Энди насронийлар ҳам “Аллоҳ” дея олишади – Олий суд рухсат берди, dunyo, musulmonlar, yangiliklar

Энди насронийлар ҳам "Аллоҳ" дея олишади - Олий суд рухсат берди. Узоқ йиллик маҳкама иши якун топди. Бунгача Малайзияда насронийлар Худога нисбатан "Аллоҳ" калимасини қўллай олишмаган. Бу мамлакатда танглик ва зўравонликларга ҳам сабаб бўлган.

Иш насронийлардан бирининг аризаси доирасида кўриб чиқилган, Аллоҳ калимаси истифода этилгани учун унинг диний материаллари мусодара этилган бўлган.

Ғайримусулмонларнинг "Аллоҳ" калимасини қўллашлари ўтмишда Малайзияда танглик ва зўравонликка ҳам сабаб бўлган.

Малайзияда мусулмонлар мамлакат аҳолисининг қарийб учдан икки қисмини ташкил этади.

Мамлакатда йирик мусулмон жамоаси ҳам яшайди.

Улар Худога мурожаатан асрлар давомида араб тилидан малай тилига кириб келган "Аллоҳ" калимасини қўллаб келишгани, бунга қўйилган тақиқ ўз ҳуқуқларини поймол этишидан шикоят қилиб келишган.

Малайзия конституциясида фуқароларнинг диний эътиқод эркинликлари таъминланган.

Аммо сўнгги йилларда мамлакатда диний танглик кучайган.

"Ноқонуний ва конституцияга зид"

2008 йилда "Аллоҳ" калимаси битилганини кўриб, малайзиялик масъуллар аэропортда насроний Жилл Айрлэнд Лоуренс Биллнинг компакт-дискларини мусодара этишади.

Бунинг ортидан, Жилл Айрлэнд Лоуренс Билл 1986 йилда киритилган тақиққа қарши қонуний даъво аризаси билан чиқади.

Мазкур тақиқ насронийларнинг ўз нашрларида "Аллоҳ" калимасини қўллашларини расман маън этади.

Орадан ўн йилдан ортиқроқ вақт ўтиб, кеча чоршанба куни Куала Лумпур Олий маҳкамаси бу хусусда бир қарорга келган - Жилл Айрлэнд Лоуренс Билл диний эътиқоди асосида камситилмаслиги лозимлигини айтган.

Судья Нор Би насронийлар "Аллоҳ" калимаси билан бирга келиб чиқиши арабча бўлган "Каъба", "Байтуллоҳ" ва "Солат"ни ҳам қўллашлари мумкин, деган қарорга келган.

У ана шу тўрт сўздан фойдаланишни тақиқлаган кўрсатма "ноқонуний" ва "конституцияга зид" эканини айтган.

Судья Нор Бига кўра, "Ўз динига эътиқод ва амал қилиш эркинлиги диний материалларга эгалик ҳуқуқини ҳам ўз ичига олиши керак".

Малайзия суди "Аллоҳ" калимасини қўллаш юзасидан биринчи марта келишмовчиликка бораётгани йўқ.

Яна бир алоҳида маҳкама ишида маҳаллий католикларнинг The Herald нашри малай тилидаги нусхасида Худога нисбатан "Аллоҳ" калимасини қўллашга изн бермагани учун ҳукуматни судга тортган.

2009 йилда қуйи маҳкама The Herald фойдасига ҳукм чиқарган ва уларга "Аллоҳ" калимасидан фойдаланишлари мумкинлигини айтган.

Маҳкаманинг бу қарори ўшанда маҳаллий мусулмонлар ва насронийлар ўртасида диний тангликнинг кучайишига ҳам олиб келган.

Бунинг ортидан, Малайзиядаги ўнлаб черков ва бир қанча масжидлар ҳужумга тутилган, уларга ўт қўйилган.

2013 йилда қарор Апелляция суди томонидан бекор қилиниб, тақиқ қайта тикланган.

The Star маҳаллий нашрининг хабар беришича, Малайзиядаги Muafakat Nasional сиёсий коалицияси Олий суднинг сўнгги ҳукмини ҳам Апелляция маҳкамасига оширишга ундаган.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek