Kadırov Putin tənqidçisinin tüfəng hədəfində videosunu yayıb
Şəklin mənbəyi, Instagram screenshot
Çeçenistan rəhbəri Ramzan Kadırov Instagram səhifəsində müxalifətçi Mixail Kasyanovun əks olunduğu videoçarx dərc etdirib.
Video elə hazırlanıb kı, sankı Kasyanov snayper tüfənginin nişangahına salınıb.
Kadırovun yerləşdirdiyi videoda kadrlar "Kasyanov Strasburqa Rusiya müxalifəti üçün pul yığmağa yollanıb, anlamayan anlayacaq" yazısı ilə müşayiət olunur.
Parnas partiyasında Kasyanovun həmkarı İlya Yaşin, dərc olunmuş videonun birbaşa ölüm təhdidi olduğunu bəyan edib.
Yanvar ayında Kadırov Rusiyanın qeyri-sistemli müxalifətini ölkənin siyasi quruluşunu "laxlatmağa" cəhd göstərən "xalq düşmənləri" adlandırmışdı.
Siyasətçinin fikrincə, müxalifətçilər "təxribatçı fəaliyyətə" görə mühakimə olunmalıdırlar.
Həmin bəyanatlar hüquq müdafiəçiləri və müxalifətçilər tərəfindən kəskin tənqidlə qarşılanmışdı.
Şəklin mənbəyi, RIA Novosti
Lakin Rusiya prezidentinin mətbuat katibi Dmitri Peskov Çeçenistan başçısının bəyanatı ətrafında vəziyyəti gərginləşdirməməyə çağıraraq, "deyilənləri sakitcə oxumaq" lazım olduğunu qeyd edib.
Peskov: Instagramı izləmirik
Şəklin mənbəyi, Getty
Prezident Putinin mətbuat katibi Dmitri Peskovun sözlərinə görə, Kremldə Çeçenistan başçısı Ramzan Kadırovun Instagramı izlənilmir və Kadırovun yaydığı videonu şərh etmirlər.
"Açığını desək, biz ümumiyyətlə Instagramı izləmirik, o cümlədən, Kadırovun Insaqramını da", Peskov İnterfaks agentliyinə bildirib.
"Mən KİV-də bu xəbərləri görmüşəm. Söhbətin nədən getdiyinə baxıb, düşünürəm ki, axşamdək nə isə deyə bilərəm", Vladimir Putinin mətbuat katibi söz verib.
