Mike Sargeant BBC, Nju Jork

	Raporti i Agjencisë Atomike thotë se Irani nuk ka pezulluar pasurimin

Raporti thotë se pasurimi i uraniumit po vazhdon në Iran, por se është i kufizuar.

Raporti gjithashtu thotë se pyetje të reja kanë dalë lidhur me shtrirjen dhe natyrën e programit bërthamor të Iranit gjatë inspektimeve të kohëve të fundit.

Raporti nuk është specifik për këto pyetje.

Një zyrtar pranë agjencisë atomike tha se gjërat kanë mbetur në vend, përsa i përket zgjidhjes së çështjeve që qëndrojnë prej kohësh që do të sqaronin nëse programi i bërthmaor i Iranit është paqësor apo ka aspekte ushtarake.

Natyra negative e raportit duket se do të sjellë thirrje të reja për sanksione ndërkombëtare kundër Teheranit.

Përpjekjet për të bindur

Në fillim të këtij viti vendet e Këshillit të Sigurimit i ofruan Iranit, Kulaçin dhe Kërbaçin, - një paketë nxitëse masash për të pezulluar programin e pasurimit të uraniumit, por edhe një afat të palëkundshsëm për ta përmbushur atë.

Agjencia e Kombeve të Bashkuara për Energjinë Atomike, pritet që të prezantojë një raport, përmes të cilit do të tregohet nëse Irani ka dhënë apo jo ndonjë shenja se është duke e ndaluar programin bërthamor.

Por në fillim të kësaj jave, presidenti i Iranit, Mahmoud Ahmadinaxhad dha një përgjigje shumë të qartë.

Ai tha se programi bërthamor për qëllime paqësore ishte një e drejtë e kombit iranian dhe asnjë nuk mund ta ndalonte atë.

Irani ka bërë thirrje për negociata të mëtejshme. Disa anëtarë të Këshillit të Sigurimit e kanë bërë të qartë se po e humbin durimin.

Shtetet e Bashkuara dhe Britania duan që të hartojnë një rezolutë muajin e ardhshëm, rezolutë e cila do të autorizojë sanksione ndaj Iranit.

Por se çfarë forme do të kenë këto sanksione, pritet që të vendoset.

Rusia dhe Kina, që kanë të drejtën e vetos në Këshillin e Sigurimit, kanë bërë thirrje për durim dhe kanë thënë se ato nuk do të mbështesin ndërshkime të rënda.