Caistealan aig àm an Dara Cogaidh

An robh fios agad gun deach cuid de chaistealan Alba a chleachdadh aig àm an Dara Cogaidh?

To play this video you need to enable JavaScript in your browser.

This video can not be played

Faigh a-mach ciamar a bha caistealan air an cleachdadh aig àm an Dara Cogaidh.

Carson a bha caistealan feumail aig àm an Dara Cogaidh?

Bha mòran chaistealan ann an Alba shuas gu h-àrd no faisg air uisge. Bha iad mar sin uabhasach math mar ionadan-faire airson nàimhdean fhaicinn.
Bha caistealan uabhasach mòr agus air an dèanamh de stuthan làidir. Bha sin a' ciallachadh gur e àite sàbhailte a bh' annta do shaighdearan airson trèanadh agus airson fois.
Bha cuid de chaistealan air an dùthaich air falbh bho bhailtean trang. Bha iad sin feumail do dhaoine a chaidh a ghluasad airson faighinn air falbh bho na bomaichean anns na bailtean mòra.

Skip image gallery

Image caption,
Caisteal Bhaile Cruic
Chaidh Caisteal Bhaile Cruic ann an Glaschu a thogail sna 1400an. Aig àm an Dara Cogaidh, bha tùr an taoibh an ear-thuath air a chleachdadh mar thùr-faire phlèanaichean. Bha an tùr àrd a' toirt sealladh na b' fheàrr do luchd-faire a bha a' coimhead a-mach airson bhomairean rè blitz Bhruaich Chluaidh.
Image caption,
Caisteal Dhùn Breatann
Chaidh Caisteal Dhùn Breatann a thogail air mullach creag bholcanach ri taobh na mara. Anns na 1200an bha e a' dìon Alba bho na Lochlannaich. Rè an Dara Cogaidh bha e na thùr-faire agus bha gunnachan ann a loisgeadh air plèan. Leag plèanaichean Gearmailteach ceithir bomaichean timcheall a' chaisteil aig àm a' Chogaidh.
Image caption,
Caisteal an Toll Àird
Chaidh Caisteal an Toll Àird ann an Siorrachd Earra-Ghàidheal a dhèanamh na champa trèanaidh airson an Airm, an Nèibhidh agus Feachd an Adhair. Chaidh a chleachdadh ag ullachadh airson D-Day – nuair a chaidh feachdan Breatannach, Ameireaganach agus Canèidianach air tìr san Fhraing agus a thòisich iad a' saoradh ceann an Iar-thuath na Roinn Eòrpa bho na Nadsaidhean. Aig an àm sin, chaidh Caisteal an Toll Àird ainmeachadh às ùr mar HMS Brontosaurus an dèidh dìneasair mòr, uabhasach.
Image caption,
Caisteal Bhochanain
Bha Caisteal Bhochanain faisg air Loch Laomainn air a chleachdadh mar ospadal do shaighdearan a bha tinn agus air an leòn. Chaidh a thrèigsinn an dèidh a' Chogaidh agus chaidh e na thobhta.
Image caption,
Caisteal Bhlair
Chaidh Caisteal Bhlair ann an Siorrachd Pheairt a thogail le teaghlach ainmeil nan Cuimeanach ann an 1269. Cha robh ann an toiseach ach tùr, ach chaidh a leasachadh agus dh'fhàs e na bu mhotha thar nam bliadhnaichean. Aig àm an Dara Cogaidh, bha e na dhachaigh sàbhailte agus na sgoil do chlann a chaidh a ghluasad às na bailtean airson iad a bhith sàbhailte bho bhomaichean.

Dealbh dubh agus geal de luchd-obrach trì-sheirbheisean aig Caisteal an Toll Àird ann an 1942 — Image caption,
Tha an dealbh seo a' sealltainn bhuill dhen Arm, dhen Nèibhidh agus de dh'Fheachd an Adhair (RAF) aig Caisteal an Toll Àird ann an 1942. Thàinig na mìltean fheachdan a dh'Alba agus iad a' dèanamh deiseil airson a dhol air tìr ann an Afraga a Tuath, an Sicily agus sna Tìrean Ìosal, a bharrachd air Normandy air D-Day.

Dealbh dubh is geal de thrèanadh airson ionnsachadh mu dhol air tìr air tràigh faisg air Caisteal an Toll Àird — Image caption,
Tha an dealbh seo a' sealltainn bhuill dhen RAF a bha fo thrèanadh agus iad ag ionnsachadh mu dhol air tìr air tràigh faisg air Caisteal an Toll Àird as t-samhradh 1943. Bhiodh bàtaichean mòra a bhiodh a' giùlan thancaichean is charbadan a' cleachdadh a' chaisteil. Bha trèanadh le bàtaichean na bu lugha a' dol air adhart ann an Inbhir Aora.

Dè thachair dha na caistealan an dèidh an Dara Cogaidh?

An dèidh an Dara Cogaidh, chaidh mòran dhe na caistealan a thilleadh chun an fheadhainn leis an robh iad. Chaidh beagan dhiubh a dhèanamh nan taighean-òsta agus chaidh feadhainn eile nan tobhtaichean.

An robh fios agad gun deach cuid de chaistealan Alba a chleachdadh aig àm an Dara Cogaidh?

Carson a bha caistealan feumail aig àm an Dara Cogaidh?

Dè thachair dha na caistealan an dèidh an Dara Cogaidh?

More on Caistealan