Янгиликлар: Америка президенти Байден Киевга сафар қилди. Путиннинг ‘янги буйруғи’, Россия Украинада нима қилди? Rossiya Ukraina Yangiliklar

Россия ва Украина атрофида нималар бўлмоқда? Сўнгги тафсилотлар.

Президент Жо Байден кутилмаганда Киевга сафар қилди.

Украина президенти Володимир Зеленский билан учрашув ортидан икки раҳбар уруш қурбонлари ёдгорлигини зиёрат қилишган.

Зеленский америкалик ҳамкасбига "сизнинг ташрифингиз барча украиналикларни қўллаб-қувватлашингизнинг муҳим бир рамзидир", деб айтган.

Байден 20-22 феврал кунлари Польшага сафар қилиши мўлжалланган, аммо Украинага ташриф ҳақида ҳеч нарса маълум эмас эди.

Президент Байден Украинага яна 500 миллион долларга тенг қурол-яроқ етказиб беришни ваъда қилган.

АҚШ Давлат котиби Энтони Блинкенга кўра, " Россия бугуноқ урушни тўхтатиши мумкин. Аммо у урушни тўхтатмаганича биз Украинага ёрдам берамиз, унинг ҳарбий қудратини мустаҳкамлаймиз ва бу билан Украина келажакдаги музокаралар чоғида мустаҳкам мавқеини эгаллайди", деб айтган.

Алоқадор мавзулар:

Хитой нима қилди?

АҚШ Давлат котиби Хитойга қарши янги айблов билан чиқди.

Энтони Блинкен CBS телеканалига интервью берди.

Унинг айтишича, Хитой Россия Армияси учун ноҳарбий жиҳозлар етказиб берган.

АҚШ Давлат котибига кўра, бу ҳақда ўзларида маълумот бор.

Энтони Блинкен Хитойга қарши айбловларида биргина шунинг ўзи билан кифояланмаган.

Унинг айтишича, Пекин Россияга ҳарбий жиҳозлар - қурол-яроғ ёки ўқ-дори ҳам бериши мумкинлигига ишонишлари учун асос бор.

АҚШ Давлат котиби яна Хитой ташқи сиёсатига масъул Ван И билан Мюньхендаги хавфсизлик анжуманида учрашган.

Энтони Блинкен уни Хитой ҳукумати Украинага қарши уруш ёки санкцияларни четлаб ўтишида Россияга ёрдам бергудек бўлса, бунинг оқибатлари жиддий бўлиши билан огоҳлантирган.

Блинкеннинг NBS телеканалига берган интервьюсида айтишича, Хитой Украина урушида Россияга моддий-техник ёрдам қилишидан ташвишдалар.

Ван И шу йил бошига қадар Хитой Ташқи ишлар вазири бўлиб ишлаган.

Жорий пайтда у Хитой Коммунистик партияси Ташқи ишлар комиссияси девонини бошқаради.

Бу орган Хитой ташқи сиёсатини назорат этади.

Хитой Ташқи ишлар вазирлиги Энтони Блинкеннинг сўзлари ва таҳдидларини беэътибор қолдирмаган.

Вазирлик вакилининг баён қилишича, "Вашингтоннинг бармоғини ўқталиб, Москва билан муносабатларига босим ўтказиши" Пекин наздида мақбул иш эмас.

Хитой бош дипломати Ван И Мюньхенда Хитой "Украинадаги можаро"ни ҳал қилиш бўйича ўз режасини тақдим этишига ваъда берган.

Унинг айтишича, ҳужжатда барча мамлакатларнинг ҳудудий яхлитлиги ҳурмат қилиниши кераклиги таъкидланади.

Аммо ҳеч ким музокаралар учун имконият кўрмаяпти.

Италия ташқи ишлар вазирига кўра, Хитой президенти 24 февраль, жума куни Россиянинг Украинага бостириб киришининг бир йиллиги санасида "тинчлик нутқи" билан чиқмоқчи.

Россиянинг анъанавий иттифоқчиси сифатида кўриб келинувчи Хитой дунёнинг энг йирик ҳарбий, ядровий ва иқтисодий қудратларидан бири бўлади.

"Инсониятга қарши жиноят?.."

АҚШ расман Россия Украинада "инсониятга қарши жиноят содир этди", деган тўхтамга келган.

Бу ҳақда АҚШ вице-президенти Мюньхендаги хавфсизлик анжумани чоғида баён қилган.

Камала Ҳаррис Россияни Украинага босқини ортидан, "даҳшатли қотиллик, қийноқ, жинсий зўравонлик ва депортациялар"да айблаган.

Россиянинг элчиси бу даъволар барчасини рад этган.

Унинг айтишича, АҚШ вице-президенти Россияни "ёмонотлиқ" қилишга уринаётир.

Камала Ҳаррис эса, анжуман иштирокчиларига бу жиноятларни содир этганлар жавобгарликка тортилиши шарт эканини айтган.

БМТ таснифида тинч аҳолини "кўп ва мунтазам ҳужумга тутиш" инсониятга қарши жиноят сирасига киради.

Расмий Москва Украина ишғоли чоғида тинч аҳолини нишонга олганлигини изчил равишда рад этиб келади.

Дунё етакчилари Мюньхен анжуманида Украинани узоқ муддатга қўллаб-қувватлашга чақиришган.

Франция президентининг истаги

Эммануэль Макроннинг айтишича, "Украинанинг ғалабасини истайди".

Аммо Россиянинг "яксон этилишига ҳам қарши", буни хоҳламайди.

Франция президенти ўзининг истаги ҳақида маҳаллий журналистлар билан суҳбати чоғида тўхталиб ўтган.

Унинг айтишича, "Россия Украинада мағлубиятга учраши, Украина эса, ўз позициясини ҳимоя қила олишини истайди".

Франция президенти тахминича, можарода ҳеч бир томон яққол устун келмайди.

"Алал-оқибат ҳаммаси ҳарбий йўл билан ечим топмаслигига ишончи комил".

Макроннинг қўшимча қилишича, у баъзилардан фарқли тарзда, уруш Россиянинг ўзига ҳам кўчишини истамайди.

Франция президентига кўра, бундай одамлар "биринчи навбатда Россиянинг тор-мор этилишини хоҳлашади".

"Бу ҳеч қачон Франциянинг позицияси бўлмаган ва бўлмайди ҳам", - дея баён қилган Эммануэль Макрон.

Франция президенти Путин билан тўғридан-тўғри алоқада бўлган кам сонли Ғарб етакчиларидан бирилигича қолаётир.

Разведка маълумотлари нима дейди?

Украина ҳарбий разведкаси фикрича, Россия президенти ўз ҳарбийларига янги буйруқ билан чиққан.

Уларга келаси ҳафталарда Донецк ва Луганскни тўлиқ эгаллашни топширган.

Расмий Киев , худди шу боис ҳам, Украинада шу яқин ҳафталарда жанглар янада шиддатли тус олади, деган ўйда.

Россиянинг эътибори ҳам сўнгги ойларда асосан Украина шарқига қаратилган.

Украинада кечаётган қақшатқич жанглар асосан худди шу минтақалар ҳисобига тўғри келади.

Украина разведкасининг янги тахминлари Россия босқинининг бир йиллиги арафасида янграган.

Путин орада бутун Россия бўйлаб қисман сафарбарлик ҳам эълон қилган, юз минглаб одамни Украина урушига сафарбар қилган.

Бу эса, айнан Украина ишғолининг бир йиллиги арафасида Россия ўзининг баҳорги амалиётларини бошлайди, яна йирик қарши ҳужумга ўтади, деган жиддий хавотирларни ҳам пайдо қилмай қўймаган.

Ғарб Украинани янада кучлироқ қуроллантириш ва кўпроқ қурол-яроғ бериш ваъдасию ҳаракатида.

Володимир Зеленский Мюнmхенга йиғилганларга уруш шу йилнинг ўзидаёқ тугаши мумкинлигини айтган. Бошқа давлатлар етакчилари эса, бу каби фикрда эмас

Рамзан Қодиров фикридан қайтдими?

Чеченистон президенти ўзининг Telegram каналида янги пост чоп қилган.

Рамзан Қодиров ўзининг бу галги постида "Вагнер" ва унинг асосчиси Евгений Пригожинни мақтаган.

Чеченистон президенти келажакда ўзининг шахсий ҳарбий компаниясига асос солишни ваъда қилган.

Унинг бу постидан бир неча соат аввал Американинг Урушни ўрганиш институти бошқача тахмин билан чиққан.

ISW Чеченистон президенти катта эҳтимол билан Пригожиннинг Россия Мудофаа вазирлигига қарши ахборот кампаниясига қўшилиш таклифни рад этгани ҳақида ёзганди.

Урушни ўрганиш институти фикрича, бу кампания Пригожиннинг заифлашиб бораётган таъсирини қайта кучайтиришга хизмат қилади.

Россия Мудофаа вазирлиги эса, ўтган ҳафта бирваракайига тўртта ҳарбий округи бошлиғини алмаштирган.

Чеченистон президенти эса, Мудофаа вазирлигидаги ҳар қандай кадрлар алмашинувини ўзининг бундан аввалги танқидлари натижасига йўйиб келади.

Telegram каналимиз: https://t.me/bbcuzbek

BBC.COM/UZBEK билан Telegram орқали +44 7858860002 номери билан боғланинг.