Saif Gaddafi tha se opozita kishte marrë kontrollin e qytetit Benghazi

Ditën e djelë për disa orë, rrugët u mbushën me turma njerëzish që hidhin parrulla për rrëzimin e qeverisë së kolonelit Gaddafi.

Gjatë protestës janë dëgjuar vazhdimisht të shtëna me armë, ndërsa në mbarë qytetin kanë lëvizur shtëllungat e gazit lotsjellës.

Disa ndërtesave u vu zjarri, përfshirë edhe rajone të policisë.

Në agim, qendra e qytetit u duk e qetë, megjithëse janë dëgjuar vazhdimisht të shtëna sporadike me armë.

Ende nuk ka informacione lidhur me vendndodhjen e Kolonelit Gaddafi, i cili nuk është parë në publik që prej ditës së premte.

Një prej djemve të udhëheqësit libian, Saif al-Islam al-Gaddafi, e ka pranuar gjatë një fjalimi në televizion se qytetet lindore, Benghazi dhe Bayda janë marrë në kontroll nga opozita.

Ai e pranoi se policia dhe ushtria kishin bërë disa gabime në mënyrën se si ishin sjellë me turmat e zemëruara.

Megjithatë ai këmbënguli se numri i të vrarëve ishte më i vogël, sesa raportohej.

Saif Gaddafi tha se ushtria libiane, nën komandën e babait të tij, ishte ende e fortë dhe mijëra mbështetës besnikë të tij po i drejtoheshin kryeqytetit për ta mbrojtur Kolonelin Gaddafi.

Ai premtoi se do të kishte reforma të shpejta ekonomike dhe se parlamenti libian ishte thirrur për të hartuar ligje më liberale.