Римдаги Сикстин ибодатхонасидаги кардиналларнинг икки кунлик сайлови Рим Католик черковининг 266-Папасини сайлади.
Аргентинанинг Буэнос-Айреси кардинали Хорхе Марио Берголио янги Рим Папаси этиб сайланди.
Папа этиб сайланганидан кейин 76 ёшли кардинал Папа Франциск нисбаси танлади.
Папа Францис Рим Католик черкови раҳбари этиб сайланган биринчи иезуит бўлган.
Рим Католик черковининг Иезуит Ордени эркак монахлар ордени ҳисобланади.
Орденнинг расмий номи Исус жамияти.
Иезуитлар Орденига 1534 йилда асос солинган.
Иезуитлар оқил бўлиш, камтарона ҳаёт кечириш, бўйсуниш ва Рим Папасига доим ва ҳамма масалада бўйсунишга ваъда берадилар.
Папа Франциск ҳам ўзининг камтарона ҳаёт тарзи ва ижтимоий адолатга чақириқлари билан танилган.
Папа Франциск жамоат автобусида юрган, ўзи учун ўзи овқат тайёрлаган.
2005 йилда Рим Папаси сайланганда Йозеф Ратцингер учун энг кўп овоз берилган, иккинчи ўринни кардинал Хорхе Марио Берголио эгаллаганди.
Ватикан эълон қилган таржимаи ҳолга кўра, Папа Франциск 1936 йил 17 декабрида Буэнос-Айрес шаҳрида италянлар оиласида туғилган.
У 1969 йилда Иезуитлар Орденига қабул қилинган ва Аргентина ҳамда Олмонияда таҳсил олган.
Хорхе Марио Берголио 1992 йилда епископ, 1998 йилда Буэнос-Айрес архиепископи бўлган.
Би-би-сининг Буэнос-Айресдаги мухбири хабар қилишича, Аргентинада ўз архиепископларининг Папа этиб сайланиши кўпчиликни ҳайратлантирган.
Чунки у олдинги Папа Бенедиктдан икки ёш кичик ва ёши туфайли ҳам Хорхе Марио Берголиони сайлашмаса керак, деб ўйлашган.
Янги Рим папасининг таржимаи ҳоли ҳақидаги китоб ҳаммуаллифи Францеска Амброгеттининг Reuters ахборот агентлигига айтишича, камтарлик унинг ҳаёт тарзига айланган.
Буэнос-Айресдаги унинг квартираси ибодатхона ёнидаги оддий хонадон бўлган.
"Бу унинг яшаш йўли. У метрода, автобусда юради. Римга учишга тўғри келганда учоқнинг "эконом класс"ига чипта сотиб олади.
Би-би-сининг Лотин Америкаси бўйича таҳлилчиси Эрик Камаранинг ёзишича, Рим шаҳрига келган пайтида аксар кардиналлар қизил ёки сиёҳранг халат кийишган пайтида кардинал Хорхе Марио Берголио қора халатини афзал кўрган.
Шунингдек, ўзидан олдинги архиепископнинг белбоғини ҳам ишлатиб юрган.
Рим Папаси этиб сайланганидан кейин Папа Франциск Авлиё Пётр ибодатхонаси балконига, омма олдига чиққан.
Ибодатхона олдида тўпланганларга мурожаат қилиб, ўзи ва Бенедикт XVI учун дуо қилишга чақирган.
