Robert Goro BBC, Athinë

	Qeveria greke po ngre taksat dhe ul shpenzimet për ekonominë

Ata kanë kërkuar marrjen e masave shtesë, ndërsa kanë theksuar se Greqia duhet t’i zgjidhë vetë problemet e saj.

Sipas analistëve grekë, programi që u prezantua nga ministri i Financave, është pritur me rezervë dhe skepticizëm.

Ata kanë vlerësuar se programi është në kahun e duhur, por sipas analistëve kanë vënë në dyshim realizimin e objektivave brenda afateve kohore që ka përcaktuar qeveria greke.

Presidenti i Eurogrupit, Jean-Claude Juncker, e ka vlerësuar programin si një hap të parë pozitiv, por ka theksuar se paketa e masave nuk është kaq e ashpër, sa të sigurojë vetvetiu suksesin.

“Besojmë se grekët marrin masa në drejtimin e duhur, por këto masa nuk janë absolutisht të mjaftueshme për përballimin e gjendjes, ka thënë zoti Juncker, duke shtuar se Greqia po tregon vullnet të mirë dhe se shtetet anëtare do të duhet të kenë një qëndrim të përbashkët për mbështetjen e Greqisë.

Masat që sugjerohen kanë të bëjnë me shumë me krijimin e garancive të forta se do të realizohen parashikimet për rritjen e të ardhurave nëpërmjet vjeljes së taksave dhe tatimeve, si dhe reduktimi i shpenzimeve buxhetore.

Ende nuk janë propozuar masa konkrete, pasi shqyrtimi i programit vazhdon, si nga ana e ekspertëve të komisionit, aq edhe nga mbledhja e ministrave të financave që zhvillohet të martën.

Gjithsesi, ministri grek i Financave ka deklaruar se ekziston edhe një plan B, me masa më të ashpra, në rast se programi i tanishëm nuk merr miratimin e Komisionit Europian.

Ministri gjithashtu ka theksuar gatishmërinë që të merret çdo masë shtesë, me qëllim që të realizohen objektivat ambiciozë të programit të stabilitetit.