A' Bhanrigh Bhictoria agus Caisteal Bhaile Mhoireil

Cha deach a h-uile caisteal a chì sinn an-diugh a thogail airson cogadh agus sabaid. Chaidh Caisteal Bhaile Mhoireil a thogail anns na 1800an dhan Bhanrigh Bhictoria agus dhan Phrionnsa Albert mar dhachaigh airson nan saor-làithean. Faigh a-mach barrachd sa bhidio.

Cò bha sa Bhanrigh Bhictoria?

• Rugadh Bhictoria air 24 Cèitean 1819
• B' e Alexandrina Victoria an t-ainm slàn a bh' oirre
• Thàinig i gu bhith na Banrigh air Rìoghachd Aonaichte Bhreatainn agus Èirinn ann an 1837 – cha robh i ach 18!
• Phòs i a co-ogha, am Prionnsa Albert, ann an 1840
• Bha naoinear chloinne aca
• Fhuair i cuideachd an tiotal Ban-ìmpire nan Innseachan ann an 1877
• Chaochail Bhictoria ann an 1901 an dèidh a bhith na banrigh fad 64 bliadhnaichean

Càit a bheil Caisteal Bhaile Mhoireil?

• Tha Caisteal Bhaile Mhoireil ri taobh Abhainn Dheathain, ann an Siorrachd Obar Dheathain.
• Thagh Bhictoria agus Albert Taobh Dheathain oir chaidh a ràdh riutha gun robh an aimsir na b' fheàrr na bha i ann am pàirtean eile de dh'Alba.

Cuin a chaidh a thogail?

• Chaidh Caisteal Bhaile Mhoireil a thogail bho thùs mar loidse-seilg mu 1390 le Rìgh Raibeart II na h-Alba.
• Bha Bhictoria agus Albert dhen bheachd gun robh an caisteal sin ro bheag dhaibh.
• Chaidh an taigh ùr, mar as aithne dhuinn e an-diugh, a thogail eadar 1853 agus 1855.

Dè bhiodh a' Bhanrigh Bhictoria a' dèanamh aig Caisteal Bhaile Mhoireil?

Aig Caisteal Bhaile Mhoireil bu toigh leis a' Bhanrigh Bhictoria a bhith:

• a' dol air chuairt a dh'fhaicinn nan seallaidhean
• a' sgrìobhadh san leabhar-latha aice
• a' peantadh no a' sgeidseadh
• a' sealg

Tha an earrann seo a sgrìobh a' Bhanrigh Bhictoria san leabhar-latha aice ann an 1850 ag innse beagan mun ùine a chuir iad seachad ann am Baile Mhoireil – fiù 's mun droch shìde!

Dimàirt 24mh Sultain 1850, Caisteal Bhaile Mhoireil

Frasach sa mhadainn, cha d' fhuair sinn air coiseachd ro fhada. Tha a h-uile sìon cho tlachdmhor an seo — a h-uile cuairt bheag cho inntinneach; na seallaidhean — na daoine còir gun phròis — a thuilleadh air ùidh mhòr ann an spòrs, co-dhiù 's e eòin, no fèidh no èildean.

Nach fheuch thu fhèin ri earrann a sgrìobhadh airson leabhar-latha?

Smaoinich air dè dhèanadh tu nam biodh tu air saor-làithean ann an caisteal no ann an lùchairt.

Ciamar a dh'atharraich a' Bhanrigh Bhictoria caistealan na h-Alba?

B' e a' Bhanrigh Bhictoria agus am Prionnsa Albert a' chiad fheadhainn a rinn Alba agus na caistealan tarraingeach do luchd-turais.

An dèidh dhaibh Caisteal Bhaile Mhoireil a cheannach agus a bhith a' fuireach ann, thòisich barrachd dhaoine a' tighinn a dh'Alba agus bha iad ag iarraidh tighinn ann airson nan saor-làithean.

An-diugh, bidh luchd-turais bho air feadh an t-saoghail a' tadhal air caistealan ann an Alba. Tha cuid dhe na caistealan a-nis nan taighean-òsta. Mar sin faodaidh daoine fuireach ann an caisteal airson nan saor-làithean dìreach mar a rinn a' Bhanrigh Bhictoria.

Faigh barrachd a-mach mu dheidhinn mar a tha caistealan air an cleachdadh an-diugh.