Ироқ: Сурия ИШИД жиҳодчиларига қарши ҳаво ҳужумини амалга оширди

Ироқ Бош вазири Нури Маликийнинг Би-би-сига тасдиқлашича, Сурия Ироқ ҳудудидаги Ироқ ва Шом Давлати жангариларига қарши ҳаво ҳужумларини амалга оширган.

Нури Маликийга кўра, Сурия қирувчи учоқлари сешанба куни чегарадаги Қаим шаҳридаги жангарилар манзилларини нишонга олган.

Ироқ бундай амалиётларни ўтказишни сўрамаган бўлса ҳам, деб айтган Маликий жаноблари, ИШИД ҳаракатига нисбатан ҳар қандай ҳужумни олқишлайди.

ИШИД ва унинг сунний иттифоқчилари шу ойнинг ўзида Ироқнинг катта қисмини, жумладан мамлакатнинг иккинчи йирик шаҳри Мосулни эгаллашга муваффақ бўлганлар.

Ироқ ҳукумати бор кучи билан шимол ва ғарбдан келаётган жангарилар ҳужумини қайтаришга ҳаракат қилмоқда.

Шунингдек мусулмон шиалар алоқалари мустаҳкам боғланган Эрондан ёрдам юборилгани айтилган.

Ироқнинг асосий иттифоқчиси бўлган АҚШ жангариларни Ироқ фақат ўз кучлари билан енгишларини таъкидлайди.

Бош вазир Нури Маликий миллий бирликни сақлаб қолиш учун янги ҳукумат тузишга уринмоқда.

Ироқдаги ББС мухбири Жим Мюирнинг фикрига кўра, Сурия ҳаво ҳужумлари шуни кўрсатадики, Сурия ва Ироқ инқирози бир-бирига боғланган ва ИШИД умумий душман сифатида қаралади.

Чегаранинг Сурия томонида жангчилар ИШИДга содиқликда қасамёд қилишган. Бу иккала томонда ҳам назорат сунний жангарилар қўлига ўтганини англатади.

Ҳозирча АҚШ дронлари ҳужумда иштирок этмаган, бироқ вазиятнинг мураккаблашиши орқасида улар ҳам амалиётларни бошлаши мумкин. ИШИД ҳаракати хавфи шу пайтгача душман бўлган томонларни манфаатлар юзасидан яқинлаштиради.

Бу шунингдек, Эронга ҳам таълуқли бўлиб, Ироқдаги кутилмаган вазиятдан қаттиқ хавотирда. Хабарларга кўра, Курд шаҳарлари билан чегарада отишмалар юз берганидан сўнг Эрон ғарбий ўтиш масканларини мустаҳкамлаган.

Британия Ташқи Ишлар вазири Уилям Хейг Бағдодда сиёсий ва жамоатчилик раҳбарлари билан учрашган.

"Британия Ироқнинг дўсти сифатида ҳозирги мақсад бутун Ироқ халқини қўллайдиган ва бирга ишлайдиган ҳукумат тузилиши керак деб билади, шунда ИШИДни йўлида тўхтатиш мумкин", дейди у.

Россия учоқлари

Би-би-сига интервю берган Малики Ироқ Россия учоқларини сотиб олишини, улар бир неча кун ичида етиб келишини билдирган. АҚШ бундан олдин ўзининг Ф16 учоқлари сотилишини тўхтатиб турган эди.

Россия Президенти Путин ва ал- Маликий жума куни телефон орқали Ироқдаги вазиятни муҳокама этдилар, деб хабар беради Кремл сайти.

Путин Маликийга Ироқни террористлардан тозаланишини тўлиқ қувватлашни айтган, бироқ суҳбатнинг бошқа тафсилотлари очиқланмаган хабарда.

Ироқдан келаётган маълумотларга кўра, "Ал- Қоида"га алоқадор Нусра фронти жангчилари Ироқ чегарасига яқин Албу Камол шаҳрида ИШИДга содиқликка онт ичишган.

Илгари Сурия ичкарисида Нусра фронти ва ИШИД ҳаракати ўртасида қарама-қаршиликлар содир бўлгани маълум.

Матнда имло хатоси бўлса, бизга билдиринг.

Би-би-си Ўзбек хизмати билан Whatsapp орқали боғланишни истасангиз, телефонимиз: +44 78-58-86-00-02