Udhëheqësit botërorë po mblidhen në samitin e klimës në Kopenhagë

Takimi përfundon ditën e premte, por një korrespondent i BBC-së që ka ndjekur negociatat thotë se ato kanë ngecur në argumente që reflektojnë ndarjet e thella mes vendeve të pasura dhe atyre të varfëra.

Shpresohet që udhëheqësit t'i japin një dinamikë procesit, por korrespondenti i BBC-së thotë se mosmarrëveshjet e vazhdueshme do të thonë që ata përballen me një detyrë të vështirë.

Duke folur për BBC-në Sekretari i Përgjithshëm i OKB-së, Ban Ki-moon, tha se kishte shpresë që delegatët do t'i linin mënjanë dallimet dhe të bënin përparim të vërtetë në takim.

"Jam optimist që Kopenhaga mund të jetë një sukses dhe të ketë një marrëveshje të pranuar, një marrëveshje të drejtë, të qartë e që do të jetë një traktat i detyrueshëm nga ana ligjore, sa më shpejt të jetë e mundur në 2010."

"Kjo marrëveshje do të mbulojë të gjitha elementet që po shqyrtohen dhe që do të na çojë drejt rrugës për zvogëlimin e temperaturave globale brenda 2 gradëve."

"Një reagim i shumicës së udhëheqësve botërorë sinjalizon se ka një angazhim politik dhe vullnet për të vulosur një marrëveshje në Kopenhagë," tha Sekretari i Përgjithshëm i OKB-së.

Zoti Ban theksoi që udhëheqësit botërorë nevojitet të prezantojnë më shumë propozime ambicioze me qëllim që të ulin ngrohjen globale.

"Shumë vende kanë ardhur me objektiva ambicioze, si nga vendet e industrializuara dhe vendet në zhvillim."

"Kjo është shumë domethënëse. Fakti kryesor që më shumë se 135 udhëheqës botërorë mblidhen këtu, do të thotë se do të kemi një rezultat të shëndoshë dhe të rëndësishëm në Kopenhagë."

"E teksa shumë vende kanë ardhur me objektiva ambicioze, ka ende vende të tjera që duhet të bëjnë më shumë."

"Ne kemi nevojë për një mbështetje të plotë dhe kolektive për të shpëtuar planetin Tokë nga ngrohja globale," tha ai.

Vendet në zhvillim kanë kritikuar Shtetet e Bashkaura që kanë premtuar ulje më shumë konservatore të emetimeve, sesa kishin shpresuar shumë vetë.

Presidenti Obama përmendi vështirësitë e brendhsme.

Por zoti Ban tha se këto çështje nuk duhet t'i pengonin delegatët që të arrinin marrëveshje në samit.

"Nuk është vetëm SHBA-ja që po përballet me vështirësi të brendshme, çdo vend ka probleme, unë e di këtë."

"Por kjo është një sfidë globale, që kërkon përgjigje globale me solidaritet global," tha Sekretari i Përgjithshëm i OKB-së.