ODIHR-i raporton për përgatitjen e zgjedhjeve në Shqipëri

Shqetësimi kryesor i ngritur në raport është çështja e listave të zgjedhësve.

"Janë vënë re se pjesëtarë të së njëjtës familje gjenden të regjistruar në zona të ndryshme zgjedhore," vë në dukje raporti.

Ai shton se shumë njerëzve nuk u është identifikar vendbanimi për shkak të lëvizjeve të brendshme të popullsisë. Problemet janë vënë re në Durrës, Vlorë, Shkodër dhe Fier.

Një shqetësim i veçantë nënvizohet nga vëzhguesit ndërkombëtarë lidhur me çështjen e koalicioneve formale që partitë e mëdha kanë krijuar për të përfituar sa më shumë vota për aleatët nga sistemi proporcional.

Strategji të tilla, thuhet në raport, "mund të ulin efektivitetin e sistemit elektoral dhe përmbushjen e objektivave të kushtetutës, e cila sanksionon ndarjen e pushtetit legjislativ në përputhje me votat e fituara".