Earrann èisteachd mun eadar-lìon
Dreach luath
Anns an earrainn seo:
- tha pìos èisteachd mun eadar-lìon
- thèid coimhead ri diofar sheòrsaichean cheistean, mar eisimpleir ceistean tuigse, anailis agus luachadh
- thèid eisimpleirean a thoirt air dòighean freagarrach air na ceistean sin a fhreagairt
- bheir an quiz cothrom barrachd mìneachaidh fhaighinn air diofar fhaclan is abairtean a nochdas san earrainn
Ionnsaich barrachd
Sgilean
Tha tuigse, mion-sgrùdadh agus luachadh cudromach ann an gnìomhan èisteachd. Gheibh thu comharraidhean airson dearbhadh gun do thuig thu prìomh bheachdan na h-earrainn agus airson sealltainn gun urrainn dhut anailis is luachadh a dhèanamh air dòigh bruidhinn agus puingean an neach-labhairt.
Seòrsaichean cheistean
Bidh diofar sheòrsaichean cheistean ann an gnìomh èisteachd. Seo eisimpleirean, ged nach e liosta choileanta a th' ann.
| Carson/Dè | 'S e ceist tuigse a tha seo san fheum thu freagairt phongail a thoirt seachad a tha a' dearbhadh gu bheil thu a' tuigsinn prìomh phuingean/bheachdan. |
| Mìnich/Ciamar | Feumaidh tu sealltainn mar a tha beachdan ceangailte, no feumaidh tu dàimhean eadar rudan san earrainn a dhèanamh soilleir. |
| Seall mar a tha | 'S e ceist anailis a tha seo san fheum thu sgrùdadh a dhèanamh air mar a chaidh cànan no sgilean teicnigeach a chleachdadh airson buaidh a thoirt air an earrainn. |
| Carson, nad bheachd | Feumaidh tu beachd pearsanta a thoirt seachad, stèidhichte air na chuala tu san earrainn, mar as trice le fianais no adhbhar airson am beachd agad a neartachadh. |
Chan fheum thu freagairtean a chur nad fhaclan fhèin, mura h-iarr a' cheist sin.
An t-eadar-lìon - earrann èisteachd
Image source, Stockbroker / ALAMYSeo cothrom sgilean èisteachd a leasachadh le earrann mun eadar-lìon.
Leugh na ceistean mus èist thu ris an earrainn, an uair sin, èist agus freagair na ceistean.
Image source, Stockbroker / ALAMYBeachdan air na buannachdan agus na h-eas-bhuannachdan a tha an lùib a bhith a' cleachdadh an eadar-lìn
Tha Calum agus Anna a' toirt seachad am beachdan air na buannachdan agus na h-eas-bhuannachdan a tha an lùib a bhith a' cleachdadh an eadar-lìn.
- Beachd Chaluim
Chan urrainn dhòmhsa a bhith daonnan cinnteach gu bheil an t-eòlas a gheibh mi bhon eadar-lìon gu tur fìor, oir tha e doirbh dhomh a dhearbhadh. Agus ma stèidhicheas mi mo bheachdan air fiosrachadh bhon eadar-lìon, nì e dragh dhomh gum faodar cur às mo leth nach eil mo bheachdan ach tuathal agus mì-reusanta. Mar as motha a tha de dhaoine a' cleachdadh an eadar-lìn, 's ann as motha a tha cothrom aig eucoirich brath a ghabhail air cùisean. Ma chuireas sinn rud air-loidhne cha mhòr gun gabh e a thoirt às, agus faodaidh sin a bhith gu math cunnartach.
Faodaidh droch bhuaidh a bhith aig an eadar-lìon air daoine òga gu sònraichte, oir tha ceannaircich ga chleachdadh airson am beachdan fhèin a sgaoileadh. Tha eagal orm gur iomadh duine òg, neoichiontach a chaidh ionnsachadh air sgàth sin gu ceannairceachd no eucoir a ghabhail os làimh. Faodaidh comas dhaoine air rud sam bith fhoillseachadh air-loidhne cron mòr a dhèanamh air an fheadhainn as laige. Abair gu bheil an t-eadar-lìon goireasach aig amannan, ach tha cunnartan mòra na chois. Uaireannan nì e barrachd cron na nì e de dh'fheum!
- Beachd Anna
Tha an t-eadar-lìon air leth feumail ann a bhith a' toirt fiosrachadh dhuinn mu mhìltean mòra de chuspairean. Chan eil am mòr-shluagh idir cho gòrach 's gun gabh iad ri gach nì a leughas iad, gun smaoineachadh no sgrùdadh a dhèanamh orra. Agus chan eil an t-eadar-lìon eadar-dhealaichte bho mheadhanan eile san dòigh seo. Cluinnidh sinn mòran mu bhriseadh a-steach air ar beatha phrìobhaideach, ach tha e furasta sin a sheachnadh ma chuireas sinn romhainn fiosrachadh pearsanta mu ar deidhinn fhìn a chumail à làmhan choigreach. Agus nach eil e math gu bheil an t-eadar-lìon a' ceadachadh dhuinn a bhith a' deasbad ri chèile le saorsa, mu nithean cudromach ar beatha, le cothrom a thoirt dhuinn ar beachdan a thoirt do leughadairean eile.
Is e foghlam rud sònraichte airson a bheil an t-eadar-lìon air leth feumail, oir feumaidh oileanaich a bhith a' leughadh 's a' rannsachadh, agus cha mhòr gu bheil cuspair fon ghrèin mu nach fhaigh sinn fiosrachadh, dìreach le putan no dhà a bhruthadh air meur-chlàr a' choimpiutair. Goireas air leth, saoilidh mise. Agus ged a dh'fheumas sinn a chleachdadh gu ciallach, cha chòir dhuinn dìmeas a dhèanamh air.
