Brìgh nam Facal
Tagh na facail a th' air an comharrachadh airson mìneachadh fhaighinn
An Tobar
- Tha tobar beag am meadhan a' bhaile
- 's am feur ga fhalach,
- am feur gorm sùghor ga dhlùth thughadh,
- fhuair mi brath air bho sheann chaillich,
- ach thuirt i, "Tha 'm frith-rathad fo raineach
- far am minig a choisich mi lem chogan,
- 's tha 'n cogan fhèin air dèabhadh."
- Nuair sheall mi 'na h-aodann preasach
- chunnaic mi 'n raineach a' fàs mu thobar a sùilean
- 's ga fhalach bho shireadh 's bho rùintean,
- 's ga dhùnadh 's ga dhùnadh.
- "Cha tèid duine an diugh don tobar tha sin,"
- thuirt a' chailleach, "mar a chaidh sinne
- nuair a bha sinn òg,
- ged tha 'm bùrn ann cho brèagh 's cho geal."
- 'S nuair sheall mi tron raineach 'na sùilean
- chunnaic mi lainnir a' bhùirn ud
- a ni slàn gach ciùrradh
- gu ruig ciùrradh cridhe.
- "Is feuch an tadhail thu dhòmhsa,"
- thuirt a' chailleach, "ga b' ann le meòirean,
- 's thoir thugam boinne den uisge chruaidh sin
- a bheir rudhach gum ghruaidhean."
- Lorg mi an tobar air èiginn
- 's ged nach b' ise bu mhotha feum air
- 's ann thuice a thug mi 'n eudail.
- Dh'fhaodadh nach eil anns an tobar
- ach nì a chunnaic mi 'm bruadar,
- oir nuair chaidh mi an diugh ga shireadh
- cha d' fhuair mi ach raineach is luachair,
- 's tha sùilean na caillich dùinte
- 's tha lì air tighinn air an luathghair.
An Tobar
Nuair a dh'fhalbhas a' Ghàidhlig
Tagh na facail a th' air an comharrachadh ann an dearg airson mìneachadh fhaighinn.
