Mudo – CBACMudo i mewn ac allan o’r DU, ac o fewn y DU

Mudo yw pobl yn symud o un ardal i un arall. Mae’r term yn cynnwys nifer o wahanol fathau o symudiadau, o newidiadau dros dro, ee symudiadau tymhorol, i newidiadau parhaol, boed yn symudiadau o fewn gwlad benodol neu’n symudiadau rhyngwladol o un wlad i wlad arall.

Mae mudo gwirfoddol yn digwydd fel arfer o ganlyniad i ffactorau gwthio a thynnu. Mae’r rhain yn cynnwys:

• cael gwaith
• dianc rhag tlodi neu beryglon naturiol, ee daeargrynfeydd
• ffermio tir ffrwythlon
• cael mynediad at wasanaethau, ee ysgolion ac ysbytai
• ymuno â ffrindiau a theulu
• dianc rhag rhyfel neu aflonyddwch sifil
• byw mewn hinsawdd cynhesach, ee ar ôl ymddeol
• mynd i brifysgol

Weithiau mae mudo’n cael ei orfodi – mae hyn yn cynnwys achosion pan nad oes gan y mudwr ddim dewis ond symud oherwydd trychineb naturiol, rhyfel neu erledigaeth. Mae unigolyn o’r fath yn cael ei ddisgrifio fel ffoadur.

Mae’n debyg bod dros 50 miliwn o ffoaduriaid yn y byd. Ffoaduriaid sydd wedi gwneud cais i wlad arall i gael bod yn ddinasyddion y wlad honno yw ceiswyr lloches.