Ffasiwn cynaliadwy

Mae ffasiwn yn ein galluogi i fynegi ein hunaniaeth drwy wisgo gwisgoedd sy’n rhoi hwb i’n hyder ac yn adlewyrchu ein personoliaethau. Ond, yn aml, gall yr hyn rydym yn ei wisgo gael effaith ar yr amgylchedd.

Mae ffasiwn cyflym yn golygu bod cwmnïau dillad yn gwneud llawer iawn o ddillad yn gyflym iawn ac yn eu gwerthu am brisiau isel. Mae hyn yn digwydd oherwydd bod pobl eisiau llawer o ddillad newydd sy’n ffasiynol ac nad ydyn nhw'n costio llawer. Efallai fod hyn yn swnio’n wych, ond gall achosi rhai problemau mawr.

Mae llawer o gwmnïau’n gwneud dillad yn gyflym ac yn rhad er mwyn cadw i fyny â’r hyn y mae pobl ei eisiau. Ar adegau, maen nhw’n cael eu gwneud mewn llefydd lle maen nhw’n gallu talu llai o arian i weithwyr a lle nad oes rhaid iddyn nhw bob amser ddilyn rheolau llym i ddiogelu’r amgylchedd. Mae hyn yn ei gwneud yn hawdd cynhyrchu a gwerthu dillad ym mhob cwr o’r byd, ond mae hon yn broses anghynaliadwy.

Mae globaleiddio yn cyflymu tueddiadau ffasiwn gyda chymorth gan bethau fel cyfryngau cymdeithasol a theledu. Mae technoleg yn gwneud i ffasiwn ledaenu’n gyflym ledled y byd, ac mae hyn yn cynyddu’r galw am gynhyrchu cotwm a polyester. Mae rhai pobl yn dadlau bod hyn yn creu cymdeithas fwy homogenaidd.

Yn 2022, gwariodd cartrefi cyffredin y DU £17.60 yr wythnos ar ddillad ac esgidiau.

Ffatrïoedd

Pan fydd ffatrïoedd yn gwneud dillad, maen nhw'n llosgi pethau fel glo ac olew i gael egni. Gelwir y rhain yn danwydd ffosil. Mae llosgi tanwydd ffosil yn rhyddhau nwyon tŷ gwydr sy’n dal gwres yn yr aer, gan wneud y Ddaear yn gynhesach. Gall hyn achosi newidiadau yn y tywydd a phroblemau eraill. Yn ogystal â hyn, mae’r cemegau sy’n cael eu defnyddio wrth liwio ffabrigau i wahanol liwiau yn aml yn gallu mynd i mewn i’r system ddŵr mewn modd afreolus, sy’n difrodi ecosystemau dyfrol.

Cludiant

Mae dillad yn aml yn cael eu gwneud ledled y byd, sydd wedyn yn cael eu cludo i siopau a storfeydd yng Nghymru, sy’n gallu creu llygredd o’r cerbydau, y llongau a’r awyrennau sy’n eu cludo. Mae’r tanwydd sy’n cael ei ddefnyddio i gludo’r cynnyrch yn llygru’r aer gyda nwyon tŷ gwydr.

Microblastigion

Weithiau, pan fyddwn yn golchi dillad sydd wedi’u gwneud o ddeunyddiau fel polyester (ffeibr wedi’i wneud gan ddyn), mae darnau bach o blastig yn torri i ffwrdd. Microblastigion yw’r enw ar y rhain, a gallan nhw ganfod eu ffordd i afonydd a moroedd. Maen nhw’n ddrwg i bysgod ac anifeiliaid eraill sy’n byw yn y dŵr, gan eu bod yn gallu eu treulio, a gallan nhw hyd yn oed fynd i mewn i’r bwyd rydyn ni’n ei fwyta.

Gwastraff

Mae pobl yn aml yn taflu dillad nad ydyn nhw eu heisiau mwyach. Er y gall pobl ailgylchu eu hen ddillad, yn aml nid ydyn nhw'n gwneud hynny, ac mae’r dillad nad oes eu hangen arnyn nhw'n mynd i safleoedd tirlenwi a gallan nhw achosi problemau wrth iddyn nhw dorri i lawr.

