Jane O'Brien Korrespondente e BBC-së

	Të dy kandidatët e përqëndruan debatin tek çështjet e tyre prioritare

Ai u karakterizua nga shkëmbime të mprehta deklaratash për ekonominë dhe politikën e jashtme.

Zoti Obama e portretizoi politikën taksore të zotit McCain si fitimprurëse për drejtorët e pasur ekzekutivë, kurse zoti McCain tha se në thelb zoti Obama ishte një person që dëshironte t'i rriste taksat.

Debati u zhvillua në një mënyrë më të afërt dhe intime, në hollin e bashkisë ku dy kandidatë kishin mundësi të lëviznin lirshëm dhe t'i afroheshin audiencës teksa bënin deklaratat e tyre.

Në disa raste ata sulmuan njëri-tjetrit gjë që u bëri jehonë fushatave të tyre që po bëhen gjithnjë e më shumë negative.

Politika e jashtme ishte ajo që solli edhe konfrontimin më personal të mbrëmjes, ku zoti Obama u përpoq ta nxirrte zotin McCain si luftë nxitës.

"Nuk është e vërtetë", u përgjigj McCain që nga ana e tij u përpoq ta portretizonte Obamën si një person që ishte në mënyrë të rrezikshme pa eksperiencë.

Që kur patën debatin e fundit mes tyre dy javë më parë, kriza financiare i detyroi ata ta përqëndronin përsëri tek ekonomia, fushatën për Shtëpinë e Bardhë.

Ajo dominoi axhendën e debatit dhe shumë prej publikut në sallë bëri pyetje të lidhura me ekonominë.

Një zgjedhëse pyeti nëse mund t'i besonte paratë e saj secilit prej kandidatëve, kur fajësoi si republikanët ashtu edhe demokratët për krizën.

Sondazhet e fundit tregojnë se Barack Obama është përpara republikanit John McCain.