Bush dhe Putin diskutojnë çështje serioze pas udhëtimeve argëtuese

Ata filluan bisedimet joformale në pronën e familjes Bush në Kennebunkport pasi udhëtimi i peshkimit me anije të hënën në mëngjes dhe darka me karavidhe mbrëmë i lanë vendin diplomacisë serioze, ndërsa ata përballen me çështjet kryesore që ndajnë Uashingtonin dhe Moskën.

Çështjet para tyre janë të vështira: mosmarrëveshje për fatin e Kosovës, demokracinë në Rusi, planet për mbrojtjen raketore amerikane.

Të dy palët janë munduar t'i mbajnë të ulta shpresat për ndonjë arritje të madhe, por sekretari i përgjithshëm i OKB-së Ban Ki-moon e mbajti lart presionin për arritjen e një marrëveshjeje duke shprehur shpresë se takimi do të çojë në përparim për pavarësinë e Kosovës.

Gjatë një konference shtypi në Gjenevë, zoti Ban tha se vonesat e mëtejshme në votimin në Këshillin e Sigurimit të OKB-së për të ardhmen e Kosovës do të ishin të padëshirueshme, duke përmendur shqetësimin për paqen dhe sigurinë në Ballkan dhe të gjithë Evropën.

Ai tha se shpresonte që takimi Bush-Putin "do të gjejë një zgjidhje të mirë për këtë çështje".