Ọkùnrin tó ń bá òkú gbé láti ọgbọ̀n ọdún sẹ́yìn kó sí gbaga ọlọ́pàá

Ọ̀rọ̀ burúkú tòun tẹ̀rín, arákùnrin kan tí orúkọ rẹ̀ ń jẹ́ Julio ní orílẹ̀ èdè Peru ni ó ti ń wí tẹnu rẹ̀ báyìí ní àgọ́ ọlọ́pàá.

Ohun tí ó ń wí tẹnu rẹ̀ lé lórí kò ṣẹ̀yìn bí àwọn ọlọ́pàá ṣe bá òkú gbígbẹ kan nínú báàgì tó máa ń mú nǹkan tutù rẹ̀.

Julio ní láti bíi ọgbọ̀n ọdún sẹ́yìn ní òun àti òkú náà ti ń gbé tí òun sì máa ń ṣe ìtọ́jú òkú náà dáradára.

Ó ní Juanita ni orúkọ tí òun fún òkú náà àti pé bí ọ̀rẹ́bìnrin nínú ẹ̀mí ni òkú náà jẹ́ sí òun.

Àwọn onímọ̀ ní ó ṣeéṣe kí òkú náà ti kú láti ẹgbẹ̀ta sí ẹgbẹ̀rin ọdún sẹ́yìn gẹ́gẹ́ bí ìwádìí orí rẹ̀ ṣe fi múlẹ̀.

Julio ṣì wà ní àhámọ́ ọlọ́pàá níbi tí wọ́n ti ń fi ọ̀rọ̀ wa lẹ́nu wò láti mọ ohun tó fa ìgbésẹ̀ rẹ̀.