Nazim Rashidi BBC, Shkup

	Të kthyerit thanë se autoritetet tuniziane ishin kujdesur për turistët

Tetë shtetas janë larguar me ndihmën e qeverisë serbe.

Të sapokthyerit e përshkruajnë situatën atje si “turbulente”, por shtojnë se autoritetet kishin treguar kujdes të veçantë ndaj turistëve.

Njëri prej atyre që u largua nga Tunizia është Nusret Maksuti:

“Ndodhi ajo që ndodhi, një revoltë e popullatës ndaj shtetit dhe qeverisë," thotë ai.

I pyetur për situatën zoti Maksuti shprehet se ajo “ishte e rrezikshme, por për turistët jo. Për ata ka pasur siguri dhe mbrojtje”.

Autoritet në Shkup thonë se presin që nga Tunizia të tërhiqen edhe shtetas të tjerë.

Ata gjatë ditës duhet të mbërrijnë një herë në Beograd, pasi qeveria atje është duke ndërmarrë operacionet e tërheqjes edhe për shtetasit e Maqedonisë.

Shtetasit e Maqedonisë në Tunizi, kryesisht ishin atje për të punuar edhe pse fillimisht u mendua se ata ishin për turizëm.

Aktualisht mendohet se në Tunizi janë dhjetëra shtetas të Maqedonisë.