Defnyddio dŵr

I wneud dillad, mae angen llawer o ddŵr i helpu i dyfu’r planhigion sy’n cynhyrchu cotwm. Gall hyn fod yn broblem mewn gwledydd sy’n tyfu cotwm sydd â hinsawdd boethach na ni, oherwydd os oes gormod o ddŵr yn cael ei ddefnyddio, mae'n ei gwneud hi'n anodd i bobl leol sicrhau bod ganddyn nhw ddigon o ddŵr i yfed, i ymolchi ac i gyflenwi eu hanifeiliaid.

Ecsbloetio llafur

Mae llawer o frandiau ffasiwn cyflym yn dibynnu ar lafur rhad mewn gwledydd sy’n datblygu, lle mae gweithwyr yn aml yn cael cyflogau isel ac yn wynebu amodau gwaith gwael, gan gynnwys oriau hir a gweithleoedd anniogel.

Risgiau iechyd

Gall defnyddio cemegion gwenwynig wrth gynhyrchu tecstilau a phrosesau lliwio achosi risgiau iechyd i weithwyr a chymunedau sy’n byw ger ffatrïoedd.

Colli hunaniaeth ddiwylliannol

Gall ffasiwn cyflym wneud i bobl feddwl bod angen llawer o ddillad arnyn nhw a’r steiliau diweddaraf drwy’r amser. Gall hyn wneud i bobl anghofio gwerth dillad wedi’u gwneud yn dda ac arddulliau traddodiadol o wahanol ddiwylliannau a gall hefyd wneud i bawb edrych yr un fath heb ddathlu ein harddulliau a’n cefndiroedd unigryw.

Mae mwy a mwy o bobl yn dechrau siarad am faterion ffasiwn cyflym ac yn ceisio dod o hyd i atebion, ac mae rhai cwmnïau dillad wedi dechrau gwneud eu dillad mewn ffyrdd sy’n well i’r amgylchedd.

Defnyddio cotwm organig

Yn golygu peidio â defnyddio cemegion niweidiol fel chwynladdwyr a phlaleiddiaid sy’n niweidio’r amgylchedd naturiol.

Ailgylchu hen ddillad

Mae rhai siopau’n cynnig cyfle i’w cwsmeriaid ddychwelyd hen ddillad i’w hailgylchu. Gellir ailgylchu’r ffabrigau yn y dillad hyn sy’n lleihau’r gwastraff mewn safleoedd tirlenwi ac yn lleihau’r angen am ddeunyddiau newydd.

Cyflogau teg i weithwyr

Mae cyflogau teg yn sicrhau bod gweithwyr yn gallu cefnogi eu hunain a’u teuluoedd. Mae gweithredu drwy gytundebau Masnach Deg yn golygu cefnogi arferion moesegol wrth gynhyrchu dillad, fel amodau gwaith digonol ac oriau gwaith rhesymol, yn ogystal â chyflogau.

Lleihau defnydd o egni a dŵr

Mae hyn yn helpu i leihau’r straen ar y tir a’r adnoddau naturiol a ddefnyddir i dyfu deunyddiau a gwneud dillad.

Drwy weithredu ar lefelau unigol, cenedlaethol a rhyngwladol, gallwn i gyd weithio tuag at ddiwydiant ffasiwn mwy cynaliadwy sy’n parchu pobl a’r blaned.

Mae ailgylchu mewn dolen gaeedig yn golygu mynd ag eitemau sydd wedi cael eu defnyddio fel hen ddillad a’u troi’n ôl i’r un math o gynnyrch, fel eitemau newydd o ddillad. Mae deunyddiau’n cael eu hailddefnyddio dro ar ôl tro heb golli ansawdd. Mae hyn yn ein helpu i arbed adnoddau, defnyddio llai o egni, a gwneud llai o wastraff.

Wrth i fwy o bobl ddod yn ymwybodol o’r problemau sy’n gysylltiedig â ffasiwn cyflym, gallwn i gyd weithio gyda’n gilydd i greu diwydiant ffasiwn sy’n well i’r blaned ac i bawb sy’n byw arni.