Дунё, янгиликлар: Европада жазирама, чегарадан ошган Эрон ва Россия мудофаа вазирлиги ўйинчоқ қуролни намойиш этдими?

Эрон уранга қўйилган чекловдан хатлаб ўтмоқчи

Бундан аввалроқ Эрон 2015 йилдаги халқаро келишувга биноан бойитилган уран миқдорига жорий этилган чекловдан 27 июнь куни хатлаб ўтиши билан таҳдид қилган эди.

Эндиликда, Эрон Европа давлатлари мамлакат иқтисодиётини АҚШ санкцияларидан ҳимоя қилиш йўлидаги мажбуриятини бажармаганини таъкидламоқда.

Эроннинг атом энергияси бўйича агентлиги охирги кунларда уран ишлаб чиқариш тўрт баробарга ошганини маълум қилган.

Бундай хабарлар ортидан Буюк Британия, Франция ва Германия Эронни келишув шартларини бузмасликка чақирган.

Агар расмий Теҳрон билан муросага эришишнинг уддасидан чиқилмаса, Европа давлатлари 2015 йилга қадар мавжуд бўлган Эронга қарши санкцияларни қайта тиклашга мажбур бўлиши мумкин.

Куни кеча АҚШ президенти Доналд Трамп Эронга қарши "мислсиз куч" қўллаб, ҳатто, уни буткул йўқ қилиб юбориш билан таҳдид қилган эди.

Европада июнь ойидаги рекорд жазирама қайд этилди

Германия, Полша ва Чехияда чоршанба куни июнь ойидаги энг иссиқ ҳарорат кузатилган.

Пайшанба куни эса айрим мамлакатлар, жумладан, Франция ва Швейцарияда ҳарорат 40 даражадан ортиқ бўлиши кузатилмоқда.

Метеорологлар минтақага иссиқ ҳаво Шимолий Африкадан кириб келаётганини таъкидламоқда.

Франция аҳолини жазирама хавфидан огоҳлантирган.

2003 йилда ҳам жазирама Францияни фалажлантириб, 15 минг инсоннинг ўлимига сабаб бўлган эди.

Испанияда ҳам иссиқ ҳаво туфайли айрим ҳудудларда ўрмон ёнғинлари юзага келиши эҳтимолидан огоҳлантириш эълон қилинган.

Ҳатто, Алп тоғларининг юқори қисмларида ҳам ҳарорат 30 даражага етган.

Экспертлар бундай ноодатий об-ҳаво шароити табиий ҳолат бўлсада, аммо иқлим ўзгариши сабабли иссиқ ҳаво оқимлари бундан кейин янада кўп кузатила бошланишини айтмоқда.

Россия мудофаа вазирлиги институти ўйинчоққа ўхшаш роботехника комплексини намойиш этди

"Армия-2019" ҳарбий форумида "техник разведка ишларини олиб боришга мўлжалланган роботехника комплекси модели"ни намойиш этди.

Комплекс "Инновациялар" кўргазмасига қўйилган.

Журналистлар моделнинг AliExpressда сотиладиган ўйинчоқлардан бирига ўхшашини пайқаган.

Юқори қисмига камера ўрнатилган танк кўринишидаги комплекс тавсифида унинг Мудофаа вазирлиги институтида ишлаб чиқарилгани ёзилган.

Бироқ ижтимоий тармоқ фойдаланувчилари робот-танкнинг бошқарув пультига айнан ўхшаш маҳсулотни AliExpress сайтидан топганлар.

Пультлардаги ёзувлар ҳам бир хил бўлган.

Мудофаа вазирлиги институти ушбу ҳолат юзасидан изоҳ бермаган.

Австралиялик талаба Шимолий Кореяда ҳибсга олинган бўлиши мумкин

Австралия ҳукумати Пхенянда истиқомат қилаётган 29 яшар Алек Сиглей исмли талабанинг ҳибсга олинган бўлиши эҳтимоли юзасидан хавотир билдирган.

Сешанба куни талаба билан алоқа узилиб қолган.

Унинг Шимолий Кореядаги дўстлари ҳибсга олинган бўлиши мумкинлигини хабар қилган.

Ҳозирча, Ким Сен Ир Университетида корея адабиёти бўйича магистрлик даражасини олиш йўлида таҳсил олаётган Алек Сиглейнинг нега ҳибсга олинган бўлиши мумкинлиги маълум эмас.

Шимолий Корея расмийлари Австралия ҳукуматининг бу борадаги сўровини на рад этган, на тасдиқлаган.

Март ойида Алек Сиглей ўзини «Шимолий Кореяда яшаётган ягона австралиялик» дея тасвирлаган эди.