Shumë nga pronat publike janë shkatërruar nga mospërdorimi

Zëvendësministri shqiptar i ekonomisë Leonard Beqiri i tha BBC se një pjesë e këtyre pronave nuk janë më në shërbim publik dhe pronarët e tyre gëzojnë të drejtën e parablerjes.

Zëvendësministri i Ekonomisë, Leonard Beqirin flet për BBC-në

Sipas tij, ky proces synon edhe vënien në qarkullim të burimeve të rëndësishme ekonomike.

Qeveria shqiptare po vazhdon me intensitet procesin për privatizimin e pronave shtetërore.

Ajo synon që pjesa më e madhe e këtij procesi, rreth 70 për qind, të përfundojë në vitin 2011.

Procesi i privatizimit i nisur prej kohësh në Shqipëri pritet të hyjë këtë vit në një faze më intensive.

Pas privatizimit vitet e kaluara të disa ndërmarrjeve të cilësuara si strategjike, viti 2010 është cilësuar si viti i privatizimeve të rëndësishme të pronës shtetërore.

Procesi i privatizimit të pronave shtetërore në Shqipëri është shoqëruar me jo pak polemika, veçanërisht midis kampeve politike.

Por zoti Beqiri premton se gjithçka në procesin që sapo ka nisur, do të jetë transparente, "për të minimizuar çdo lloj spekullimi dhe për t’i ardhur në ndihmë të gjithë qytetarëve".