Ceistean air an earrainn
Beachd Chaluim
- Dè na teagamhan a th' aig Calum mun fhiosrachadh a gheibh e bhon eadar-lìon?
Chan urrainn dha a bhith gu tur cinnteach gu bheil am fiosrachadh fìor.
Tha e doirbh dha am fiosrachadh a dhearbhadh.
2(a) Ainmich dà chunnart a tha Calum a' faicinn mun eadar-lìon.
- Tha barrachd cothrom aig eucoirich brath a ghabhail air gnothaichean.
- Tha e doirbh rud a chuireas tu air an eadar-lìon a thoirt a-nuas.
2(b) Ciamar a dh'fhaodas droch bhuaidh a bhith aig an eadar-lìon air òigridh?
Bidh ceannaircich ga chleachdadh airson am beachdan a sgaoileadh.
- Cò gu sònraichte air am faod an t-eadar-lìon cron a dhèanamh?
Air an fheadhainn as laige.
- Nad bheachd-sa, dè an teachdaireachd as cudromaiche a tha Calum a' toirt seachad san aithris aige? Cleachd fianais nad fhreagairt.
"Uaireannan nì e barrachd cron na nì e de dh'fheum!"
Tha Calum a' toirt seachad a' bheachd gu bheil an t-eadar-lìon làn chunnartan agus, mura toir sinn feart air na h-eas-bhuannachdan seo, gum faod iad aig amannan bàrr a thoirt air buannachdan an eadar-lìn.
Comhairle: ann an ceistean den t-seòrsa seo, chan eil freagairt 'cheart' no 'cheàrr' ann - feumaidh tu beachd a thoirt seachad le mìneachadh agus fianais, mar eisimpleir geàrr-chunntas air na chaidh a ràdh no beachd air an stoidhle a rèir is dè tha a' cheist ag iarraidh. Chan fheum thu fianais a thoirt facal air an fhacal às an earrann èisteachd, ged a dh'fhaodas tu ma thogras tu.
Beachd Anna
- Dè am beachd a tha aig Anna air a' mhòr-chuid de dhaoine a bhios a' cleachdadh an eadar-lìn?
Gu bheil am mòr-shluagh glic gu leòr airson smaoineachadh agus sgrùdadh a dhèanamh air na rudan a chì iad air an eadar-lìon.
- Ciamar, a rèir Anna, as urrainn dhuinn briseadh a-steach air ar beatha a sheachnadh?
Le bhith a' cumail ar fiosrachadh pearsanta dìomhair bho dhaoine nach aithne dhuinn.
- Ciamar a tha an t-eadar-lìon math airson co-obrachadh le daoine eile?
Tha e a' ceadachadh dhuinn a bhith a' deasbad ri chèile a thaobh rudan cudromach nar beatha.
Tha e a' toirt cothrom dhuinn ar beachdan innse do dhaoine eile.
- Ainmich dà dhòigh, a rèir Anna, sa bheil an t-eadar-lìon feumail do dh'oileanaich.
Tha e feumail airson rannsachadh.
Gheibhear fiosrachadh air cha mhòr a h-uile seòrsa cuspair.
- Beachdaich air stoidhle labhairt Anna. Seall mar a tha i soirbheachail ann a bhith a' toirt seachad a beachdan. Na tog air freagairt a chleachd thu mar-thà.
"Agus ged a dh'fheumas sinn a chleachdadh gu ciallach"
Le bhith a' cleachdadh an fhacail "sinn", tha Anna a' cur ris an dòigh labhairt mhisneachail, dhòchasach is a' brosnachadh an neach-èisteachd a dhol leatha a thaobh nam puingean a tha i a' dèanamh.
Comhairle: ann an ceistean den t-seòrsa seo, chan eil freagairt 'cheart' no 'cheàrr' ann - feumaidh tu beachd a thoirt seachad le mìneachadh agus fianais, mar eisimpleir geàrr-chunntas air na chaidh a ràdh no beachd air an stoidhle a rèir is dè tha a' cheist ag iarraidh. Chan fheum thu fianais a thoirt facal air an fhacal às an earrann èisteachd, ged a dh'fhaodas tu ma thogras tu.
Feuch dè na dh'ionnsaich thu
Quiz
Ath-shùil air na dh'ionnsaich thu
Nochdaidh diofar sheòrsaichean cheistean ann an gnìomh èisteachd. Tha cuid sa chlàr.
| Ceist | Na tha ri dhèanamh san fhreagairt |
|---|---|
| Carson/Dè | Ceist tuigse san fheum thu freagairt phongail a thoirt seachad a tha a' dearbhadh do thuigse air prìomh phuingean/bheachdan. |
| Mìnich/Ciamar | Seall mar a tha beachdan ceangailte, no dèan dàimhean eadar rudan san earrainn soilleir. |
| Seall mar a tha | Ceist anailis san fheum thu sgrùdadh a dhèanamh air mar a chaidh cànan no sgilean teicnigeach a chleachdadh airson buaidh a thoirt air an earrainn. |
| Carson, nad bheachd | Beachd pearsanta ri thoirt seachad, stèidhichte air na chuala tu san earrainn, mar as trice le fianais no adhbhar airson am beachd agad a neartachadh. |
More on Èisteachd
Find out more by working through a topic
- count4 of 4
- count1 of 4
- count2 of 4
