Мафия ва мафиози: 100 қотилликда қўли бор “қаттол” қўйиб юборилди - Italiya dunyo yangiliklar

Италияда умрбод қамоқ жазосига ҳукм қилинган номи чиққан мафиози муддатидан илгари озод қилинди. "Қаттол" лақабини олган Жованни Бруска Сицилиядаги "Коза Ностра" мафия гуруҳини бошқарган. Мафияга қарши курашган судьялардан бирини шахсан ўзи портлатиб, ўлдирган.

(Мақоладаги айрим тафсилотлар кўнгилни хира қилиши мумкин).

Италиядаги кўпчилик бундан ғазабда.

Жованни Бруска 100 дан ортиқ қотилликда қўли борлигини шахсан ўзи тан олган.

У мафияга қарши кураш олиб борган судья Жованни Фалконени ҳам рафиқаси ва уч тан қўриқчиси билан бирга ўлдирган.

Ўзи "сотқинлик"да гумон қилган мафиозилардан бирининг 11 яшар ўғлини эса, қийнаб, буғиб ўлдириш баробарида яна унинг танасини кислотада ҳам эритган.

Бруска 1996 йилда ҳибсга олинган ва бунинг ортидан, турли хил жиноятлар билан умрбод қамоқ жазосига ҳукм қилинган.

Аммо орадан 25 йил ўтиб, уни тўрт йиллик синов муҳлати билан муддатидан илгари озод қилишга қарор қилинган.

Бу Италиядаги кенг жамоатчилик ва етакчи сиёсатчиларнинг кескин норозилигига сабаб бўлган.

Тергов ва суд жараёни борган 90-йиллар бошларида Жованни Бруска ўзига берилажак жазони юмшатиш умидида мафиянинг ишлари ҳақида очиқча гапириб берган.

Ўзи ҳам аралашган 100 дан ортиқ қотиллик тафсилотларини ҳам яширмаган.

Жованни Бруска ким?

Бруска "Коза Ностре" Сицилия мафияси фаолиятида муҳим ўрин тутган.

1992 йилда мафияга қарши кураш олиб борган италиялик судья Жованни Фальконе кетаётган йўлда ярим тонна портловчи моддани шахсан ўзи портлатган.

Судья билан бирга унинг аёли ва уч тан қўриқчиси ҳам нобуд бўлган.

Ушбу қотилликдан икки ой ўтиб, мафиози Фальконенинг ҳамкасби Паоло Борселлинони ҳам ўлдирган.

Устма-уст қотиллик бутун Италияни жунбушга келтирган.

Мафияга қарши курашиш учун кескин янги қонунлар қабул қилинган.

1996 йилда ҳибсга олиниши ортидан, қамоқ жазосини қисқартириш умидида Бруска давлат қораловининг гувоҳига айланади.

Терговчиларга 1980-1990-йиллардаги қатор мафия ҳужумларига масъул шахсларни топишга ёрдам беради.

Жамоатчилик ғазабда

Жованни Брусканинг қўйиб юборилиши Италияда кўпчиликнинг ғазабини тоширган.

"Давлат - бизга қарши. Орадан 29 йил ўтди. Биз ҳамон бор ҳақиқатни билмаймиз. Оиламни барбод қилган шахс - Жованни Бруска эса озодликда", - деб айтган судья Фалконе тан қўриқчиларидан бирининг беваси.

Жованни Фальконенининг синглиси Мария эса, журналистларга ўзининг қайғуда экани, аммо бу қонун эканлиги ва Брусканинг озодликка чиқишга ҳаққи бўлганини тушунишини айтган.

Брусканинг қўйиб юборилишини италиялик айрим сиёсатчилар ҳам қоралашган.

"Италия бундан "адолат"га лойиқ эмас эди", - деб айтган, жумладан, ўнг қанот популист "Лига" партияси лидери Маттео Сальвини.

Сўлчи-центрист Демократия партия раҳбари Энрико Летта эса, буни "қоринга кутилмаганда берилган зарба"га қиёслаган.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek