በኬንያ በ10 ዓመት ጊዜ ውስጥ የሕዝብ ቁጥር 9 ሚሊዮን ጨመረ

እንደ አውሮፓውያኑ አቆጣጠር በ2019 የተደረገው የኬንያ የሕዝብ ቆጠራ ዛሬ ይፋ ተደርጓል።

የዘንድሮው ሕዝብ ቆጠራ ካለፈው ቆጠራ ጋር ሲነጻጸር በ10 ዓመት ጊዜ ውስጥ ኬንያ 9 ሚሊዮን ተጨማሪ ኬንያዊያንን አግኝታለች ተብሏል። አጠቃላይ የሕዝብ ብዛቷም ወደ 47.5 ሚሊዮን ማደጉ ታውቋል።

•ኬንያ እያካሄደች ላለችው የህዝብና ቤት ቆጠራ 140ሺ ፖሊሶችን አሰማራች

•ኬንያ ሺሻን አገደች

ይህ የሕዝብ ቆጠራ ከነጻነት በኋላ ኬንያ ያደረገችው ስድስተኛ የሕዝብ ቆጠራ ሲሆን ያለወረቀት የቴክኖሎጂ ውጤቶችን በመጠቀም የተደረገ ነው።

ከእስካሁኑ ቆጠራ በተለየ መልኩም በዚህኛው ቆጠራ ወንድም ሴትም ያልሆኑ (intersex) ዜጎች ራሳቸውን ከሁለቱም ጾታ አግልለው ተቆጥረውበታል።

የአገሪቱ ብሔራዊ ስታትስቲክስ ቢሮ ይፋ ያደረገው መረጃ እንደሚያመለክተው በቆጠራው ውጤት 24 ሚሊዮን ሴቶች፣ 23.5 ሚሊዮን ወንዶችና ከ1500 በላይ ወንድም ሴትም ያልሆኑ ዜጎች የኬንያ የጾታ ስብጥር መሆኑ ታውቋል።

•"በሥልጣን ላይ ያለውን መንግሥት ተቀባይነት ማሳጣት የሚሹ ግጭቱን አባብሰውታል" ቢልለኔ ስዩም

አገሪቱ ካሏት 47 ግዛቶች መካከል ብዙ ሕዝብ የሚኖርባት ግዛት በመሆን መዲናዋ ናይሮቢ ቀዳሚ ሆናለች። 4.4 ሚሊዮን ሕዝብም በመዲናዋ ይኖርባታል ተብሏል።

ፕሬዝዳንት ኡሁሩ ኬንያታ የሕዝብ ቁጥሩ ይፋ መደረጉን ተከትሎ "የተጨመረው የሕዝብ ቁጥር የልማት ፖሊሲያችንንና ፕሮግራማችንን እንደገና ለመከለስ መሳሪያ ይሆነናል" ብለዋል።