Пак Кин Хе президент саройини тарк этди
Сурат манбаси, AFP
Ҳокимиятдан четлатилган Жанубий Кореянинг собиқ президенти Пак Кин Хе Сеул шаҳри марказидаги президент расмий қароргоҳидан чиқиб ўзининг ҳовлисига бориб жойлашган. Пак Кин Хенинг Сеулнинг Самсон-дон мавзесидаги ҳовлиси атрофини қўриқлашга юзлаб полиция ходимлари жалб этилган.
Маҳаллий вақт билан соат 19:00 да Пак Кин Хе хоним президент маъмурияти ходимлари билан хайрлашиб қароргоҳни тарк этган.
Уйи атрофида унинг кўплаб тарафдорлари қарши олганлар.
Лавозимидан четлатилганидан кейин эълон қилган илк баёнотида у, ҳақиқат қарор топади, деб айтган.
Сурат манбаси, Reuters
"Вақт олишига қарамасдан, ҳақиқат юзага чиқишига ишонаман", дейилади собиқ президент баёнотида.
У ўз дастакловчиларидан "президент сифатидаги вазифаларини адо этолмагани учун" узр сўраган.
10 март куни Жанубий Корея Конституциявий маҳкамаси импичмент туфайли Пак Кин Хени президентлик лавозимидан четлатиш ҳақида қарор қабул қилди.
Энди у президент дахлсизлиги ва жиноий таъқиб иммунитетини йўқотди.
Президент импичментига унинг энг яқин дугонаси Чхве Сун Сил билан боғлиқ коррупция можароси сабаб бўлди.
Сурат манбаси, Reuters
Чхве Сун Сил ширкатлар раҳбарларидан пул талаб қилган, бунинг эвазига бу ширкатларга сиёсий дастак ваъда қилингани айтилмоқда, президент ўзининг яқин дугонасига бу ишларга ижозат бергани учун жиноий иш қўзғатилиши мумкин.
Бир неча ойлардан буён Сеул кўчаларига ўн минглаб одамлар норозилик намойишларига чиқиб президентнинг лавозимидан четлатилиши ва жиноий жавобгарликка тортилишини талаб қилиб келаётган эдилар.
Президент ҳокимиятдан кетишга мажбур этилганидан мамлакатда янги президентлик сайлови ўтказилиши талаб қилинади.
Жанубий Корея қонунчилигига биноан президент импичменти тасдиқланганидан кейинги 60 кун ичида сайлов бўлиб ўтиши лозим.
Би-би-си Ўзбек хизмати билан Whatsapp, Telegram ва Viber орқалибоғланишни истасангиз, телефонимиз:+44 78-58-86-00-02
ТЕЛЕГРАМДА ЭСА каналимиз - https://telegram.me/bbcuzbek
Instagram - BBC UZBEK
Twitter - BBC UZBEK
Odnoklassniki - BBC UZBEK
Facebook - BBC UZBEK
Google+BBC UZBEK
YouTube - BBCUZBEK (https://www.youtube.com/user/bbcuzbek)
Skype - uzbekbbclondon
bbcuzbek.comга тўсиқ бўлса, uzbekweb.netга киринг
