Mapa-inntinn: Beagan eachdraidh

Feasgar math. Is mise Eilidh NicLeòid agus an-diugh tha mi gu bhith a' toirt seachad mo bheachd air BBC ALBA is mi a' beachdachadh air ceist a bhuail orm iomadh uair sa bhliadhna a chaidh seachad, is e sin, "A bheil BBC ALBA a' tabhann gu leòr do dheugairean?"

Thòisich BBC ALBA a' craoladh phrògraman air seanail ùr ann an dà mhìle 's a h-ochd. Is e fìor dheagh cheum air adhart a bh' ann. Roimhe seo bha iomadh prògram ri fhaicinn tron t-seachdain ach bha iad gu tric air ro anmoch air an oidhche do dhaoine an coimhead, gu h-àraidh airson deugairean m' aois-sa! A-nis, chithear prògraman aig uair a tha freagarrach is dòigheil. Gheibh thu fiù 's coimhead air prògraman a-rithist air-loidhne air BBC iPlayer.

Ceist: Am bi thu fhèin a' coimhead phrògraman a-rithist air-loidhne tric Eilidh?

Cha bhi mi gan coimhead gach seachdain, is dòcha uair no dhà sa mhìos. Cha toigh leam a bhith a' call Aifric ach 's e prògram mu eachdraidh-beatha tè a tha glè ainmeil a thaobh fasan air an do choimhead mi mu dheireadh. Bha sin inntinneach oir tha i seo glè ainmeil air feadh an t-saoghail airson na rudan brèagha a bhios i a' dèanamh. Cha robh mi airson sin a chall!

Mapa-inntinn: Dè seòrsa prògraman a chithear air BBC ALBA san fharsaingeachd?

Tha iomadh seòrsa prògram ri fhaicinn air BBC ALBA. Bha riamh prògraman air an telebhisean mu naidheachdan an t-saoghail, eachdraidh agus ceòl. Tha iad sin fhathast rim faicinn, ach a-nis gheibhear tòrr a bharrachd: prògraman spòrs mu bhall-coise, iomain no fiù 's seòladh, mar eisimpleir. Ma tha ùidh agad ann a bhith a' rèiseadh chàraichean, còcaireachd, coin-chaorach, trioblaidean phearsanta is eachdraidh-beatha, tha gu leòr ri fhaicinn.