a ydych chi yn eu hanwybyddu yn llwyr ydw i, ond yn hytrach fyddwch chi’n rhoi sylw i fanylder yr arwydd?

Pam hynny medde chi?

Wel, mae’n ymddangos fod yna fathemategydd o Lundain yn mynnu fod yr arwyddion sydd yn dangos y cyfeiriad i stadia pêl droed yn hollol anghywir!

Na, nid am eu bod yn ein harwain ar gyfeiliorn, ond am fod siâp y bel yn anghywir, neu i fod yn fwy manwl, fod y siapiau hecsagon sydd i’w gweld o fewn y peli ar yr arwyddion, yn hollol geometraidd anghywir !!!

Wel, pan ddysgais i sut i yrru car, talu sylw i'r hyn sydd ar, ac o gwmpas y ffordd oedd un o'r disgwyliadau - nid cyfri hecsagonau ar lun peli wrth drio darganfod fy ffordd o Old Trafford!!!

Be’ felly sydd wedi cynhyrfu’r mathemategydd yma cymaint, fel ei fod wedi casglu enwau drwy ddeiseb a’i anfon i'r llywodraeth yn San Steffan.

Sail y ddeiseb ydi ei bod yn fathemategol amhosib creu pêl gyda dim ond hecsagonau, a bod angen pentagonau os am gael pêl berffaith!

Wrth gwrs, mae pawb sy’n cynnal timau pêl droed ar hyd a lled Cymru yn gwybod hyn gyda’r pwyllogorau yn cyfri'r siapiau a thrafod maint a lliw'r hecsagonau a phentagonau ar eu peli!!

Sail ei gonsyrn, heblaw trio dangos sut mae peli pêl droed yn cael eu cynllunio a'u gwneud, codi ymwybyddiaeth a gwerthfawrogiad y cyhoedd o agweddau o geometreg. Mae o hyd yn oed wedi mynd cyn belled a honni fod y geometreg ar y peli, ar yr arwyddion yn embaras cenedlaethol! Ie, atgofion o’r hen Ifans y Tryc ers talwm!! Embaras - dyna ydi o!

Fodd bynnag, tydi’r Adran Drafnidiaeth yn ôl pob sôn, heb roi fawr o gefnogaeth i'r ymgyrch gan ddweud y byddai'r gost o ail wampio’r arwyddion yn rhoi baich cyllidol afresymol ar yr awdurdodau lleol, a bod gyrrwyr ceir wedi hen arfer a’r arwyddion fel ag y maent, ac os byddai gyrrwyr yn dechrau talu sylw manwl i'r siapiau geometrig, yn hytrach nac edrych i ble maen nhw’n mynd, yna fe allai hyn gynyddu’r nifer o ddamweiniau ar ein ffyrdd.

Ond, tydi Mr Parker ddim am roi'r ffidl yn y to, gan fynnu ei fod am gynyddu’r nifer sydd am arwyddo’r ddeiseb i gan mil. 'Nid gofyn ac onglau a mesuriadau ar yr arwydd ydwi’ meddai, ‘dim ond i’r arwydd edrych yn fwy tebyg i bêl droed’ – ie,, dim ond gofyn (a ‘da ni wedi clywed hynny yn ddigon aml ond tydyn!!

Diolch byth nad ydi o'n gefnogwr rygbi!!